Un Bon Amistat ku Dios
E promé artíkulo di e revista akí a bisa ku hopi hende ta konsiderá Beibel komo un buki di Dios. Nan ta ripará ku ora nan ta lesa Beibel i ta apliká su konsehonan, nan ta sinti nan mes mas serka di Dios i nan ta haña sa kiko ta e propósito di bida.
Beibel ta bisa ku hende spiritual òf hende ku ke tin un amistat ku Dios ta balorá Dios su punto di bista i ta biba di akuerdo ku su normanan. Di otro banda, hende ku no ta spiritual ta dependé riba nan mes opinion i ta sigui nan mes deseo.—Hudas 18, 19; Efesionan 5:1.
SPERANSA
PRINSIPIO DI BEIBEL: “Si bo desmayá [òf, desanimá] den e dia di angustia, bo forsa ta keda limitá.”—Proverbionan 24:10.
LOKE ESAKI TA ENSERÁ: Desanimashon por kita nos forsa pa por trata ku problema di bida. Pero speransa por duna nos forsa pa sigui padilanti. Ora nos tin speransa, esei ta rekordá nos ku e problemanan ku nos ta enfrentá ta temporal i ku algu bon por sali for di e situashonnan difísil ei.
LOKE BO POR HASI: Purba di pensa riba e kosnan bon ku lo pasa den futuro. En bes di preokupá tokante kiko por pasa òf warda pa un sirkunstansia perfekto presentá, hasi esfuerso pa logra bo metanan awor. Ta bèrdat ku semper algu inesperá por sosodé. (Eklesiástes 9:11, NW) Pero hopi biaha, kos por resultá mas mihó di loke nos a spera. Pa ilustrá esei, Beibel ta bisa: “Sembra bo simia mainta, i no keda sin hasi nada atardi; pasobra bo no sa si sembramentu di mainta òf di atardi lo tin éksito, òf si nan tur dos lo ta bon.”—Eklesiástes 11:6.
BUSKA KONTESTA PA E PREGUNTANAN IMPORTANTE DI BIDA
PRINSIPIO DI BEIBEL: “Duna mi komprondementu . . . Bo palabra den su totalidat ta bèrdat.”—Salmo 119:144, 160.
LOKE ESAKI TA ENSERÁ: Beibel tin kontesta pa e preguntanan ku kasi tur hende sa hasi. Por ehèmpel:
-
Di unda nos a bini?
-
Kiko ta e propósito di bida?
-
Kiko ta pasa ku nos ora nos muri?
-
Ta e bida akí so tin?
Miónes di hende rònt mundu a haña kontesta den Beibel pa e preguntanan akí i pa hopi otro mas. I awor nan ta hopi mas felis.
LOKE BO POR HASI: Nos ta animá bo pa analisá kiko Beibel ta siña. Pidi un Testigu di Yehova pa yuda bo komprondé Beibel. Bishitá nos website, jw.org, òf asistí na un di nos reunionnan. Entrada ta grátis i no ta pasa kolèkt.
OTRO PRINSIPIO DI BEIBEL
Wak e vidio Dikon Analisá Loke Beibel Ta Bisa? riba jw.org. E ta disponibel na mas ku 880 idioma
REKONOSÉ KU NOS TIN MESTER DI DIOS.
“Felis ta esnan ku ta konsiente ku nan tin mester di Dios.”—MATEO 5:3, nota.
SIÑA MAS TOKANTE E DIOS DI BEIBEL.
“Buska Dios . . . i realmente hañ’é . . . E no ta masha leu for di kada un di nos.”—ECHONAN 17:27.
LESA BEIBEL I MEDITÁ RIBA DJE.
“Ma su delisia ta den e lei di SEÑOR, i den su lei e ta meditá di dia i anochi . . . Tur loke ku e hasi ta prosperá.”—SALMO 1:2, 3.
Otro Artíkulo Interesante
E TOREN DI VIGILANSIA
Kon Beibel Por Mehorá Mi Bida?
E buki antiguo akí ta kontené konsehonan práktiko.
