Hesukristu​—Ki Efekto Su Mensahe Tin Riba Hende?

“Un kos ta sigur: E prueba di mas konvinsente ku e hòmber sabí di Kapernaum a sobresalí ta ku ainda e ta sigui influensiá mente i kurason di hende.” *​—OUTOR GREGG EASTERBROOK.

PALABRA tin poder. Palabranan di sabiduria bon skohí por konmové kurason, duna hende speransa i kambia bida di hende. No a yega di eksistí ningun hende ku su palabranan tabatin mas poder ku esnan di Hesukristu. Un hòmber ku a tende Hesus duna e famoso Sermon Riba Seru a skirbi despues: “Ora Hesus a kaba di papia e palabranan akí, e multitutnan a keda asombrá di su siñansa.”​—Mateo 7:28.

Te awe, Hesus su siñansanan ta konosí rònt mundu. Laga nos konsiderá algun di nan; nan tin nifikashon profundo.

“Boso no por sirbi Dios i rikesa.”​—Mateo 6:24.

“P’esei, tur loke boso kier pa hende hasi pa boso, hasi meskos pa nan.”​—Mateo 7:12.

“Duna Cesar loke ta di Cesar, i Dios loke ta di Dios.”​—Mateo 22:21.

“Ta mas bendishoná pa duna ku pa risibí.”​—Echonan 20:35.

Pero, Hesus a hasi muchu mas ku djis ekspresá palabranan impreshonante. E mensahe ku el a prediká tabatin poder pasobra el a transmití e bèrdat tokante Dios, a siña hende kon pa haña berdadero propósito den bida i a mustra bon kla kiko ta e solushon pa tur sufrimentu humano, esta, e Reino di Dios. Segun ku nos ta analisá e mensahe akí den e siguiente artíkulonan, nos lo komprondé dikon Hesus ta sigui “influensiá mente i kurason [di miónes] di hende.”

[Nota]