Omumwatate Geoffrey Jackson moshipopiwa she tashi tsu omukumo, shoka a li a gandja mokavidio oka-6 kOmatseyitho okuza kOlutuwiliki gomo 2020, okwa tile: “Omimvo dha ka dhilongela katwa li hatu dhiladhila ngele onatu ka mone iikulya yopambepo okupitila kepandja lyokointaneta.” Mbela ito tsu kumwe noohapu ndhono? Okwa tsikile ko a ti: “Ihe ngashingeyi ohatu ipula kutya ando kapwa li opolohalama yo-JW Library, iikulya yopambepo ando ohatu yi mono ngiini? Osha yela kutya Jehova okwa kala noku tu longekidha uule womimvo, opo tu vule okupita monkalo ngaashi ndjika.”

 Jehova okwa kala noku tu longekidha ngiini? Opolohalama yo-JW Library oya li ya ndulukwa po ngiini, noshike hashi ningwa po, opo yi kale tayi longo nawa noku yi kaleka po?

 MuMei 2013, Olutuwiliki olwa li lwa pula oshikondo shokunduluka po oopolohalama hashi ithanwa MEPS, shokoombelewa dhetu oonene muuyuni awuhe, shi tote po opolohalama ndjoka yi na Ombiimbeli yo-New World Translation ya pupalekwa. Omumwatate Paul Willies, ngoka ha longo koshikondo shokunduluka po oopolohalama dho-MEPS, okwa ti: “Ethimbo ndyono katwa li nando tu na opolohalama hayi vulu okulongithwa mongodhi. Ihe otwa li twa toto po osipana, e tatu etha po iilonga yilwe, opo tu vule okutameka okulonga pamwe niikondo yilwe tu tote po opolohalama ndjoka naashihe shoka sha kwatelwa mo. Otwa kala aluhe hatu galikana, nokekwatho lyaJehova, konima owala yoomwedhi ntano, otwa li twa vulu okupititha opolohalama ndjoka pokugongala kwokomumvo.”

 Shimwe ishewe, osha li oshidhigu okutota po opolohalama ndjoka yi na iileshomwa oyindji noyi li wo momalaka ogendji. MuJanuali 2015, iileshomwa yetu oyindji mbyoka tu na kunena oya li ko owala mOshiingilisa, ihe konima owala yoomwedhi hamano, oya li wo ya tulwa ko momalaka galwe ogendji.

 Okuza mpono aamwatate oya tsikile okuhwepopaleka opolohalama ndjoka momikalo dhi ili nodhi ili, sho ya gwedha mo uuvidio, noya tula mo iileshomwa nosho wo iileshomwa ayihe mbyoka hatu longitha pokugongala pehala limwe alike, nohashi kwathele mboka haye yi longitha ya vule okukonga uuyelele mEmbo lyokukonga uuyelele, uuna wa thindi povelise yontumba.

 Esiku kehe opolohalama yo-JW Library ohayi longithwa kiikwaelektronika yi vulithe pomamiliyona 8, omanga momwedhi kehe hayi kondo pomamiliyona 15. Oshike sha pumbiwa, opo opolohalama ndjoka yi longe nuupu miikwaelektronika mbyoka? Omumwatate Willies okwe shi yelitha a ti: “Opolohalama yomongodhi ihayi pu naanaa okulongwa. Otatu tsikile oku yi longa nokugwedha mo iinima iipe, opo yi kale ompu okulongithwa. Molwaashoka omahangano ngoka haga longo iikwaelektronika ohaga lundulula omukalo moka hayi longo ethimbo nethimbo, olundji otu na okukala tatu yi pepaleke, opo yi tsikile okulonga nuupu miikwaelektronika yi ili noyi ili. Ohatu kaleke po nokuhwepopaleka wo oopolohalama dhetu, sho iileshomwa niinima ya kwatwa momawi mbyoka yi li ko-JW Library tayi tsikile nokwiindjipala.” Iileshomwa mbyoka ya tolokwa momalaka agehe ngashingeyi ko-JW Library, oyi li ko yi thike 200 000 lwaampono, omanga mbyoka ya kwatwa momawi nosho wo uuvidio yi vulithe 600 000.

 Opo o-JW Library yi kale tayi longo nawa, opwa pumbiwa iinima oyindji. Opwa pumbiwa ishewe oopolohalama dhimwe dhomokompiuta ndhoka hadhi landwa. Olisinisa yimwe owala ohayi kotha N$21 000 lwaampoka komumvo. Shimwe ishewe, oshikondo shokunduluka oopolohalama ohashi longitha N$145 000 lwaampono omumvo kehe miikwaelektronika mbyoka ya za komahangano gi ili nogi ili, shi shilipaleke kutya o-JW Library otayi longo mookompiuta, muutableta nomoongodhi ndhoka oompe.

