Ba Kopantšwe ke Lerato la go Rata Modimo

GE PHUTHEGO ya Bokriste e be e hlongwa lekgolong la pele la nywaga la Mehla ya rena e Tlwaetšwego, se sengwe sa dika tša yona tše di kgahlišago kudu—go sa šetšwe go se swane ga ditho tša yona—e be e le botee bja yona. Barapedi bao ba Modimo wa therešo ba be ba e-tšwa ditšhabeng tša Asia, Yuropa le Afrika. Ba be ba e-tšwa ditlogong tše di fapa-fapanego—baruti, bahlabani, makgoba, bafaladi, babapatši, ditsebi le bo-rakgwebo. Ba bangwe e be e le ba-Juda gomme ba bangwe e le ba-Ntle. Ba bantši e be e kile ya ba diotswa, basodoma, matagwa, mahodu goba bahlakodi. Lega go le bjalo, ge ba be ba e-ba Bakriste, ba ile ba tlogela mekgwa ya bona e mebe gomme ya ba batee tumelong.

Ke’ng se se ilego sa dira gore Bokriste bja lekgolong la pele bo kgone go kopanya batho ba ka moka gore e be batee? Ke ka baka la’ng ba be ba le khutšong seng sa bona gotee le batho ka kakaretšo? Ke ka baka la’ng ba sa ka ba tšea karolo borabeleng le dintweng? Ke ka baka la’ng Bokriste bja pele bo be bo fapane gakaakaa le madumedi a magolo a mehleng yeno?

Ke’ng se se Ilego sa Kopanya Ditho tša Phuthego?

Selo se segolo seo se ilego sa kopanya badumedi-gotee ba lekgolong la pele la nywaga e be e le lerato la go rata Modimo. Bakriste bao ba ile ba lemoga boikarabelo bja bona bjo bogolo bja gore  ba rate Modimo wa therešo, Jehofa, ka pelo ka moka, moya le monagano. Ka mohlala, moapostola Petro, yo e bego e le Mojuda, o ile a laelwa gore a etele legae la motho wa setšhaba se šele yoo ka tlwaelo a bego a ka se gwerane le yena. Selo se segolo se se ilego sa mo tutueletša go kwa taelo ye e be e le lerato la gagwe la go rata Jehofa. Petro le Bakriste ba bangwe ba pele ba be ba thabela tswalano ya kgaufsi le Modimo yeo e bego e theilwe tsebong e nepagetšego mabapi le semelo sa Gagwe, dilo tše a di ratago le tše a sa di ratego. Ge nako e dutše e e-ya, barapedi ka moka ba ile ba kwešiša gore e be e le thato ya Jehofa bakeng sa bona gore e “bê ba xo bapêlana, kxopolô è le e tee, kêlêlô è le e tee.”—1 Ba-Korinthe 1:10; Mateo 22:37; Ditiro 10:1-35.

Badumedi ba ile ba kopanywa ka mo go tšwelago pele ke tumelo ya bona go Jesu Kriste. Ba be ba nyaka go latela mehlala ya gagwe kgaufsi. O ba laetše gore: “Le ratanê byalo ka Nna xe ke Le ratile. Seo bohle ba tl’o xo tseba ka sôna xe Le le barutiwa ba-ka, ké xe Le na le leratanô.” (Johane 13:34, 35) Lerato le e be e swanetše go ba lerato la boikgafo, e sego maikwelo a nakwana. Mafelelo e be e tla ba afe? Jesu o ile a rapelela bao ba dumelago go yena ka gore: “Ke kxopêlêla . . . Xore bohle e bê batee, byalo ka xe Wene Tate Ò le xo Nna, le Nna kè le xo Wene. E bê batee ka rena.”—Johane 17:20, 21; 1 Petro 2:21.

