Bai na kontenido

Bai na kontenido

Bo Tabata Sa?

Bo Tabata Sa?

 Bo Tabata Sa?

Dikon Hesus a bisa ku “ningun hende no ta pone biña nobo den saku-di-kueru bieu”?

Den tempu bíbliko tabata masha normal pa hende usa saku di kueru pa basha biña aden. (Josué 9:13) Nan tabata usa kueru hinté di kabritu, sea di e mama òf di e yu, pa traha e saku. Pa traha un saku di kueru, nan tabata kita e kabes i patanan di e bestia morto afó i nan tabata ranka e kueru kuidadosamente for di e kurpa pa evitá di kòrta e kueru na barika. Kaba nan tabata kurti e kueru i despues kose tur buraku ku eksepshon di e garganta òf un di e pianan di e bestia ku lo a sirbi komo boka di e saku. Por a sera e boka ei ku un tapa òf mar’é ku un kabuya.

Ku tempu e kueru lo a bira duru i steif. P’esei no tabata apropiá pa yena biña nobo, ku ta sigui fermentá, den saku di kueru bieu. Ora e biña fermentá, probablemente e saku di kueru bieu i steif lo a rementá. Di otro banda, saku di kueru nobo tabata mas fleksibel i por a wanta e preshon segun ku e biña a sigui fermentá. P’esei, Hesus a menshoná un kos ku tabata konosí den su tempu. El a bisa loke lo sosodé si un hende pone biña nobo den saku di kueru bieu: “E biña nobo ta hasi e sakunan rementá i e biña ta bash’afó, i e sakunan ta bai pèrdí. Ma biña nobo mester wòrdu poní den saku-di-kueru nobo.”—Lukas 5:​37, 38.

[Plachi na página 13]

Un saku di kueru bieu pa pone biña