“Kemaj onikitak se ueyixtikaj trono ne iluikak, niman ipan on ueyixtikaj trono akinonon yeuatikatka. Niman on yejuan ipan on trono yeuatikatka, petlantikatka ken itlaj tetl yejuan kualtetsin itoka jaspe niman cornalina. Niman on trono kiyeualojtikatka se kosemalotl, niman on kosemalotl petlantikatka xoxojki ken on tetl itoka Esmeralda” (Apocalipsis [Revelación] 4:2, 3).

“Kentla akosamalotl ipan se moxtli ijkuak kiyaui. Ijkon nesiya tlauijli tlen petlani iyeualiyan. Yejon tlen nesiya katka ken iueyilis Jehová” (Ezequiel 1:27, 28).

Yejon tlatlachalistin tlen okitak apóstol Juan niman teotlajtoketl Ezequiel, teititiaj kenon iueyilis Jehová, toTajtsin akin Ueyixtika, ika tlemach tlen uelis tikasikamatiskej: kualtsitsintin temej, se akosamalotl niman se ueyi “trono”. Nochi yejuin teititiaj ika kampa nemi melak kualtsin niman onka yolseuilistli.

Yejuin ome tlatlachalistin kijtouaj itlaj itech toTajtsin ijkon ken okijkuilo salmista: “Jehová yejua ueyi niman kinamiki makiueyichiuakan. Yejua melak kimojkaitaj xijkon ken nochimej oksekimej tajtsitsintin. Pampa nochimej intajtsitsinuan kalpamej xtlaj ika tepaleuiyaj; san ika, Jehová, yejua okinchijchiuj iluikamej. Kampa nemi onka ueyilistli niman melak tlakualtsinkan; chikaualistli niman tlen kualtsin onka kampa kiueyichiuaj” (Salmo 96:4-6).

Maski Jehová yejua akin Ueyixtika, technotsa matonisiuikan itech niman matiknotsakan. Niman kuajli tikmatstoskej ika techkakis (Salmo 65:2). ToTajtsin techtlasojtla niman najmana topampa. Apóstol Juan okijto ika “Dios yejua tetlajsojtlalistli” (1 Juan 4:8).

“Espíritu Santo nochi ika kiyekanaya Esteban, niman yejua ontlachix ne iluikak niman okitak iueyilis Dios, niman Jesús ompa ijkatikatka iyekmakopa Dios. ljkuakon okijtoj: ¡Xkitakan! Nejua nikita on iluikak tlapojtikaj, niman yejua on yejuan onochiu Tlakatl ompa ijkatikaj iyekmakopa Dios” (Hechos 7:55, 56).

Ijkuak xikitaya Esteban yejuin tlatlachalistli, tlayekankej judíos akin imiuan tlajtouaya okinejnemilijkej kenon mamiki Jesús. Ika tlen okitak okasikamat ika Jesucristo yoyoliujka, ika oksejpa nemiya niman aman yejua kipiaya ueyilistli. Itech yejuin Pablo okijkuilo: “[Jehová] oketsteu Cristo ipan itlalkon, niman okitlalij iyekmakopa ne iluikak. Aman Cristo kinnauatia nochimej on yejuan tlayekankej, nochimej on yejuan tekiuajkej, nochimej on yejuan kipiaj poder, nochimej on yejuan uejueyixtokej niman nochimej on yejuan san tlinon ika ueliskej noteneuaskej ipan in tonaltin niman no ipan on tonaltin uajlas” (Efesios 1:20, 21).

Ipan Biblia xsan kijtoua ika Jesús nemi melak tlakpak, noijki kijtoua ika yejua melak techtlasojtla, ijkon ken itaj Jehová. Ijkuak yejua nemiya ipan tlaltikpaktli, okinpajti akin kualouayaj niman okinkuiteuj akin yomijkaj. Noijki ijkuak okitemakak inemilis, okiteititi ika melak kitlasojtlaya toTajtsin niman tlaltikpakchanejkej (Efesios 2:4, 5). Aman nemi  nisiuj itech itaj, itech iyekmakopa, niman sa achijtsin poliui ika tlanauatijkayotl tlen kipiya kuajkuis tlateochiualistin inpampa akin tetlakamatij ipan nochi tlaltikpaktli.

