Ɛze kpavolɛ anzɛɛ bɛlɛra bie mɔɔ lɛ ewule ɛzulolɛ bie mɔɔ bɛyɛ ye ayile a ɔngɔ ɔ? Asoo ɛlɛ ewule bie mɔɔ ɔmmaa ɛngola ɛnyɛ ninyɛne mɔɔ ɛ tipɛnema yɛ la bie ɔ?

Saa ɔle zɔ a, ɛnee ɔnle ɛtane kɛ ɔdwu mekɛ ne bie a ɛ sa nu to la. Noko akee, edwɛkɛ mɔɔ yɛ arɛlekyekyelɛ la nwiɔ bie wɔ Baebolo ne anu.

• Gyihova Nyamenle mɔɔ le wɔ Bɔvolɛ ne la ze wɔ ngyegyelɛ ne. Mɔɔ tɛla ɛhye la, ‘ɔdwenle ɛ nwo.’​—1 Pita 5:7.

• Gyihova Nyamenle bodane a le kɛ ɔbaye anwodolɛ kɔsɔɔti yeavi ɛkɛ! Ɛbahola wɔagenga ɛhye wɔ Baebolo ne anu wɔ Ayezaya 33:24 nee Yekile 21:1-4.

Mgbavolɛ nee mbɛlɛra dɔɔnwo mɔɔ lɛ ewule ngakyile la ɛnwu ye kɛ diedi mɔɔ bɛlɛ ye wɔ Nyamenle nee ye ɛwɔkɛ ne mɔ anu la ɛboa bɛ. Suzu neazo nna anwo.

•  YEIMY

•  MATTEO

•  BRUNA

•  ANDRÉ

Menyianle ɛvolɛ 11 la ɛnee mehyia wheelchair amaa meahola meahɔ ɛleka biala. Mengola menyɛ ninyɛne ngyikyi bie mɔ mɔɔ le kɛ memaa debie mɔɔ ɛnyɛ ɛnlomboɛ la zo.

Menyianle ɛvolɛ nnu la, bɛhanle kɛ menyia ewule bie mɔɔ maa bɛ ndinli nu toto la na ɛnee ɔmmaa mengola menyɛ ninyɛne bie mɔ. Ɔyɛ a me rɛle bɔ kɛ mengola menyɛ ninyɛne mɔɔ me gɔnwo mɔ kola yɛ la bie. Noko me awovolɛ nee me asafo ne anu amra ɛboa me wɔ nwonane nu, nganeɛdelɛ nu nee sunsum nu. Mele dahuu adekpakyelɛnli yɛɛ ɔyɛ na melɛkɔ meahɔyɛ Baebolo ɛzukoalɛ a, me gɔnwo mɔ Kilisienema bie mɔ nee me kɔ.

Gyisɛse hanle kɛ kenle ko biala lɛ ye adwenleadwenle ɛdeɛ. (Mateyu 6:34) Ɔti medwenle ɛnɛ ala anwo na menva ɛhyema memboka nwo, eza mefa bodane mɔɔ mebahola meadwu nwo la mesie me nye zo. Me nye la Nyamenle ewiade fofolɛ ne mɔɔ me sa baha “nɔhalɛ ngoane” mɔɔ ewule ɛzulolɛ ɛhye ɛnrɛdɛnla ɛkɛ la ade.​—1 Temɔte 6:19.

Dwenle ɛhye anwo: Yeimy ɛnwu kɛ saa “ɔfa bodane mɔɔ ɔbahola yeadwu nwo” la ɔsie ɔ nye zo a ɔboa ye kpalɛ. Kɛ ɔkɛyɛ na wɔahola wɔayɛ ɛhye bie ɛ?​—1 Kɔlentema 9:26.

Me nzi fofo me kpalɛ na menyianle ɛvolɛ nsia la yɛɛ ɔbɔle ɔ bo a. Mɔlebɛbo ne ɛnee dɔketama dwenle kɛ melɛnyi la ati a me nwo fofo me a. Noko wɔ ɛvolɛ ko anzi, bɛnwunle kɛ debie ɛnwu me nzi bowule ne anu.

Bɛyɛle me apelehyɛne, noko dɔketa ne angola anye deɛ ne amuala anvi ɛkɛ. Wɔ siane nwiɔ pɛ anzi, deɛ ne ziale yɛle kpole bieko kɛ ye dɛba ne ala la! Ɔvi zɔhane mekɛ ne too mɔɔ ba la, bɛyɛ me nuhua neɛnleanu dɔɔnwo, menlo nyile ngakyile yɛɛ me sa nu ɛdo fane dɔɔnwo.

