Bai na kontenido

Bai na kontenido

Batisá den Nòmber di e Tata, di e Yu i di Spiritu Santu

Batisá den Nòmber di e Tata, di e Yu i di Spiritu Santu

 Batisá den Nòmber di e Tata, di e Yu i di Spiritu Santu

‘P’esei, bai i hasi tur e nashonnan disipel, i batisá nan den nòmber di e Tata, di e Yu i di spiritu santu.’​—MAT. 28:19.

1, 2. (a) Kiko a tuma lugá na Yerusalèm na Pentekòste di aña 33 di nos era? (b) Kiko a motivá hopi hende pa batisá?

TABATA Pentekòste di aña 33 di nos era. Yerusalèm tabata yen di hende ku a bini for di diferente pais pa selebrá e fiesta importante akí. Pero durante e selebrashon, algu straño a sosodé. I despues di e suseso inusual ei, apòstel Pedro a duna un diskurso emoshonante ku tabatin un efekto asombroso. Rònt di 3000 hudiu i prosélito a keda asina konmoví pa su palabranan ku nan a repentí i a batisá den awa. Di e manera ei, nan tambe a bira parti di e kongregashon kristian ku a kaba di ser formá. (Echo. 2:41) E boutismo di asina tantu hende den e tankinan di awa na Yerusalèm lo mester a kousa masha konmoshon.

2 Kiko a pone ku asina tantu hende a batisá? Wèl, mas trempan durante e dia ei, tabatin “un zonidu for di shelu, manera un bientu violento i fuerte.” Na e momento ei, mas o ménos 120 disipel di Hesus, ku tabata reuní den e sala ariba di un kas, a wòrdu yená ku spiritu santu. Despues di esei, hopi hòmber i muhé deboto ku a tende e zonidu a bai einan, i nan a keda fasiná di tende e disipelnan ei “papia den otro lenganan.” I ora nan a tende Pedro su diskurso, den kua el a duna komentarionan spesífiko relashoná ku e morto di Hesus, hopi di nan “a wòrdu konmoví te den profundidat di nan kurason.” P’esei, nan a puntra kiko nan mester hasi, i Pedro a kontestá nan: “Repentí, i laga kada un di boso wòrdu batisá den e nòmber di Hesukristu . . . i boso lo risibí e don di spiritu santu.”​—Echo. 2:​1-4, 36-38.

3. Kiko e hudiu- i prosélitonan ku a repentí mester a hasi riba dia di Pentekòste?

3 Pensa riba e background religioso di e hudiu-  i prosélitonan ku a tende Pedro su diskurso. Nan tabata adorá Yehova kaba. I for di e Skritura Hebreo, nan a siña ku Dios su spiritu santu ta su forsa aktivo ku el a usa durante kreashon i despues di esei. (Gén. 1:2; Hues. 14:​5, 6; 1 Sam. 10:6; Sal. 33:6NW) Pero esei so no tabata sufisiente. Tabata masha importante tambe pa nan a komprondé i aseptá ku Hesus, e Mesias, ta Dios su medio di salbashon. P’esei, Pedro a enfatisá ku nan mester a “batisá den e nòmber di Hesukristu.” Algun dia promé ku e diskurso ei, Hesus, komo un persona resusitá, a duna Pedro i e otro disipelnan e mandato pa batisá hende ‘den nòmber di e Tata, di e Yu i di spiritu santu.’ (Mat. 28:​19, 20) E boutismo ei tabatin nifikashon profundo den e promé siglo, i awe tambe. Pero kiko e ta enserá?

