Ombiimbeli inayi popya kombinga yokuhila omakaya * nenge yomikalo dhilwe dhokulongitha omakaya. Nonando ongawo, oyi na omakotampango ngoka taga popi kutya Kalunga ina hokwa omikalondjigilile inaadhi yogoka, naashika otashi ulike kutya okuhila omakaya eyono.

• Okusimaneka omwenyo. “Kalunga . . . oye mwene ha pe aantu ayehe omwenyo nomufudho.” (Iilonga 17:24, 25) Molwaashoka omwenyo ogu li omagano ga za kuKalunga, katu na okuninga sha shoka tashi vulu okufupipika onkalamwenyo yetu, ngaashi okuhila omakaya. Okuhila omakaya oku li shimwe shomiinima iinene mbyoka hayi etitha eso.

• Okuhola aantu ooyakwetu. “Hola mukweni ngaashi ngoye wi ihole mwene.” (Mateus 22:39) Okuhila omakaya mokati kaantu, ohaku ulike kutya ku na ohole. Aantu mboka haya kala popepi naamboka taya hili omakaya, olundji ohaya kwatwa kuuvu wa faathana naamboka waahili yomakaya.

• Okukala aayapuki. “Igandjeni ne yene kuKalunga eyambo li na omwenyo, mu kale mwe mu iyapulila, ne mu kale mwe mu opalela.” (Aaroma 12:1) “Natu iyogeni shaa shoka tashi nyateke olutu nenge omwenyo. Tu lalakaneni wo okukala aayapuki, tse tu tile Omuwa.” (2 Aakorinto 7:1) Okuhila omakaya inaku yogoka noitaku vulu okuyelekanithwa nokukala omuyapuki — oshoka okukala omuyapuki otashi ti okukala wa yela waa na okantongo kasha. Mboka haya hili omakaya, ohaya tula uuzigo momalutu gawo, mboka hawu ga nkundipaleke.

Ombiimbeli inayi popya shi na ko nasha nepangwe nenge niingangamithi yilwe. Ihe oyi na omakotampango ngoka taga indike okulongitha iingangamithi mbyoka hayi piki aantu. Kakele komakotampango ngoka ga popiwa metetekelo, ngaka taga landula otaga longo wo:

• Okupangela okudhiladhila kwetu. ‘Hola Omuwa Kalunga koye nomadhiladhilo goye agehe.’ (Mateus 22:37, 38) “Kaleni mwa tonata.” (1 Petrus 1:13) Omuntu iha vulu naanaa okupangela omadhiladhilo ge, uuna ta longitha iingangamithi, naantu oyendji oya pikwa nokuli kuyo. Ohaya kala owala taya dhiladhila nkene ye na oku yi imonena nankene ye na oku yi longitha, pehala lyokudhiladhila iinima mbyoka tayi tungu. — Aafilippi 4:8.

• Okuvulika koompango dhoshilongo. “Vulika kaaleli nokaapangeli.” (Titus 3:1) Miilongo oyindji omu na oompango ndhoka hadhi indike sha kwata miiti okulongitha iingangamithi yontumba. Ngele otwa hala okukala twa hokiwa kuKalunga, otu na okuvulika kaapangeli. — Aaroma 13:1.