 Molwaashoka ngashingeyi otu na o-JW Library ihatu longitha we iimaliwa oyindji mokupilinta, mokutula kumwe omambo nosho wo mokutuma iileshomwa. Pashiholelwa, opwa li pwa pilintwa uumbo, Konakona Omanyolo esiku kehe—2013 wu li omamiliyona 12 lwaampono. Ihe uumbo womo 2020, otwa li owala twa pilinta omamiliyona gatano lwaampono, nonando omwaalu gwaauvithi muuyuni awuhe ogwa li gwi indjipala naantu 700 000 lwaampono. Omolwashike pwa li pwa ningwa elunduluko ndyono? Aamwatate naamwameme oyendji ngashingeyi ohaya lesha enyolo lyesiku ko-JW Library. a

 Opolohalama yo-JW Library ohayi kwathele wo aantu momikalo dhi ili nodhi ili. Genevièvea, ngoka ha zi moKanada oku uvite kutya opolohalama ndjoka ohayi mu kwathele a kale ha ningi ekonakono lye lyopaumwene pandjigilile. Okwa ti: “Oku shi popya paulelalela, andola onda li handi gongele omambo agehe ngoka nda pumbwa, ando kandi wete handi vulu okukonakona kehe esiku ongula onene. Ihe sho tu na o-JW Library, ohandi kutha owala okatableta kandje moka mu na omambo agehe ngoka nda pumbwa. Ekonakono ndika lyopandjigilile olya koleke eitaalo lyandje nolya hedhitha ndje popepi naJehova.”

 Opolohalama ndjoka oyi li lela ekwatho enene, unene tuu pethimbo ndika lyo-COVID-19. Charlyn, ha zi moAmerika, okwa ti: “Okuza sho omukithi gwo-Corona gwa tukuka muuyuni awuhe, inandi mona nando oshileshomwa shetu oshipe sha pilintwa momukokomoko gwomumvo aguhe. Ihe opolohalama yo-JW Library oyi na kehe shimwe shoka twa pumbwa, opo tu kaleke eitaalo lyetu lya kola, nohandi pandula Jehova omolwesiloshimpwiyu ndyoka lyopahole.”

 Faye, ha zi moFilipine okwa popi nkene oyendji haya kala ye uvite. Okwa ti: “Ohandi longitha opolohalama ndjika, opo ndi kale popepi naJehova. Oko handi lesha enyolo lyesiku ongula kehe. Oko wo handi pulakene uuimbilo wandje. Oko handi ilongekidhile okugongala. Oko handi ilongekidha ekonakonombiimbeli lyandje lyopaumwene. Oko handi tala uuvidio uuna inaandi ipyakidhila. Oko wo handi lesha iifo nenge Ombiimbeli uuna ndi li momukweyo. Ondi yi hole noonkondo.”

 Opolohalama ndjoka ompu wo okulongithwa muukalele. Pashiholelwa, omumwameme gumwe gwomoKamerun okwa li a hala okulongitha enyolo limwe ndjoka a mona omumwameme gumwe e li longitha iiwike yontumba ya piti. Ihe ka li ta dhimbulukwa kutya oli li peni. Okwa ti: “Lagwenene, onda dhimbulukwa uutumbulilo wumwe mboka wu li mo. Onda patulula opolohalama ndjoka, tandi thindi pOmbiimbeli e tandi kongo uutumbulilo mboka. Nziyanziya, onde li mono. Opolohalama ndjoka ohayi kwathele ndje ndi vule okumona omanyolo ogendji ngoka omathimbo gamwe handi kala nda dhimbwa.”

 Omayambidhidho goye ngoka ho gandja nehalo ewanawa, to longitha omikalo dhi ili nodhi ili ndhoka dhi li kepandja donate.jw.org, ohage tu kwathele tu kaleke po, tu kwatele po notu hwepopaleke opolohalama yo-JW Library ndjoka hayi longithwa kaamwatate naamwameme muuyuni awuhe. Otwa pandula unene ombepo yoye yokugandja.

1. MuKotoba 2013, kopolohalama hoka okwa li kwa pitithwa Ombiimbeli ya pupalekwa yo-New World Translation

2. MuJanuali 2015, okwa tulwa iileshomwa yimwe yOshiingilisa nosho wo yomalaka galwe ogendji

3. MuNovomba 2015, oya pepalekwa, opo aantu ya kale haya vulu okutenda omayamukulo

4. MuMei 2016, okwa gwedhwa okakololo ke na ko nasha niinima yokugongala

5. MuMei 2017, oya pepalekwa, opo mu kale tamu vulu okutulwa omatyokosha

6. MuDesemba 2017, okwa gwedhwa wo Ombiimbeli yOshiingilisa yokukonakonwa

7. MuMaalitsa 2019, okwa li kwa gwedhwa uuyelele wankene to vulu okutapa iileshomwa mbyoka ya kwatwa momawi, nkene to vulu okupulakena uuvidio inoo wu tapa ko nosho wo okukonga omauyelele mEmbo lyokukonga uuyelele

8. MuJanuali 2021, opolohalama oya pepalekwa, opo ku vule okutulwa embo Kala nonkalamwenyo ombwanawa sigo aluhe