Den Nòmber di e Tata

4. Ki kambio a surgi pa hende ku tabatin un relashon ku Yehova?

4 Manera paragraf tres a mustra, e personanan ku a reakshoná positivamente riba Pedro su diskurso tabata adoradó di Yehova. Pues, nan tabatin un relashon ku Dios promé ku nan a tende e diskurso ei. Nan tabata hasi esfuerso pa kumpli ku Su Lei, i ta esei mes a pone ku hopi hende di vários pais a bini Yerusalèm. (Echo. 2:​5-11) Sinembargo, Dios a kaba di hasi un kambio signifikativo den e manera ku e tabata trata òf komuniká ku hende. El a rechasá e hudiunan komo su nashon spesial. Debí na esei, nan no por haña su aprobashon mas mediante e Lei. (Mat. 21:43; Kol. 2:14) Pues, si Pedro su oyentenan kier tabatin un relashon duradero ku Yehova, nan mester a hasi algu otro.

5, 6. Kiko hopi hudiu i prosélito den promé siglo a hasi pa nan por tabatin un bon relashon ku Dios?

5 Pedro su oyentenan mester a akudí na Yehova, Esun ku a duna nan bida. (Echo. 4:24) Sí, awor mas ku nunka nan por a mira ku Yehova ta un Tata bondadoso. El a manda e Mesias pa libra nan i tabata dispuesto pa pordoná asta e personanan, ku di un òf otro manera, tabata responsabel pa e morto di su Yu. De echo, esnan ku a sigui Pedro su konseho tabatin asta mas motibu awor pa apresiá loke e Tata a hasi pa tur hende ku kier tabatin un bon relashon kuné.​—Echo. 2:​30-36.

6 Sí, e hudiu- i prosélitonan por a komprondé awor ku pa nan por tin un relashon ku Yehova, nan mester a rekonosé ku e ta Esun ku a perkurá salbashon mediante Hesus. P’esei, bo por komprondé dikon nan a repentí di nan pikánan, por ehèmpel, di e echo ku nan a rechasá Hesus i tabata responsabel pa su morto, sea konsientemente òf inkonsientemente. Ta komprendibel tambe ku, durante e dianan ku a sigui, “nan tabata dediká nan mes kontinuamente na e siñansa di e apòstelnan.” (Echo. 2:42) Nan tabata por i kier a “aserká e trono di grasia ku konfiansa.”​—Heb. 4:16.

7. Ki punto di bista hopi hende tabatin enkuanto Dios promé ku nan a batisá den nòmber di e Tata?

7 Awendia, miónes di hende di diferente background a siña e bèrdat tokante Yehova for di Beibel. (Isa. 2:​2, 3) Algun di nan tabata ateista i otronan deista, kendenan ta kere ku Dios ta eksistí sí pero ku e no ta interesá den su kreashon. Sinembargo, ku tempu nan a bira konvensí ku ta eksistí un Kreador ku nan por tin un bon relashon kuné. Otronan tabata adorá vários ídolo òf un dios ku ta konsistí di tres persona. Pero, nan a siña ku Yehova ta e úniko Dios todopoderoso, i awor nan ta yam’é na su nòmber personal. Esaki ta na armonia ku loke Hesus a bisa, esta, ku su disipelnan mester ser batisá den nòmber di e Tata.

8. Kiko personanan ku no tabata sa di e piká adámiko tabatin ku komprondé tokante e Tata?

8 Ademas, nan a siña ku nan a heredá piká for di Adam. (Rom. 5:12) Esaki tabata algu nobo ku nan mester a aseptá, pasobra esei ta e bèrdat. Nos por kompará e hendenan ei ku un persona enfermo ku no tabata konsiente di su malesa. Kisas e tabatin algun síntoma, manera doló de bes en kuando. Pero, debí ku e no a  ser diagnostiká ku un malesa spesífiko, podisé el a pensa ku su salú tabata relativamente bon. Sinembargo, echonan ta demostrá algu otro. (Kompará ku 1 Korintionan 4:4.) Kiko e persona ei lo hasi ora e haña un diagnóstiko eksakto di su malesa? Lo no ta sabí pa e buska i aseptá un tratamentu efikas ku ta konosí pa su bon resultado? Asina tambe, hopi hende ku a haña sa e bèrdat tokante piká heredá a aseptá e “diagnóstiko” di Beibel i a komprondé ku ta Dios tin e “remedi.” Sí, tur hende ku no tin un relashon ku e Tata tin ku akudí na dje, Esun ku por “kura” nan.​—Efe. 4:​17-19.

