Hala Serka Dios

Ora Yehova A Deskribí Su Mes

Eksodo 34:​6, 7

KON abo lo a deskribí Dios, esta, su personalidat i su manera di aktua den vários situashon? Imaginá bo ku bo tabatin e oportunidat di hasi Dios pregunta tokante su mes i despues skucha kon e ta deskribí su atributonan. Wèl, profeta Moisés sí a haña e oportunidat ei. I nos ta kontentu ku Dios a inspir’é pa skirbi loke a tuma lugá.

Riba Seru Sinaí, Moisés a bisa Yehova: “Mi ta roga bo, mustra mi bo gloria!” (Eksodo 33:18) E siguiente dia, e profeta tabatin e privilegio di haña un bista di Dios su gloria. * Moisés no a duna un deskripshon detayá di loke el a mira den e vishon magnífiko. En bes di esei, el a registrá loke ta muchu mas importante ainda, esta, loke Dios a bisa. Laga nos analisá loke Yehova a bisa di su mes persona. Nos ta haña esei na Eksodo 34:​6 i 7.

E promé kos ku Yehova a revelá tokante su mes ta ku e ta un Dios “yen di kompashon i grasia.” (Versíkulo 6) Segun un eksperto di Beibel, e palabra hebreo tradusí akinan komo “yen di kompashon” ta indiká ku Dios tin “tierno kompashon, meskos ku un tata tin kompashon pa su yunan.” E palabra tradusí komo “grasia” ta bini di un verbo ku “ta deskribí un persona, kende su kurason ta motiv’é pa yuda un hende ku tin mester di algu.” Ta bisto anto ku Yehova ke pa nos sa ku e ta perkurá pa su adoradónan meskos ku mayornan ta perkurá pa nan yunan. Sí, ku tierno amor i interes profundo e ta perkurá pa nan nesesidatnan.​—Salmo 103:​8, 13.

Despues, Yehova a bisa ku e “no ta rabia lihé.” (Versíkulo 6) E no ta rabia lihé ku su sirbidónan riba tera. Mas bien, ku pasenshi e ta soportá nan debilidatnan miéntras ku e ta duna nan tempu pa kambia nan mal kondukta.​—2 Pedro 3:9.

Siguiendo ku su deskripshon, Dios a bisa ku e ta “abundá den miserikòrdia [“bondat amoroso,” NW] i bèrdat.” (Versíkulo 6) Bondat amoroso òf amor leal ta un kualidat presioso ku Yehova ta usa komo base pa forma un relashon fuerte i duradero ku su pueblo. (Deuteronomio 7:9) Ademas, Yehova ta un fuente di bèrdat. E no por gaña ni e no por ser engañá. Siendo ku e ta e “Dios di bèrdat,” nos por tin pleno fe den tur loke e ta bisa, inkluso den su promesanan pa futuro.​—Salmo 31:5, BPK.

Un otro bèrdat importante ku Yehova ke pa nos sa di su persona ta ku e ta pordoná “inikidat, transgreshon i piká.” (Versíkulo 7) E ta “kla pa pordoná” pekadónan ku repentí. (Salmo 86:5) Pero na mes momento, Yehova nunka ta pasa por alto di loke ta malu. El a splika ku “di ningun manera e lo no laga di kastigá e kulpabel.” (Versíkulo 7) E Dios santu i hustu lo no keda sin kastigá hende ku ta peka deliberadamente. Tardi òf trempan, nan lo tin ku karga e konsekuensianan di nan mal kondukta.

E deskripshon ku Yehova a duna di su kualidatnan ta indiká bon kla ku e ke pa nos siña konos’é i familiarisá nos mes ku su personalidat i su manera di aktua. Bo no ta sinti bo motivá pa siña mas di su bunita kualidatnan?

[Nota]