“Nejua [teotlajtoketl Daniel] ok nikitstoya hasta ijkuak onotlalijkej kampa notlaliaj akin tlanauatiaj niman Akin yeuejkaui itech Tonaltin onotlali. Nemiyaj se mil miyekpa ika mil xnokajkauayaj ika kitekichiuiliayaj, niman matlaktli mil miyekpa ika matlaktli mil akin ijkatoyaj ixpan yejua” (Daniel 7:9, 10).

Yejuin tlatlachalistli onochiuj ipan iluikak, Daniel xokitak san se iluikaktekitketl okimitak melak miyekej. ¡Melak temojkatlachialti tlen okitak! Iluikaktekitkej xueli tikimitaj, yejuamej kipiyaj kojtilistli niman tlamachilistli. Niman tekitl tlen kichiuaj xsa noijki, pampa nemij serafines niman querubines. Ipan Biblia noteneua iluikaktekitkej kanaj ipantsin 250.

Iluikaktekitkej xijkon ken tlaltikpakchanejkej. ToTajtsin okinchijchiuj ijkuak xikinchijchiuaya tlaltikpakchanejkej. Ijkuak okichijchiuj tlaltikpaktli, iluikaktekitkej melak kinekiyaj kitaskej kenon nochiua niman melak opajkej (Job 38:4-7).

Iluikaktekitkej kipaleuiyaj toTajtsin itech tekitl tlen melak ueyi kijtosneki tlen nochiua ipan yejuin tonajli: tenojnotsalistli itech kuajli tlajtoltin itech iTekiuajyo toTajtsin (Mateo 24:14). Ijkon tikmatij pampa ipan se tlatlachalistli tlen okitak apóstol Juan okijkuilo yejuin: “Kemaj onikitak okse iluikaktekitketl patlantinemiya ne ixko on cielo. Yejua kitkiya on temachtilistli yejuan para nochipa kitemaka on temakixtilistli. Yejua kitkiya para kimijlis on yejuan chanejkej ipan in tlaltikpaktli, ipan nochi país, nochi raza, ipan nochi pueblo, niman no kimijlis nochi kech sesetlamantik tlajtoltin” (Apocalipsis 14:6). Maski iluikaktekitkej xok tlajtouaj iuan tlaltikpakchanejkej ken yeuejkaui, kinyekanaj akin tenojnotsaj makinnextikan tlaltikpakchanejkej akin kipiyaj kuajli inyojlo.

“Niman ne iluikak onochiu se guerra. On yakatstikaj iluikaktekitketl itoka Miguel [Jesucristo] niman iiluikaktekitkauan onouijsokej iuan on dragón niman on iluikaktekitkej yejuan aman kitekipanouaj on diablo. Pero on dragón niman on iluikaktekitkej yejuan aman kitekipanouaj on diablo xouelkej otetlankej. Yejua ika,  tej, xok ouel onenkej ne iluikak. Ijkon tej, on ueyi dragón okuajkixtijkej ne iluikak. On dragón sa no yejua on yeuejkaui kouatl yejuan okajkayau nochi tlakatl chanej ipan in tlaltikpaktli. Yejua itoka diablo noso Satanás. Yejua, tej, niman iiluikaktekitkauan yejuan aman kitekipanouaj okinuajxinijkej ipan in tlaltikpaktli” (Apocalipsis 12:7-9).

Ijkuak kemach opeuj nemij tlaltikpakchanejkej, se iluikaktekitketl melak okinek yejua makiueyichiuakan niman okixnamik toTajtsin. Ika yejon, onokuep Satanás tlen kijtosneki “teixnamijketl”. Kuakon ipan iluikak xnochipa onkatka yolseuilistli. Ika tlayekapan, oksekimej iluikaktekitkej onosentlalijkej iuan Satanás akin onoixmatkej ken espíritus xkuakualtin. Yejuamej melak xkuakualtin niman ika nochi inkojtilis melak kixnamikij toTajtsin. Yokichiujkej ika melak miyekej tlaltikpakchanejkej maka makinekikan makinyekana Jehová.