9. Kiko Yehova a hasi pa hende por tin un relashon kuné?

9 Si bo a dediká bo bida na Yehova Dios kaba i a bira un kristian batisá, bo sa ku un relashon kuné ta algu masha maravioso. Sí, ta e ora ei bo por komprondé ki un persona amoroso, bo Tata, Yehova, ta. (Lesa Romanonan 5:8.) Ounke Adam ku Eva a peka kontra Yehova, el a tuma e inisiativa pa asina nan desendientenan—inkluso nos—por tin un bon relashon kuné. Pa e por a hasi esei, e mester a eksperensiá e doló di mira su Yu sufri i muri. E echo ku nos sa esaki mester motivá nos pa aseptá Dios su outoridat i obedesé su mandamentunan debí na nos amor p’e. Pero, si ainda bo no a dediká bo mes na Dios i batisá, bo tin bon motibu pa hasi esei.

Den Nòmber di e Yu

10, 11. (a) Pakiko bo ta masha gradisidu na Hesus? (b) Ki sintimentu e echo ku Hesus a duna su bida komo un reskate ta lanta den bo?

10 Pero pensa awor riba loke Pedro a bisa e multitut. El a enfatisá e echo ku nan mester a aseptá Hesus, lokual ta direktamente ligá ku batisá “den nòmber . . . di e Yu.” Dikon esei tabata di sumo importansia e tempu ei i awe tambe? Wèl, ora nos aseptá Hesus i batisá den su nòmber, esei ta nifiká ku nos ta rekonosé e papel ku e ta hunga den nos relashon ku e Kreador. Hesus mester a ser kologá na un staka di tormento pa e por a kita e maldishon di e Lei ku tabata riba e hudiunan. Sinembargo, su morto tabatin un benefisio muchu mas grandi. (Gal. 3:13) El a perkurá e sakrifisio di reskate ku humanidat kompletu tabatin mester. (Efe. 2:​15, 16; Kol. 1:20; 1 Juan 2:​1, 2) Pa logra esei, Hesus a soportá inhustisia, odio, tortura i finalmente morto. Kuantu apresio bo tin pa su sakrifisio? Imaginá ku bo tabata un mucha hòmber di 12 aña ku tabata riba Titanic, e barku ku a dal den un seru di eis i a senk na 1912. Bo ta purba bula den un boto di salbabida, pero no tin mas lugá. E ora ei, un hòmber den e boto di salbabida ta sunchi su kasá, subi bèk abordo di e barku i ta pone abo den e boto di salbabida. Kon bo ta sinti? Sin duda, lo bo ta masha gradisidu na dje! Bo por komprondé awor kon un mucha hòmber ku realmente a pasa den e eksperensia ei a sintié? * Sinembargo, Hesus a hasi muchu mas ku esei pa bo. El a muri pa bo por haña bida eterno.

11 Kon bo a sinti ora bo a haña sa loke e Yu di Dios a hasi pa bo? (Lesa 2 Korintionan 5:​14 i 15.) Probablemente bo a keda masha gradisidu. I esei a motivá bo pa dediká bo bida na Dios i pa ‘no biba mas pa bo mes, ma pa esun ku a muri pa bo.’ Batisá den nòmber di e Yu ta nifiká ku bo ta rekonosé loke Hesus a hasi pa bo i ku bo ta aseptá su outoridat komo “e Prens di bida.” (Echo. 3:15; 5:31) Promé ku esei, bo no tabatin un relashon ku e Kreador, i bon mira, bo no tabatin berdadero speransa tampoko. Pero awor sí bo tin un relashon ku e Tata, pasobra bo a ehersé fe den e sanger dramá di Hesukristu i a batisá. (Efe. 2:​12, 13) Apòstel Pablo a skirbi: ‘Un tempu boso tabata leu for di Dios i boso tabata su enemigu pa motibu di tur kos malu ku boso tabata pensa i hasi. Pero awor Dios, pa medio di e morto físiko di su Yu [Hesus], a drecha tur kos entre boso ku e mes, pa asina ei e presentá boso santu i sin mancha.’​—Kol. 1:​21, 22, BPK.

