Neɛnlea nu bie mɔɔ bɛyɛle la kile kɛ mgbavolɛ nee mbɛlɛra mɔɔ bɛwɔ America la anu ɛya ngyɛnu 80 yɛ asɔne noko, bɛ nuhua foa ko a yɛ ye dahuu a. Nɔhalɛ nu, bɛ nuhua bie mɔ dwenle nwo kɛ: ‘Asoo asɔneyɛlɛ le debie mɔɔ maa yɛ nwo tɔ yɛ ala anzɛɛ ɔyɛ ninyɛne gyɛne?’

•  Duzu a le asɔneyɛlɛ?

•  Asoo Nyamenle tie?

•  Duzu a mebahola meayɛ nwolɛ asɔne a?

•  Mɔɔ ɛ tipɛnema ka la

Asɔneyɛlɛ le ngitanwo mɔɔ yɛ nee ninyɛne kɔsɔɔti Bɔvolɛ ne di a. Wɔmɔ dwenle mɔɔ ɛhye kile la anwo! Gyihova le kpole tɛla alesama wɔ adenle biala azo, noko “ɔ nee yɛ nuhua ko biala avinli anwa.” (Gyima ne 17:27) Nɔhalɛ nu ɛsalɛdolɛ mɔɔ yɛ anyelielɛ ɛhye wɔ Baebolo ne anu: “Bɛbikye Nyamenle, na ɔbabikye bɛ.”​—Gyemise 4:8.

Kɛzi ɛbabikye Nyamenle ɛ?

• Asɔneyɛlɛ​—ɛdua zo ɛtendɛ ɛkile Nyamenle.

• Baebolo ne ɛzukoalɛ​—Nyamenle dua zo “tendɛ” kile wɔ.

Ndenle nwiɔ ɛhye azo mɔɔ bɛdua bɛdi adwelie​—asɔneyɛlɛ nee Baebolo ne ɛzukoalɛ​—baboa wɔ yeamaa ɛ nee Nyamenle anyia agɔnwolɛvalɛ mɔɔ anu mia la.

“Gyihova mɔɔ ɛ nee ye tendɛ​—Anwuma Anwumanli ne mɔɔ ɛ nee ye di adwelie la le nwolɛ adenle titili ko mɔɔ alesama bahola anyia a.”​—Jeremy.

“Gyihova mɔɔ meka me ahonle nu edwɛkɛ mekile ye wɔ asɔneyɛlɛ nu la maa mete nganeɛ kɛ mebikye ye kpalɛ.”​—Miranda.

Saa ɛdie Nyamenle ɛdi na ɛyɛ asɔne bɔbɔ a​—ɔbahola yeayɛ se yeamaa wɔ kɛ ɛbalie wɔali kɛ amgba Nyamenle ɛlɛtie wɔ. Noko akee, Baebolo ne ka kɛ Gyihova le “asɔneyɛlɛ Tievolɛ.” (Edwɛndolɛ 65:2, New World Translation) Ɔka bɔbɔ kɛ ‘ɛvuandi wɔ adwenleadwenle muala ɛgua ɔ nwo zo.’ Duzu ati ɔ? ‘Ɔluakɛ ɔdwenle ɛ nwo.’​—1 Pita 5:7.

Dwenle ɛhye anwo: Asoo ɛnyia mekɛ ɛ nee ɛ gɔnwo mɔ mɔɔ bɛbikye wɔ la tendɛ dahuu? Ɛbahola ɛ nee Nyamenle noko ayɛ zɔ. Ɛ nee ye ɛdendɛ dahuu wɔ asɔneyɛlɛ nu na fa ye duma Gyihova ne fɛlɛ ye. (Edwɛndolɛ 86:5-7; 88:9) Nɔhalɛ nu, Baebolo ne ka kɛ ‘ɛyɛ asɔne dahuu.’​—1 Tɛsalonaekama 5:17.

“Asɔneyɛlɛ le adwelie mɔɔ me nee me anwuma Selɛ ne di a, medua zo meka me ahonle nu edwɛkɛ mekile ye.”​—Moises.

“Meka me ahonle nu edwɛkɛ mekile Gyihova kɛ mɔɔ anrɛɛ mebaha meahile me mame anzɛɛ me gɔnwo bie mɔɔ bikye me la.”​—Karen.

Baebolo ne ka kɛ: “Wɔ debie biala anu bɛlua asɔneyɛlɛ nee modolɛ nee moyɛlɛ zo bɛva bɛ nzɛlɛlɛ bɛdo Nyamenle anyunlu.”​—Felepaema 4:6.

Asoo ɛhye kile kɛ nvonleɛ ɛnle nwo kɛ ɛbayɛ wɔ ngyegyelɛ ne anwo asɔne ɔ? Ɛhɛe! Nɔhalɛ nu, Baebolo ne ka kɛ: ‘Fa wɔ adesoa ne maa Gyihova, na ɔbazɔ wɔ nu.’​—Edwɛndolɛ 55:22.

Nɔhalɛ nu, saa ɛlɛyɛ asɔne a, mmaka wɔ ngyegyelɛ ala anwo edwɛkɛ. Bɛlɛra bie mɔɔ bɛfɛlɛ ye Chantelle la ka kɛ, “Saa moalɛ ala a mesɛlɛ mefi Gyihova ɛkɛ a ɔnrɛmaa yɛ agɔnwolɛvalɛ ne anu ɛnrɛmia. Menwu ye kɛ ɔwɔ kɛ medimoa meyɛ Gyihova mo, yɛɛ ninyɛne mɔɔ ɔwɔ kɛ meda ye ase wɔ nwolɛ la yɛ dɔɔnwo kpalɛ.”

Dwenle ɛhye anwo: Ninyɛne boni mɔ a mebahola meayɛ nwolɛ mo a? Ɛbahola wɔadwenle ninyɛne nsa mɔɔ ɛbala Gyihova ase wɔ nwo ɛnɛ la ɔ?

“Ninyɛne ngyikyi le kɛ felawɔse bɔbɔ bahola aha wɔ yeamaa wɔala Gyihova ase.”​—Anita.

“Dwenledwenle abɔdeɛ mɔɔ le ngɛnlɛma anzɛɛ Baebolo ngyɛnu bie mɔɔ ɛ nye die nwo la anwo na da Gyihova ase wɔ nwo.”​—Brian.