1, 2. (a) Jesus okwi indile shike megalikano lye lyahugunina pamwe naayapostoli ye? (b) Omolwashike Jesus tashi vulika a li ti ipula kombinga yuukumwe?

JESUS okwa li ti ipula unene kombinga yuukumwe, pethimbo ta li uulalelo we wahugunina pamwe naayapostoli ye. Sho a galikana pamwe nayo, okwi indile kutya okwa hala aalongwa ye ayehe ya kale omuntu gumwe, ngaashi ye naHe. (Lesha Johannes 17:20, 21.) Uukumwe wawo owa li tawu ka gandja uumbangi wa yela kutya Jesus okwa li a tumwa kombanda yevi kuJehova a longe ehalo Lye. Ohole oyo ya li tayi ka ndhindhilikitha mo aalongwa yaJesus yashili noku ya kwathela ya kale muukumwe. — Joh. 13:34, 35.

² Oshi shi okuuviwa ko, sho Jesus a tsu omuthindo uukumwe. Puulalelo we wahugunina, Jesus okwe shi mono mo kutya aayapostoli ye kaye na uukumwe nenge tu tye elongelokumwe. Omanga taya li, oya kala taya nyenyeta kutya “olye ngoka e na okutalwa omukuluntu e vule ooyakwawo ayehe,” ngaashi ya kala haye shi ningi shito. (Luk. 22:24-27; Mark. 9:33, 34) Oshikando shimwe, Jakob naJohannes oya li ya pula Jesus, opo e ya pe oondondo dha simana mUukwaniilwa we. — Mark. 10:35-40.

3. Iinima yini ya li ya yono po uukumwe mokati kaalongwa yaJesus, nomapulo geni tatu ka kundathana?

 ³ Okulalakanena oondondo hako akuke kwa li kwa yono po uukumwe mokati kaalongwa yaKristus. Uutondwe nosho wo okatongo oya kala nokutopola aantu pethimbo lyaJesus. Aalongwa ye oya li ye na okukondjitha oshinima shoka. Moshitopolwa shika otatu ka kundathana omapulo taga landula: Jesus okwa li u ungaunga ngiini nokatongo? Okwa li a kwathele ngiini aalanduli ye, opo ye ekelehi iikala yokakombo noludhi nokukala ya hangana lela? Elongo lye otali tu kwathele ngiini tu tsikile okukala twa hangana?

4. Iiholelwa yini tayi ulike kutya Jesus okwa li a ningwa okatongo?

⁴ Aantu yamwe oya li yu ungaunga naJesus nokatongo. Sho Filippus a lombwele Natanael kutya okwa mona Mesiasa, Natanael okwa yamukula a ti: “MuNasaret otamu vulu tuu okuza uuwanawa washa?” (Joh. 1:46) Otashi vulika Natanael a li e shi ehunganeko ndyoka li li muMika 5:2, nokwa li a tala Nasaret omukunda omushona unene nokuza Mesiasa. Aajuda aanamadhina oya li wo ya dhina Jesus, oshoka okwa li Omugalilea. (Joh. 7:52) Aajuda oyendji oya li yi iwete ye vule Aagalilea. Aajuda yalwe oya li ya sheke Jesus moku mu ula Omusamaria. (Joh. 8:48) Omuhoko gwAasamaria ogwa li gwi ili, neitaalo lyawo olya li lya yooloka kwaandyoka lyAajuda. Shimwe ishewe, Aajuda nAagalilea oya li ya dhina Aasamaria nokaya li haya endathana nayo. — Joh. 4:9.