12, 13. (a) Ki efekto e echo ku bo a batisá den nòmber di e Yu mester tin riba e manera ku bo ta reakshoná ora un hende ofendé bo? (b) Ki obligashon bo tin komo un kristian batisá den nòmber di Hesus?

 12 Sinembargo, ounke bo a batisá den nòmber di e Yu, bo ta bon konsiente tambe di bo inklinashon pa hasi piká. Ta bon pa nos keda konsiente di esei tur dia. Por ehèmpel, si un persona ofendé bo, bo ta kòrda ku boso tur dos ta pekadó? I siendo ku boso tur dos tin mester di Dios su pordon, boso tur dos mester pordoná. (Mar. 11:25) Pa enfatisá esaki, Hesus a duna un ilustrashon: Un doño a kanselá un montante di dies mil talento (60 mion denario) ku su esklabo tabata deb’é. Pero, e esklabo akí sí no a pordoná su kompañero esklabo ku tabata deb’é 100 denario. Na final di e ilustrashon, Hesus a mustra e siguiente punto bon kla: Yehova no ta pordoná un persona ku no ta pordoná su ruman. (Mat. 18:​23-35) Sí, batisá den nòmber di e Yu ta nifiká ku bo ta rekonosé Hesus su outoridat i ta hasi esfuerso pa sigui su ehèmpel i siñansanan. I un di e siñansanan ei ta ku bo mester ta dispuesto pa pordoná otro hende.​—1 Ped. 2:21; 1 Juan 2:6.

13 Debí ku bo ta imperfekto, bo no por imitá Hesus perfektamente. Apesar di esei, ya ku bo a dediká bo mes di henter kurason na Dios, bo tin ku hasi bo máksimo esfuerso pa imitá Hesus. Esaki ta enserá ku bo tin ku traha pa kita e personalidat bieu i bisti esun nobo. (Lesa Efesionan 4:​20-24.) Ora bo tin rèspèt pa un amigu, probablemente bo ta trata di siña for di su ehèmpel i bon kualidatnan. Di mes manera, bo tin ku siña for di e ehèmpel di Kristu i imit’é.

14. Kon bo por demostrá ku bo ta rekonosé Hesus su outoridat komo Rei selestial?

14 Tin un otro manera ku bo por mustra ku bo ta komprondé kiko batisá den nòmber di e Yu ta enserá. Beibel ta bisa ku Dios “a someté tur kos bou di [Hesus] su pianan, i a duna e komo kabes riba tur kos na e iglesia,” òf kongregashon. (Efe. 1:22) Pues, bo tin ku respetá e manera ku Hesus ta dirigí hende ku a dediká nan mes na Yehova. Kristu ta usa hende imperfekto den e kongregashonnan, spesialmente hòmbernan spiritualmente maduro, esta, ansianonan nombrá. E hòmbernan ei ta ser nombrá ‘pa nan reahustá e santunan i edifiká e kurpa di Kristu.’ (Efe. 4:​11, 12, NW) Asta si un hende kometé un eror, Hesus komo e Rei di e Reino selestial ta kapas pa trata ku e asuntu na su debido tempu i manera. Abo ta kere esei?