Ɔdwu mekɛ ne bie a, deɛ ne mɔɔ ɛnwu me la fofo me kɛ asɛɛ bɛlɛfa dadeɛ bawowɔ me nzi nee me kɛnra zo la. Noko, mebɔ mɔdenle kɛ menrɛmaa tɛnlabelɛ ne ɛnrɛvo me nwo zo. Dahuu mekakye me nwo kɛ, menli gyɛne noko ɛlɛyia tɛnlabelɛ mɔɔ anu yɛ se la noko bɛlɛ adwenle kpalɛ. Debie mɔɔ ɛboa me ɛmaa menyia adwenle kpalɛ la a le kɛ melɛ anwodozo kɛ kenle ko dedee Gyihova Nyamenle bamaa ɛwɔkɛ mɔɔ yebɔ kɛ amaneɛnwunlɛ bo bapɛ la ara nu.​—Yekile 21:4.

Dwenle ɛhye anwo: Kɛzi ɛdwenle Nyamenle ɛwɔkɛ ne mɔ anwo a ɔbaboa wɔ yeamaa wɔagyinla amaneɛnwunlɛ nloa kɛ mɔɔ Matteo yɛle la ɛ?​—Ayezaya 65:17.

Kɛmɔ debie biala ɛnla ali kɛ mende kpɔkɛ la ati, bie mɔ badwenle kɛ mele mgbovonle. Ɔyɛ se kɛ mebayɛ debie biala bɔbɔ ninyɛne le kɛ, sua nu gyima, debiezukoalɛ, yɛɛ kɛ ɔkɛyɛ na meadwazo bɔbɔ la.

Menyianle ɛvolɛ 16 la, yɛɛ bɛnwunle kɛ menyia ewule anwo ɛzulolɛ bie mɔɔ ɔmaa bɛ avinli kpo na ɔka bɛ nye nee bɛ ɛdendɛlɛ la. Ewule ne yɛle kpole mɔɔ ɛnee mengola menyɛ gyima a yɛɛ eza mengola mengɔ daselɛlilɛ nee debiezukoalɛ kɛ mɔɔ ɛnee mekulo kɛ meyɛ la. Mengengale 1 Pita 5:7 mɔɔ ka kɛ: ‘Bɛva bɛ adwenleadwenle muala bɛgua Nyamenle anwo zo, ɔboalekɛ ɔdwenle bɛ nwo’ la fane dɔɔnwo. Mekɛ mɔɔ menwunle kɛ Gyihova dwenle yɛ nuhua ko biala anwo la, ɔmaanle me anwosesebɛ kpalɛ. Yemaa me anwosesebɛ too badwu ɛnɛ.

Dwenle ɛhye anwo: Nvasoɛ boni a ɛbanyia ye wɔ Gyihova mɔɔ ɛbava wɔ adwenleadwenle wɔgua ɔ nwo zo kɛ mɔɔ Bruna yɛle la ɛ?​—Edwɛndolɛ 55:22.

Bie mɔ yɛ me kɛ asɛɛ kakula bie mɔɔ ɛnyia ɛvolɛ 10 la. Tɛ bɛ nvonleɛ ɔ; ɔluakɛ ɛnwu me a kɛ mede la ɛne.

Menyianle ɛvolɛ nwiɔ la yɛɛ menyianle cancer bie mɔɔ ka bɛ nzi bowule nee adwenle ne la a. Dɔketama bɔle mɔdenle kɛ bɛbayɛ me ayile noko ayileyɛlɛ ne hanle me ɛnyinlɛ ne. Kɛkala, me tendenle le mita 1.37 pɛ! Saa meka kɛ menyia ɛvolɛ 18 a, menli dɔɔnwo dwenle kɛ melɛbɔ adalɛ.

Menli bu me kpalɛ wɔ yɛ Kilisiene asafo ne anu. Bɛnyɛ me kɛ mele kakula la kɛ mɔɔ mekɔ sukulu a ngakula ne mɔ yɛ me la. Mebɔ mɔdenle kɛ mebanyia tɛnlabelɛ ne anwo adwenle kpalɛ. Nɔhalɛ nu, menyia debie mɔɔ anwo hyia kpalɛ maa sonla dasanli biala la​—menwu Gyihova! Ɔnva nwo debie biala mɔɔ mebayia ye la, melɛ anwodozo kɛ Gyihova banlea me. Saa medwenle ewiade fofolɛ ne mɔɔ Gyihova Nyamenle ɛva ɛbɔ yɛ ɛwɔkɛ la anwo a, ɔmaa menyia adwenle kpalɛ.​—Ayezaya 33:24.

Dwenle ɛhye anwo: Nzɔne ati a André hanle kɛ Gyihova mɔɔ ɛbanwu ye la le “debie mɔɔ anwo hyia kpalɛ maa sonla dasanli biala la” ɛ?​—Dwɔn 17:3.