5. Okatongo keni aalanduli yaJesus ya li ya ningilwa?

⁵ Aawiliki Aajuda oya li ya dhina aalanduli yaJesus. Oya li ya talika ko kAafarisayi ye li “kohi yethingo lyaKalunga.” (Joh. 7:47-49) Odhoshili kutya Aafarisayi oya li ya tala ko kehe omuntu ngoka inaa longwa koosikola dhelongelokalunga lyOshijuda nenge ihaa landula omuthigululwakalo gwawo, e li omuntu gwowala nomudhinwa. (Iil. 4:13) Jesus naalongwa ye oya li ya ningwa okatongo, molwaashoka aantu pethimbo mpoka oya li yu uvitile uuntsa elongelokalunga lyawo, oondondo dhawo nomihoko dhawo. Aalongwa yaJesus nayo oya li ya nwethwa mo kokatongo. Opo ya vule okukala ya hangana, oya li ye na okulundulula omadhiladhilo gawo.

6. Gandja iiholelwa mbyoka tayi ulike kutya okatongo otaka vulu oku tu guma.

⁶ Oyendji yomutse kunena otwa kundukidhwa kaantu mboka ye na okatongo. Otatu vulu oku ka ningilwa nenge okukala tu ka na. Omumwameme gumwe omukokolindjila ngashingeyi moAustralia, ota ti: “Sho nda kala tandi gandja eitulomo kokwaanuuyuuki hoka kwa ningilwa oomvalele dhomoshilongo pethimbo lyonale nongashingeyi, osha ningitha ndje ndi kale ndi tonde unene aatiligane. Uutondwe mboka owa li wa nayipalekwa kehepeko ndyoka nda ningilwa.” Omumwatate gumwe gwokoKanada, okwa popi okatongo hoka a li e na oshikando shimwe kombinga yomalaka. Ota ti: “Onda li tandi dhiladhila kutya aapopi yOshifulaanisa oye vule yalwe. Onkee ano, onda tameke okukala ndi tonde aapopi yOshiingilisa.”

7. Jesus okwa li u ungaunga ngiini nokatongo?

⁷ Pethimbo lyetu okatongo otaka vulu okumena omidhi mutse, ngaashi owala sha li pethimbo lyaJesus. Mbela Jesus okwa li u ungaunga ngiini nako? Oshinima shotango, ka li e na okatongo, ihe okwa kala aluhe ha ungaunga naantu shi thike pamwe. Okwa li u uvithile aayamba noohepele, Aafarisayi nAasamaria nosho wo aafendelithi naalunde. Oshitiyali, okupitila melongo lye nomoshiholelwa she, Jesus okwa li u ulukile aalongwa ye kutya kaye na okukala ya limbililwa yalwe nenge oku ya ningila okatongo.

8. Uukumwe wetu owa kankamena kekotampango lini lya simana? Shi yelitha.

⁸ Jesus okwa li a longo aalanduli ye ekotampango lya simana hoka kwa kankamena uukumwe  wetu. Okwa ti: “One amuhe aamwayinathana.” (Lesha Mateus 23:8, 9.) Eeno, tse “aamwayinathana” shili, oshoka atuhe oluvalo lwaAdam. (Iil. 17:26) Ihe hasho owala shoka. Jesus okwa li a yelithile aalongwa ye kutya yo aamwayinathana, molwaashoka ayehe oye na He gumwe gwomegulu, Jehova. (Mat. 12:50) Kakele kaashono, oya li ya ningi oshitopolwa shuukwanegumbo uunene wopambepo, ya hanganithwa kohole nokeitaalo. Onkee ano, aayapostoli olundji moontumwafo dhawo, oyi ithana ooitaali ooyakwawo ‘aamwatate naamwememe.’ — Rom. 1:13; 1 Pet. 2:17; 1 Joh. 3:13.

9, 10. (a) Omolwashike Aajuda kaaya li ye na okwiitangela omuhoko gwawo? (b) Jesus okwa li a longo oshiilongomwa shini shokukondjitha uukwamuhoko? (Tala kethano lyopetameko.)

