Jesus okwa li a lombwele aalongwa ye a ti: “One otamu ka ninga oonzapo dhokuhokolola ndje . . . sigo omiilongo ayihe yokombanda yevi.” (Iilonga 1:8) Kunena, Oonzapo dhaJehova otadhi gwanitha po elombwelo ndyoka nuulaadhi. Ihe iitopolwa yimwe iinene kombanda yevi, mwa kwatelwa naambyoka yi na aantu oyendji inayi uvithilwa nawanawa natango. Momiilongo yimwe omu na Oonzapo oonshona noonkondo. (Mateus 9:37, 38) Mbela ohatu ningi po shike, opo tu uvithile aantu oyendji ngaashi tashi vulika?

 Opo tu vulike koshipango shaJesus, Okomitiye yIilonga yOlutuwiliki lwOonzapo dhaJehova ohayi tumine aatumwa kiitopolwa hoka ku na ompumbwe muuyuni awuhe. Sho tatu popi ngeyi, opu na aatumwa 3 090 muuyuni awuhe. a Oyendji yomuyo oya mona edheulo kosikola yOmbiimbeli, ngaashi kOsikola yAauvithi yUukwaniilwa. Aatumwa ohaya thigi po omagumbo gawo nehalo ewanawa nokutembukila kiilongo kaayi shi yawo. Molwaashoka aatumwa mbaka aadhiginini oye na ekwatathano lya kola naJehova, oya mona edheulo noye na owino, oya kwathela mokutaandelitha onkundana ombwanawa noya tulila po aalongwa aape oshiholelwa oshiwanawa.

 Koshitayimbelewa kehe, Oshikondo shIilonga yAauvithi yIikalekelwa ohashi longele kumwe nOkomitiye yOshitayimbelewa, opo ya sile oshimpwiyu aatumwa. Ohashi shilipaleke kutya oye na omagumbo ge li nawa, oya mona epango li li nawa nosho wo okamaliwa kokulanda iipumbiwa yawo nokufuta iinima yilwe. Momukokomoko gwomumvo gwiilonga gwo 2020, Oonzapo dhaJehova odha longitha konyala oodola dhaNamibia 402 489 000 dhi sile oshimpwiyu aatumwa. Omolwesiloshimpwiyu ndyoka, aatumwa ohaya vulu okugandja eitulomo nokulongitha oonkondo dhawo miilonga yokuuvitha nosho wo okukoleka omagongalo miitopolwa moka ye li.

 Aatumwa oya kwathela ngiini miilonga yokuuvitha? Frank Madsen, oshilyo shOkomitiye koshitayimbelewa shaMalawi ota ti: “Omolwuulaadhi nowino yawo, aatumwa oya kwathela omagongalo ga tameke okuuvithila miitopolwa moka hamu uvithilwa nuudhigu, ngaashi momahala moka ihaamu yiwa nuupu nenge miitopolwa moka hamu popiwa omalaka omakwiilongo. Natango, molwaashoka ohaya longo nuudhiginini yi ilonge elaka lyomoshitopolwa nomuthigululwakalo gwamo, ohaya tsu omukumo yalwe nohaya kwathele aagundjuka yi itulile po omalalakano gokuya miilonga yethimbo lyuudha. Ohatu pandula Jehova sho tu na aatumwa.”

 Oshilyo shOkomitiye yOshitayimbelewa shokoshilongo shilwe, osha ti: “Aatumwa oya ulika kutya oshigwana shaJehova osha hangana muuyuni awuhe. Nokuli naamboka kaaye shi Oonzapo, oye shi mona mo kutya inatu topoka pamihoko, ihe Ombiimbeli oye tu kwathela tu kale twa hangana.”

 Aatumwa ohaya kwathele ngiini aauvithi yomoshitopolwa? Paulo gwokoTimor-Leste okwa nyanyukwa sho megongalo lyawo mu na aatumwa. Okwa ti: “Oshitopolwa shetu osha pupyala noonkondo. Ihe nonando aatumwa mbaka oya za koshitopolwa kwa talala, ihaya etha onkalo yombepo ndjika yi ya imbe okuuvitha. Ongula kehe opo haya kala aluhe pelongekidho lyiilonga yomomapya. Ohandi ya mono olundji taya ningi omaishunoko moshanga shomutenya nosho wo kongulohi. Oya kwathela aantu oyendji yi ilonge oshili, nangame nda kwatelwa mo. Ohaya longitha onkalamwenyo yawo ayihe ya longele Jehova nuulaadhi nonomukumo, naashika ohashi inyengitha egongalo alihe li longele Jehova nuudhiginini.”

 Ketti, omukokolindjila gwondjigilile gwokoMalawi, okwa popi nkene aaihokani aatumwa ya li ya kwathele aanegumbo ye, a ti: “Sho ya tuminwa kegongalo lyetu, ongame owala nda li Onzapo maandjetu. Ihe aaihokani mbaka oya ambidhidha ndje noya li ya panga uukuume wopothingo noyaandjetu. Oshiholelwa shawo oshiwanawa osha kwathele aamwandje ya mone nkene okulongela Jehova haku etele omuntu enyanyu nonkalamwenyo yi li nawa. Omolwoshiholelwa shawo oshiwanawa, ngashingeyi aamwandjekadhona yatatu oye li aakokolindjila yondjigilile nomusamane gwandje okwa tameka okuya kokugongala.”

 Iimaliwa mbyoka hayi kwathele aatumwa ohayi zi peni? Ohayi zi momayambidhidho giilonga yomuuyuni awuhe, ngoka haga gandjwa okupitila momikalo dha yoolokathana ndhoka dhi li ko-donate.jw.org. Otwa pandula noonkondo komayambidhidho geni gehalo ewanawa.