Edwɛne 86:1-17

  • Nyamenle biala ɛnle kɛ Gyihova la

    • Gyihova lɛ ɛhulolɛ kɛ ɔbava ɛtane yeahyɛ (5)

    • Maanle maanle kɔsɔɔti bazonle Gyihova (9)

    • “Kilehile me wɔ adenle ne” (11)

    • “Maa me ahonle ɛyɛ ko” (11)

Devidi asɔneyɛlɛ. 86  O Gyihova, yɛ ɛnzolɛ tie* me na bua me,Ɔluakɛ mewɔ ngyegyelɛ nu yɛɛ mele ehyianli.+   Bɔ me ngoane* nwo bane, ɔluakɛ mele nɔhavo.+ Die wɔ sonvolɛ ne mɔɔ fa ɔ nwo to ɛ nwo zo la,Ɔluakɛ wɔmɔ a ɛle me Nyamenle a.+   O Gyihova, maa menyia ɛ nyunlu ɛlolɛ,+Ɔluakɛ wɔmɔ a mesu mefɛlɛ wɔ dahuu a.+   Maa wɔ sonvolɛ* ɛli fɛlɛko,Ɔluakɛ, O Gyihova, wɔmɔ a meba wɔ ɛkɛ* a.   O Gyihova, ɛle kpalɛ+ yɛɛ ɛlɛ ɛhulolɛ kɛ ɛbava ɛtane wɔahyɛ;+Wɔ ɛlɔlɛ kpundii ne zonle maa bɛdabɛ mɔɔ bɛsu bɛfɛlɛ wɔ la amuala.+   O Gyihova, tie me asɔneyɛlɛ;Na yɛ ɛnzolɛ tie me modolɛ nzɛlɛlɛ.+   Mesu mefɛlɛ wɔ wɔ me anwongyelelɛ mekɛ nu,+Ɔluakɛ ɛbabua me.+   O Gyihova, nyamenle biala nee wɔ ɛnzɛ,+Gyima biala nee wɔ gyima ne mɔ ɛnzɛ.+   Maanle maanle mɔɔ wɔbɔ la kɔsɔɔti baraNa bɛabɔ bɛ ti aze wɔ ɛ nyunlu, O Gyihova,+Na bɛawula wɔ duma ne anyunlunyia.+ 10  Ɔluakɛ ɛle bedevinli yɛɛ ɛyɛ nwanwane ninyɛne;+Ɛ ngomekye ala a ɛle Nyamenle a.+ 11  O Gyihova, kilehile me wɔ adenle ne.+ Mebalua wɔ nɔhalɛ ne anu.+ Maa me ahonle ɛyɛ ko* amaa yeazulo wɔ duma ne.+ 12  O Gyihova me Nyamenle, mefi me ahonle muala anu+ meye wɔ ayɛlɛ,Na mebawula wɔ duma ne anyunlunyia dahuu, 13  Ɔluakɛ wɔ ɛlɔlɛ kpundii ne mɔɔ wɔ me nwo zo la le kpole,Yɛɛ wɔlie me ngoane* wɔvi Nla* ne abo nehane.+ 14  O Nyamenle, anwomemaazoma ɛdwazo ɛtia me;+Atisesebɛma ekpunli kpondɛ me ahu me,Na bɛmbu wɔ bie.*+ 15  Noko wɔmɔ, O Gyihova, ɛle Nyamenle mɔɔ ɛse anwunvɔne na ɛ kunlu yelɛyela wɔ,*Ɛkyɛ na wɔava ɛya yɛɛ ɛlɔlɛ kpundii nee nɔhalɛlilɛ* ɛyi wɔ tɛkɛɛ.+ 16  Kakyi ɛ nye nea me na maa menyia ɛ nyunlu ɛlolɛ.+ Maa wɔ sonvolɛ anwosesebɛ,+Na die wɔ akɛlɛ raalɛ ne ara ne. 17  Maa menwu wɔ kpalɛyɛlɛ ne anwo sɛkɛlɛneɛ,*Amaa bɛdabɛ mɔɔ bɛkyi me la anwu ye na bɛ nyunlu agua aze. Ɔluakɛ, O Gyihova, wɔmɔ a ɛle me boavolɛ nee me arɛlekyekyevolɛ a.

Ɔbodwɛkɛ

Anzɛɛ “ka ɛ nwo aze tie.”
Anzɛɛ “ɛkɛla.”
Anzɛɛ “wɔ sonvolɛ ɛkɛla.”
Anzɛɛ “memaa me ɛkɛla zo memaa wɔ.”
Anzɛɛ “Maa me ahonle mɔɔ anu ɛtɛkyɛle nwiɔ la.”
Anzɛɛ “ɛkɛla.”
Anzɛɛ “Sheol,” ɛhye kile, alesama nla. Nea Edwɛkɛbohilelɛ.
Anzɛɛ “bɛnva wɔ bɛnzie bɛ nyunlu.”
Anzɛɛ “ɛle dovolɛ.”
Anzɛɛ “nɔhalɛ.”
Anzɛɛ “daselɛ.”