⁹ Konima sho Jesus a yelitha kutya otu na okwi itala ko tu li aamwatate naamwameme, okwa tsu omuthindo uukwatya weifupipiko. (Lesha Mateus 23:11, 12.) Ngaashi twe shi mono metetekelo, uuntsa owa li we eta etopoko mokati kaayapostoli ye omathimbo gamwe. Shimwe natango, uuntsa wopamihoko owa li uupyakadhi pethimbo ndyoka. Mbela Aajuda oya li ye na okukala yu uvite uuntsa, shaashi ye li oluvalo lwaAbraham? Aajuda oyendji osho ya li yi itaala ngawo. Johannes Omuninginithi okwe ya lombwele a ti: “Kalunga ota vulu okuyumudhila Abraham aanona momamanya ngaka.” — Luk. 3:8.

¹⁰ Jesus okwa li a longo kutya osha puka okukala to itangele omuhoko gwoye. Okwe shi ulike sho a pulwa komulongimpango kutya: “Mukwetu olye?” Jesus okwe mu yamukula ta longitha eyele lyOmusamaria ngoka a li a kwathele omulumentu Omujuda, ngoka a adhika mondjila kaayugi, e taye mu mokagula. Aajuda mboka ya piti po tango kaya li ya kwathele omulumentu ngoka a mona iihuna, ihe Omusamaria okwe mu sile ohenda. Pehulilo, Jesus okwa lombwele omulongimpango ngoka a kale a fa Omusamaria omunamutimahenda. (Luk. 10:25-37) Jesus okwa li e shi ulike kutya Omusamaria ota vulu okulonga Aajuda ya kale ye hole aantu yomihoko adhihe.

11. Omolwashike aalongwa yaKristus kaaya li ye na okutongola aakwiilongo, nokwe ya kwathele ngiini ye shi uve ko?

¹¹ Aalongwa yaJesus oya li ye na okufulila okalambo uuntsa nokatongo, opo ya gwanithe po oshilonga shawo. Omanga inaa ya megulu, Jesus okwe ya lombwele yu uvithe “muJudea alihe nomuSamaria sigo omiilongo ayihe yokombanda yevi.” (Iil. 1:8) Okwa kala noku ya longekidhila oshilonga shoka oshinene, mokupopya omaukwatya omawanawa ngoka ge niwe kaantu yomiigwana yilwe. Jesus okwa li a tanga omukuluntu gwaakwiita, Omuroma, kutya ina mona nale omuntu e na eitaalo lya fa lye. (Mat. 8:5-10) Jesus okwa li wo a popi nkene Jehova e hole aantu yomiigwana yilwe, ngaashi omuselekadhi Omufoinikia gwokuSarefat nosho wo Naeman, omunashilundu gwokuSiria. Shino okwe shi popi, sho e li moshilando shaandjawo, Nasaret. (Luk. 4:25-27) Jesus ina uvithila owala omukiintu Omusamaria, ihe okwa kala omasiku gaali muSamaria, oshoka aantu yamo oya li ya hokwa okupulakena ketumwalaka lye. — Joh. 4:21-24, 40.

12, 13. (a) Aayapostoli oya li yi inyenge ngiini, sho Jesus a longo omukiintu Omusamaria? (Tala kethano lyopetameko.) (b) Omolwashike Jakob naJohannes kaaya li yu uvite ko oshinima shoka?

¹² Kasha li nando oshipu kaayapostoli yaJesus ye ethe po okatongo. Oya li ya kumwa, sho ya mono Jesus ta longo omukiintu Omusamaria. (Joh. 4:9, 27) Aawiliki yelongelokalunga lyOshijuda kaya li haya popi naakiintu montaneho, unene tuu aakiintu Aasamaria mboka ya li ya dhinika. Aayapostoli oya li ya lombwele Jesus a lye. Ihe okwe shi ulike kutya okwa li a lenga oonkundathana dhiinima yopambepo, shi vulithe iikulya. Osha li ehalo lyaHe, okuuvithila omukiintu  Omusamaria, nosha li sha fa iikulya kuye. — Joh. 4:31-34.