Jehofa o ile a tšhollela moya wa gagwe o mokgethwa, goba matla a šomago, godimo ga bahlanka ba gagwe ba therešo. Moya wo o ile wa tšwetša pele botee gare ga bona. O ile wa dira gore ba kgone go kwešiša dithuto tša Beibele tšeo di bego di amogelega diphuthegong ka moka. Barapedi ba Jehofa ba ile ba bolela ka molaetša o swanago—go kgethagatšwa ga leina la Jehofa ka Mmušo wa Gagwe ka Mesia, e lego mmušo wa legodimong wo o tlago go buša batho ka moka. Bakriste ba pele ba be ba kwešiša boikarabelo bja bona bja gore e se be “ba lefase.” Ka go rialo, ge dintwa tša selegae goba tša bohlabani di tsoga, Bakriste ba be ba kgomarela boema-gare bja bona. Ba be ba phegelela khutšo le batho bohle.—Johane 14:26; 18:36; Mateo 6:9, 10; Ditiro 2:1-4; Ba-Roma 12:17-21.

Badumedi ka moka ba be ba kwešiša boikarabelo bja bona bja gore ba tšwele pele ba le boteeng. Bjang? Ka go kgonthišetša gore boitshwaro bja bona bo be bo dumelelana le Beibele. Ke ka baka leo moapostola Paulo a ilego a ngwalela Bakriste gore: “Apolang tše e lexo tša tsela ya kxalê, tša motho e motála,” gomme “le aparê motho e mofsa.”—Ba-Efeso 4:22-32.

Ba Kgomaretše Botee

Ke therešo gore badumedi ba lekgolong la pele la nywaga ba be ba sa phethagala, gomme go ile gwa rotoga maemo ao a bego a bea botee bja bona kotsing. Ka mohlala, Ditiro 6:1-6 e hlalosa ka phapano yeo e ilego ya rotoga magareng ga Bakriste ba ba-Juda bao ba bego ba bolela Segerika le bao ba bego ba bolela Sehebere. Bao ba bolelago Segerika ba be ba nagana gore ba a kgethollwa. Lega go le bjalo, ge baapostola ba se no tsebišwa ka bothata bjo, ba ile ba bo rarolla ka go akgofa le ka toka. Ka morago, potšišo ya mabapi le thuto ya bodumedi e ile ya dira gore go be le ngangišano mabapi le boikarabelo bja bao e sego ba-Juda ka phuthegong ya Bokriste. Go ile gwa fihlelelwa phetho ye e theilwego melaong ya motheo ya Beibele, gomme phetho ye e ile ya amogelwa ke bohle.—Ditiro 15:1-29.

Mehlala ye e bontšha gore diphapano ga se tša ka tša dira gore go be le dikarogano tša merafo goba go se kwane mo go bakilwego ke go kgomarela ka go tia dikgopolong tše itšego tša mabapi le dithuto tša bodumedi ka phuthegong ya Bokriste ya lekgolong la pele la nywaga. Ka baka la’ng? Ka gobane dilo tšeo di bego di dira gore ba be boteeng—lerato la go rata Jehofa, go ba le tumelo go Jesu Kriste, go ratana ka lerato la boikgafo, go  amogela tlhahlo ya moya o mokgethwa, go ba le kwešišo e swanago ka dithuto tša Beibele le go ikemišetša ga motho go fetola boitshwaro bja gagwe—e be e le tše matla ka mo go lekanego bakeng sa go boloka phuthego ya pele e le boteeng le khutšong.

Go ba Batee Borapeding Mehleng Yeno

Na botee bo ka fihlelelwa ka tsela e swanago lehono? Na dilo tše di swanago di sa dutše di ka dira gore batho bao ba lego tumelong e tee ba kopane gomme tša ba thuša gore ba be khutšong le merafo ka moka yeo e lego dikarolong ka moka tša lefase? Ee, di ka kgona! Dihlatse tša Jehofa ke tše di kopanego borwarreng bja lefase ka bophara bjo bo apareditšego dinageng, dihlakahlakeng le ditikologong tša ka godimo ga tše 230. Le gona di kopantšwe ke dilo tše di swanago le tšeo di bego di kopantše Bakriste ba lekgolong la pele la nywaga.

