Bai na kontenido

Bai na kontenido

Beibel Ta e Palabra di Dios?

Beibel Ta e Palabra di Dios?

“Tur Skritura ta inspirá pa Dios i ta útil pa siñansa, pa reprendementu, pa korekshon, pa eduká den hustisia, pa e hende di Dios por ta perfekto, ekipá pa tur bon obra.”​—2 TIMOTEO 3:​16, 17.

E PALABRANAN poderoso ei di apòstel Pablo ta mustra kon balioso Beibel tabata p’e! Ta klaru ku e tabata referí spesífikamente na e parti di Beibel ku tabata disponibel den su tempu, es desir, e skrituranan ku generalmente hende ta yama e Tèstamènt Bieu. Pero en prinsipio su palabranan ta apliká na tur 66 buki di Beibel, inkluso esnan ku Hesus su fiel disipelnan a skirbi den e promé siglo di nos era.

Abo tambe ta konsiderá Beibel komo un buki balioso meskos ku Pablo? Bo ta kere ku ta Dios realmente a inspirá e eskritornan di Beibel? E kristiannan di promé siglo a kere esei. Anto atraves di siglonan, kristiannan berdadero a sigui kere esei. I e klero ingles John Wycliffe di siglo 14 a konsiderá Beibel komo “e medio apsoluto pa determiná kiko ta bèrdat.” Komentando riba e palabranan di Pablo sitá aki riba, The New Bible Dictionary ta bisa ku ‘inspirashon divino, pues, ta garantisá ku tur loke ta skirbí den Beibel ta bèrdat.’

Kambio di Aktitut pa ku Beibel

Sinembargo, den añanan resiente, hende gradualmente a pèrdè konfiansa den e outoridat di Beibel. E buki di instrukshon The World’s Religions ta bisa: ‘Teorétikamente, tur kristian ta aseptá Beibel komo outoridat, tantu pa guia nan akshonnan komo pa forma  nan kreensianan.’ Pero den práktika sí no ta asina mas. Awendia, hopi hende ta mira Beibel simplemente komo un buki ku ta kontené “tradishon inkonfiabel di hende.” Maske nan ta rekonosé ku eskritornan di Beibel tabata hende ku hopi fe, nan ta konsiderá e eskritornan ei simplemente komo hende pekadó ku a hasi esfuerso pa splika bèrdatnan spiritual profundo pero ku no tabatin e konosementu i iluminashon ku nos tin awendia.

En realidat, masha poko hende awendia realmente ta laga Beibel guia nan pensamentu i akshon. Por ehèmpel, kuantu biaha bo no ta tende hende bisa ku normanan bíbliko enkuanto moralidat ta ouderwets i no ta práktiko? Hopi hende no tin problema pa suavisá lei- i prinsipionan di Beibel—òf asta ignorá nan kompletamente ora ta kumbiní nan. Algun hende ku ta yama nan mes kristian ta ignorá abiertamente loke Beibel ta bisa tokante fornikashon, adulterio, desonestidat i buracheria.​—1 Korintionan 6:​9, 10.

Dikon hende su aktitut pa ku Beibel a kambia? Na prinsipio di siglo 20, arkeólogo Sir Charles Marston a indiká den su buki The Bible Is True kiko ta ún di e motibunan. El a bisa ku hende tabata muchu lihé pa “aseptá hopi di e spekulashonnan di eskritornan moderno sin kuestioná e spekulashonnan akí” ku a pone hende duda ku Beibel ta konfiabel. Esei por ta e kaso te ainda? Kon bo mester mira e opinion- i teorianan di ekspertonan ku a pone hende kuminsá pèrdè konfiansa den Beibel? Wak kiko e siguiente artíkulo ta bisa di esei.