¹³ Jakob naJohannes oshinima shoka kaya li ye shi uvite ko. Sho ye li molweendo naJesus taya taakana muSamaria, aalongwa yaJesus oya li ya pula ehala lyokulala momukunda moka hamu zi omukiintu Omusamaria. Ihe Aasamaria oya li ya tindi. Opo ihe Jakob naJohannes oya geye e taya pula yi indile omulilo gu ze megulu, gu halakanithe po omukunda aguhe. Jesus okwe ya ganda. (Luk. 9:51-56) Andola omukunda ngono ogwa li moshitopolwa shawo muGalilea, mbela ando osho ngaa yi inyenge ngawo? Osha fa shi li ngeyi kutya uutondwe wawo owa li wa hwahwamekwa kokatongo. Otashi vulika omuyapostoli Johannes a li a sa ohoni, omolwoohapu dhe ndhoka, konima sho aantu yomuSamaria ya pulakene nawa ketumwalaka ndyoka ye ya etela. — Iil. 8:14, 25.

14. Okatongo hoka ka holoka po tashi vulika omolwomalaka, oka li ka kandulwa po ngiini?

¹⁴ Konima owala yOpentekoste yomo 33 E.N., megongalo omwa li mwa tukuluka okatongo. Aaselekadhi aapopi yOshigreka oya li ya pangwa iikulya. (Iil. 6:1) Shoka otashi vulika she etithwa kelaka ndyoka haya popi. Aayapostoli oya li ya yi mo olunyala moshinima shoka nziya, sho ya hogolola aalumentu mboka taya vulu okutopolela aantu iikulya. Aalumentu ayehe mboka oya li ye na uupambepo wu li nawa noye na omadhina gOshigreka. Shika otashi vulika sha li sha hekeleke aaselekadhi mboka ya lumbudhwa iikulya.

15. Petrus okwa li a ningi ngiini omalunduluko mokukala kee na okatongo naantu ayehe? (Tala kethano lyopetameko.)

¹⁵ Mo 36 E.N., iilonga yokuninga aantu aalongwa oya tameke okuuvithilwa aantu yomomihoko adhihe. Omuyapostoli Petrus okwa li e na omukalondjigilile gwokweendathana owala nAajuda. Ihe konima sho Kalunga e shi yelitha kutya Aakriste inaya kala ye na okatongo, Petrus okwa li u uvithile Kornelius, omukwiita Omuroma. (Lesha Iilonga 10:28, 34, 35.) Okuza mpono, Petrus okwa kala ta tyapula okulya pamwe nooitaali ooyakwawo mboka kaaye shi Aajuda nokweendathana nayo. Nonando ongawo, konima yomimvo Petrus okwa tameke okukala ihaa li we pamwe nAakriste mboka kaaye shi Aajuda moshilando Antiokia. (Gal. 2:11-14) Onkee ano, Paulus okwa li a pe Petrus omayele taga opalele, e te ga taamba ko. Sho Petrus a nyolele Aakriste Aajuda naamboka kaaye shi Aajuda yomuAsia Eshona oshikando shotango, okwa popi nenyanyu kombinga yuumwayinathana womuuyuni awuhe. — 1 Pet. 1:1; 2:17.

16. Aakriste yopetameko oya kala ya tseyikila shike?

¹⁶ Osha yela kutya aayapostoli oya li yi ilongo koshiholelwa shaJesus ya kale ye hole “aantu ayehe.” (Joh. 12:32; 1 Tim. 4:10) Nonando oshe ya pula ethimbo, oya li ya lundulula okudhiladhila kwawo. Aakriste yopetameko oya li ya tseyikila ohole yawo yokuholathana. Methelemimvo etiyali, omunyoli gwedhina Tertullian okwa ti kutya aantu ohaya popi kombinga yAakriste taya ti: “Oye holathane . . . yo oyi ilongekidha nokuli okusa pehala lyayakwawo.” Sho Aakriste yopetameko ya zala “omuntu omupe,” oya kala ya tala ko aantu ayehe ye thike pamwe momeho gaKalunga. — Kol. 3:10, 11.