Satanás niman espíritus xkuakualtin melak tetlajyouiltiaj niman kintlauelitaj tlaltikpakchanejkej. Ika yejon, yejuamej kipiyaj tlajtlakojli ika onka tlajyouilistli ipan tlaltikpaktli. San xnemili tlen opanok yeuejkaui, Satanás okimikti nochi iyolkauan niman itlakeualuan Job, se tlakatl akin kitekichiuiliaya Jehová. Sakin okichiuj mauajla se chikauak ajakatl tlen okichiuj makitlajkali kajli kampa nemiyaj majtlaktli ikoneuan niman ijkon nochimej omijkej. Niman xsan yejon, noijki okichiuj ika Job makajsi se xkuajli kokolistli ipan nochi itlalnakayo (Job 1:7-19; 2:7).

San ika, Satanás xok uejkaujtipan nemis. Ijkuak okuajtlakalkej ipan tlaltikpaktli ika tlayekapan, kimatstika “ika xok uejkajtikaj kiselis icastigo” (Apocalipsis 12:12). Kema, ijkon ipan nochiuas. Niman techpaktia tikmatiskej yejuin.

“Tejua [...] otitechkou [Jesús] para otitechteyaxkatij itech Dios. Tlakamej de nochimej razas, nochi kech sesetlamantikej tlajtoltin, nochi pueblos niman nochi países otikinkou para Dios. Niman otitechtlalij ken reyes niman tiopixkej para tiktekichiuiliskej Dios niman tejuamej titlanauatiskej ipan tlaltikpaktli” (Apocalipsis 5:9, 10).

Ijkon ken Jesús oyoliuj niman ijkon nemi ipan iluikak, oksekimej noijki ijkon yes. Jesús okimijli itlatitlankauan: “Aman, tej, niau para nikonyektlalis ne kampa nemonchantiskej. [...] Oksejpa niuajlas para nemechuikas para nemejuamej no nennmiskej kampa nejua ninemis” (Juan 14:2, 3).

Akin yaskej iluikak nemiskej iuan Jesucristo ipan se tekiuajyotl tlen onka iluikak, tekiuajyotl tlen kiyekanas nochi tlaltikpaktli niman kinteochiuas nochimej tlaltikpakchanejkej. Yejuin Tekiuajyotl tlen Jesús okimijli inomachtijkauan makitlajtlanikan ijkuak kichiuaskiaj yejuin teoyotl: “ToTajtsin akin tinemi ne iluikak, machipaui motoka. Mauajla motekiuajyo. Manochiua nikan ipan tlaltikpaktli tlen tejua tikneki, ijkon ken nochiua ne iluikak” (Mateo 6:9, 10, TNM).

“Niman [apóstol Juan okikak] se chikauak tlajtojli yejuan ualeuaya ne iluikak okijtoj: Xkita, aman intsajlan on tlakamej chanti Dios. [...] Dios kimpopolouilis nochi ajmantli, niman xok onyas mikilistli, nion chokistli, nion ajmantli, nion kokolistli, pampa nochi tlen achtoj onkatka yopanok” (Apocalipsis 21:3, 4).

Yejuin se tlatlachalistli tlen tlajtoua ijkuak iTekiuajyo toTajtsin, kampa Jesús niman akin yoliuiskej iluikak tlanauatiskej, kipopolos tlen kiyekana Satanás niman kikuepas yejuin tlaltikpaktli se xochitlalpan. Nochi tlen kintlajyouiltia niman tlen kinkokoua tlaltikpakchanejkej popoliuis. Hasta mikilistli xok onias.

San ika, ¿tlenon panos iuan melak miyekej akin yomijkej niman xyaskej iluikak? Yejuamej oksejpa nemiskej ipan tlaltikpaktli niman yolpakiskej ijkuak yes se xochitlalpan (Lucas 23:43, TNM).