15. Si bo no a batisá ainda, ki bendishonnan bo por spera despues di bo boutismo?

15 Tin algun hende ku ainda no a dediká nan mes na Yehova i batisá. Si abo ta un di nan, kiko bo ta pensa di loke nos a konsiderá den e paragrafnan anterior? E informashon ei a yuda bo komprondé ku rekonosé e Yu ta un muestra di gratitut i un paso sabí? Ora bo batisá den nòmber di e Yu, bo ta pone bo mes riba kaminda pa risibí bendishonnan grandi.​—Lesa Juan 10:​9-11.

Den Nòmber di Spiritu Santu

16, 17. Kiko batisá den nòmber di spiritu santu ta nifiká pa bo?

16 Kiko ta nifiká batisá den nòmber di spiritu santu? Manera e artíkulo akí a menshoná mas promé, e personanan ku a tende Pedro su diskurso riba dia di Pentekòste tabata sa kiko ta spiritu santu. De echo, ku nan propio wowo nan por a mira evidensia ku Dios a sigui usa su  spiritu santu. Pedro tabata un di e personanan ku a ser “yená ku spiritu santu i [ku] a kuminsá papia den otro lenganan.” (Echo. 2:​4, 8) E ekspreshon “den nòmber di” no ta apliká semper na un persona. Por ehèmpel, awendia, hende ta hasi hopi kos “den nòmber di gobièrnu,” i gobièrnu no ta un persona. Mas bien, esaki ta nifiká ku e kosnan ei ta ser hasí ku outoridat di gobièrnu. Di mes manera, un persona ku batisá den nòmber di spiritu santu ta rekonosé ku spiritu santu no ta un persona, sino Yehova su forsa aktivo. Ademas, su boutismo ta nifiká ku e ta rekonosé e papel ku spiritu santu ta hunga den Dios su propósito.

17 Mediante bo estudio di Beibel, bo a siña hopi kos tokante spiritu santu. Por ehèmpel, bo a komprondé ku e Skritura a ser skirbí bou di inspirashon di spiritu santu. (2 Tim. 3:16) Segun ku bo a sigui krese spiritualmente, probablemente bo a haña un mihó komprondementu di e echo ku e ‘Tata selestial ta duna spiritu santu na esnan ku pidié,’ i ku esei ta konta pa abo tambe. (Luk. 11:13) Kisas, bo mes tin evidensia ku spiritu santu ta obra den bo bida. Di otro banda, si ainda bo no a batisá den nòmber di spiritu santu, pensa riba esaki: E echo ku Hesus a duna nos e garantia ku e Tata ta duna hende spiritu santu ta nifiká ku bo por spera berdadero bendishon segun ku bo ta risibí e spiritu ei.

18. Ki bendishon tin pa hende ku batisá den nòmber di spiritu santu?

18 Awe ta bisto tambe ku Yehova ta guia i dirigí e kongregashon kristian mediante su spiritu santu. Ademas, spiritu santu ta yuda nos kada un den nos aktividatnan diario. E echo ku nos a batisá den nòmber di spiritu santu ta nifiká ku nos ta rekonosé e papel ku e ta hunga den nos bida i ta kooperá kuné ku gratitut. Ma algun hende kisas ta puntra kon nos por kumpli ku e dedikashon ku nos a hasi na Yehova, i kon spiritu santu ta enbolbí den esaki. Nos lo konsiderá esei den e siguiente artíkulo.

[Nota]

^ par. 10 Wak ¡Despertad! di 22 di aprel 1982, página 3-8.

Bo Ta Kòrda?

• Kiko batisá den nòmber di e Tata ta enserá pa bo?

• Kiko ta nifiká batisá den nòmber di e Yu?

• Kon bo por demostrá ku bo ta komprondé kiko ta nifiká batisá den nòmber di e Tata i di e Yu?

• Kiko ta nifiká batisá den nòmber di spiritu santu?

[Preguntanan di Estudio]

[Plachi na página 14]

Ki relashon e disipelnan nobo tabatin ku e Tata despues di Pentekòste di aña 33 di nos era?

[Rekonosementu]

Ku pèrmit di Israel Museum, Yerusalèm