Selo seo se kgathago tema e kgolo boteeng bjo bjo bo thabelwago ke Dihlatse tša Jehofa ke boineelo bja tšona go Jehofa Modimo. Se se bolela gore di katanela go mmotegela maemong ka moka. Le gona Dihlatse tša Jehofa di bontšha tumelo go Jesu Kriste le dithutong tša gagwe. Bakriste ba ba bontšha lerato la boikgafo go badumedi-gotee le bona gommme ba ruta ka ditaba tše dibotse tše di swanago tša mabapi le Mmušo wa Modimo dinageng ka moka tšeo ba dirago boboledi go tšona. Ba thabela go bolela ka Mmušo wo go batho ba ditumelo ka moka, merafo, ditšhaba le dihlopha tša tša leago. Le gona Dihlatse tša Jehofa di kgomarela boema-gare ditabeng tša lefase, e lego seo se di thušago go kgotlelela dikgateletšo tša bopolitiki, tša setšo, tša leago le tša kgwebo tšeo di bakago karogano bathong. Dihlatse ka moka di amogela boikarabelo bja tšona bja go kgothaletša botee bathong ka go itshwara ka tsela yeo e dumelelanago le ditekanyetšo tša Beibele.

Botee bo Kgahla ba Bangwe

Gantši botee bjo bo be bo dutše bo kgahla batho bao e bego e se Dihlatse. Ka mohlala, Ilse * e kile ya ba moitlami wa mosadi wa Mokatholika yo a bego a dula lefelong la baitlami la Jeremane. Ke’ng se se ilego sa dira gore a rate Dihlatse tša Jehofa? Ilse o itše: “Ke batho ba kaone kudu ba ke ilego ka kopana le bona. Ga ba ye ntweng; ga ba dire selo seo se ka gobatšago motho le ge e le ofe. Ba nyaka go thuša batho gore ba phele ka lethabo paradeiseng ya lefaseng ka tlase ga Mmušo wa Modimo.”

Ke moka go na le Günther, yo e bego e le lešole la Jeremane leo le bego le rometšwe kua Fora nakong ya ntwa ya bobedi ya lefase. Ka letšatši le lengwe moruti wa Protestanta o ile a swara tirelo ya bodumedi bakeng sa mašole ao a bego a le sekgaong setee le Günther. Moruti o ile a rapelela ditšhegofatšo, tšhireletšo le phenyo. Ka morago ga tirelo, Günther o ile a newa kabelo ya go ba mohlapetši. Ka dibonela-kgole tša gagwe, o ile a bona madira a manaba a le ka lehlakoreng le lengwe la lefelo la ntwa le ona a le tirelong ya bodumedi yeo e bego e swerwe ke moruti. Günther ka morago o ile a bolela gore: “Mohlomongwe moruti yoo le yena o ile a rapelela ditšhegofatšo, tšhireletšo le phenyo. Ke ile ka ipotšiša gore go tla bjang gore dikereke tša Bokriste di be ka mahlakoreng a sa swanego ntweng e tee.” Dikgopolo tše di ile tša nwelela monaganong wa Günther. Ge ka morago a be a gahlana le Dihlatse tša Jehofa, tšeo di sa tšeego karolo ntweng, Günther o ile a ba karolo ya borwarre bja tšona bja lefase ka bophara.

Ashok le Feema e be e kile ya ba ditho tša bodumedi bjo bongwe bja ka Bohlabela. Ka ngwakong wa bona, ba be ba e-na le lefelo le le kgethegilego la modingwana. Ge bolwetši bjo šoro bo be bo hlasela lapa la bona, ba ile ba hlahloba bodumedi bja bona lefsa. Poledišanong ya bona le Dihlatse tša Jehofa, Ashok le Feema ba ile ba kgahlwa ke dithuto tša Beibele le lerato leo le lego gona magareng ga Dihlatse. Mo nakong ye ke bagoeledi ba mafolofolo ba ditaba tše dibotse tša Mmušo wa Jehofa.

Ilse, Günther, Ashok le Feema ba boteeng le Dihlatse tša Jehofa tše dimilione borwarreng bja lefase ka bophara. Ba dumela gore kholofetšo ya Beibele ya gore selo seo se ba dirago gore ba be batee borapeding lehono se tla tloga se ba dira gore ba be boteeng le batho ka moka bao ba kwago. Ke moka, go ka se sa ba le ditiro tše šoro, go se kwane le dikarogano leineng la bodumedi. Lefase ka moka le tla ba le kopane borapeding bja Modimo wa therešo, Jehofa.—Kutollo 21:4, 5.

[Mongwalo wa tlase]

[Diswantšho go letlakala 4, 5]

Le ge ba be ba e-tšwa ditlogong tše di fapa-fapanego, Bakriste ba pele ba be ba le boteeng