17. Ongiini tatu vulu okuvudha mo okatongo momitima dhetu? Gandja iiholelwa.

¹⁷ Kunena natse otashi vulika twa pumbwa ethimbo, opo tu vudhe mo okatongo momitima dhetu. Omumwameme gumwe moFulaanisa, okwa popi kombinga yaashoka ta kondjo nasho, a ti: “Jehova okwa longa ndje kutya ohole yashili oshike, okugandja oshike nosho wo kutya okuhola aantu ayehe otashi ti shike. Ihe sigo onena, otandi tsikile okukondjitha okatongo nokashi shi oshipu. Shoka osha ningitha ndje ndi tsikile okugalikana kombinga yasho.” Omumwameme gwokoSpania ngoka naye ta kondjo neshongo lya faathana, ota ti: “Omathimbo gamwe ohashi  kala oshidhigu kungame okukondjitha uutondwe mboka ndi nine omuhoko gwontumba, ihe olundji ohandi pondola. Ondi shi kutya onda pumbwa okutsikila okukondja. Onda pandula Jehova nonda nyanyukwa sho ndi li oshitopolwa shuukwanegumbo wa hangana.” Odhoshili kutya kehe gumwe gwomutse okwa pumbwa okwiikonakona. Otashi vulika twa pumbwa okukondjitha iikala yokatongo, ngaashi aamwameme mboka yaali.

18, 19. (a) Omolwashike tu na okutaamba ko kehe gumwe? (b) Omomikalo dhini tadhi longo tatu vulu oku shi ninga?

¹⁸ Otwa pumbwa okutseya kutya atuhe opu na ethimbo limwe twa li “aakwiilongo,” sho twa li kokule naKalunga. (Ef. 2:12) Ihe Jehova okwe tu hilile kuye “nohole.” (Hos. 11:4; Joh. 6:44) Kristus naye okwe tu taamba ko nehalo ewanawa. Okwe tu pa ompito, opo tu ninge oshitopolwa shuukwanegumbo waKalunga. (Lesha Aaroma 15:7.) Omanga Jesus e tu taamba ko pahole tu li aantu inaatu gwanenena, oshi li nawa tu kale tu na ko nasha wo nayalwe.

¹⁹ Omatopoko, okatongo nosho wo uutondwe, otayi humu komeho muuyuni mbuka, sho ehulilo tali hedha popepi. (Gal. 5:19-21; 2 Tim. 3:13) Tu li aapiya yaJehova, ohatu kongo uunongo wopombanda, mboka hawu tu kwathele tu kale kaatu na okatongo notu humitha komeho ombili. (Jak. 3:17, 18) Ohashi tu nyanyudha okupanga uukuume naantu yokiilongo yilwe, okutaamba ko omaputuko gawo nokwiilonga omalaka gayalwe. Uuna tatu shi ningi, ombili mutse ohayi kunguluka ya fa omulonga tagu tondoka omeya, nuuyuuki ohawu tondokele kutse wa fa omakuthikuthi gomefuta. — Jes. 48:17, 18.

20. Oshike tashi ka ningwa po, ngele ohole oya lundulula omitima nomadhiladhilo getu?

²⁰ Omumwameme gwokoAustralia ngoka a tumbulwa metetekelo, ota ti: “Onda li nda mono ompito yokutseya oshili.” Okwe shi zimine nkene okukonakona Ombiimbeli kwe mu kwathele, sho a ti: “Oya lundulula omutima nomadhiladhilo gandje. Onkee onde shi imonene ko mwene nkene iikala yokatongo noyuutondwe ye ende tayi kana mo mungame.” Omumwatate Omukanada, ngoka a popiwa metetekelo, okwa ti ye okwe shi ndhindhilika kutya “okatongo kopamihoko olundji ohake etithwa kokwaashisha nonokutya omaukwatya gaantu inagi ikolelela kehala mpoka ya valelwa.” Konima okwa hokana omumwameme omupopi gwOshiingilisa. Omalunduluko ngoka oge li uumbangi kutya ohole yopaKriste otayi vulu nohayi sindi okatongo. Yo ohayi tu kwathele tu kale tu na uukumwe wa kolelela. — Kol. 3:14.