1-2. Oshiningwanima oshikumithi shini sha li sha ningwa mesiku lyOpentekoste mo 33 E.N.?

OSHA li ongula onene yOsoondaha muJerusalem, mesiku lyOpentekoste mo 33 E.N. Ongundu yaalongwa ye vulithe po 120 lwaampono, oya li ya gongala mondunda yopombanda megumbo limwe. (Iil. 1:13-15; 2:1) Momasiku ga tetekele, Jesus okwa li e ya lombwele ya kale muJerusalem, oshoka oya li taya ka pewa omagano gi ikalekelwa. (Iil. 1:4, 5) Oshike sha ka landula ko?

² Ombiimbeli otayi ti: “Ombaadhilila aantu oyu uvu oshihomo oshinene tashi zi kegulu.” Osha li shu udhitha egumbo alihe. Opo nduno, “omalaka ga fa gomulilo” oga lambele komitse dhaalongwa, na ayehe oya “udhithwa ihe Ombepo Ondjapuki.” (Iil. 2:2-4) Jehova okwa tilile ongundu ndjoka ombepo ye ondjapuki momukalo omukumithi. (Iil. 1:8) Oyo ya li ya gwayekwa tango nombepo ondjapuki * nokupewa etegameno lyoku ka pangela pamwe naJesus megulu.

3. Omolwashike mboka ya li ya gwayekwa nombepo ondjapuki pOpentekoste, kaaya li ye shi limbililwa?

³ Andola ngoye owa li gumwe gwomaalongwa mboka ya li ya gongala mondunda yopombanda mesiku ndyoka, ando ito shi  dhimbwa. Owa lambelwa komutse koshinima sha fa elaka lyomulilo, nowa tameke okupopya omalaka. (Iil. 2:5-12) Kungawo, andola owa kala wu na uushili kutya owa gwayekwa nombepo ondjapuki. Ihe mbela ayehe mboka ya gwayekwa nombepo ondjapuki, ohaya gwayekwa momikalo dhontumba omikumithi nopethimbo lya faathana? Aawe. Otu shi shi ngiini?

4. Mbela aagwayekwa ayehe mboka ya li ko omimvo 2 000 nasha dha ka pita, oya li ya gwayekwa pethimbo lya faathana? Shi yelitha.

⁴ Natu kundathaneni kombinga yethimbo ndyoka omuntu tashi vulika a ninge omugwayekwa. Ongundu yAakriste 120 lwaampono, hayo owala ya li ya gwayekwa nombepo ondjapuki pOpentekoste yomo 33 E.N. Lwanima mesiku omo tuu moka, aantu yalwe 3 000 lwaampono, nayo oya li ya tililwa ombepo ondjapuki ndjoka ya uvanekwa. Oya li ya gwayekwa, konima sho ya ninginithwa. (Iil. 2:37, 38, 41) Ihe momimvo dha ka landula ko, hAakriste ayehe aagwayekwa ya li ya gwayekwa pokuninginithwa kwawo. Aasamaria oya li ya gwayekwa, konima sho ya ninginithwa. (Iil. 8:14-17) Kornelius naanegumbo lye oya li ya gwayekwa nokuli manga inaaya ninginithwa, oshinima shoka sha li sha pumba. — Iil. 10:44-48.

5. Shi ikolelela kAakorinto aatiyali 1:21, 22, oshike hashi ningwa po, ngele omuntu a gwayekwa nombepo ondjapuki?

⁵ Natu kundathaneni wo shoka hashi ningwa po, uuna omuntu a gwayekwa nombepo ondjapuki. Yamwe mboka ya gwayekwa, otashi vulika petameko shi kale oshidhigu kuyo yi itaale kutya Jehova okwe ya hogolola. Otashi vulika yi ipule taya ti: ‘Omolwashike Kalunga a hogolola ndje?’ Yalwe otashi vulika kaayi ipule ngawo. Kutya nduno omuntu oku uvite ngiini, omuyapostoli Paulus okwa yelitha shoka hashi ningilwa ayehe mboka ya gwayekwa, a ti: ‘Kalunga nokwe mu tula oshihako * shoku mu ndhindhilika kutya mwa ningi aantu ye, sho e mu pe ombepo ondjapuki ndjoka e mu uvanekela. Ombepo oyo okapilo kutya tse otatu ka pewa shoka Kalunga e shi uvanekela aantu ye.’ (Ef. 1:13, 14) Onkee ano, Jehova oha longitha ombepo ye  ondjapuki, opo a shilipaleke Aakriste mbaka kutya okwe ya hogolola. Momukalo nguka, ombepo ondjapuki oyi li “okapilo [euvaneko]” hoka ye ka pewa ke ya shilipaleke kutya monakuyiwa otaya ka kala megulu sigo aluhe, ihe hakombanda yevi. — Lesha 2 Aakorinto 1:21, 22.

6. Omukriste omugwayekwa oku na okuninga shike, opo a pewe ondjambi yokuya megulu?

⁶ Ngele Omukriste okwa gwayekwa, mbela osha yela kutya ota ka ya megulu? Aawe. Oha kala e na uushili kutya okwa hogololwa a ye megulu. Nonando ongawo, oku na okudhimbulukwa elondodho ndika tali ti: “Aamwameme, kambadhaleni natango mwa mana mo, okwiithanwa nokuhogololwa kweni kuKalunga ku kale aluhe kwa mena omidhi mune. Oshoka ngele tamu shi ningi, itamu ihata po we.” (2 Pet. 1:10) Onkee ano, Omukriste omugwayekwa nonando okwa hogololwa nenge e na eithano lyomegulu, ondjambi ye ote ke yi mona owala, ngele a kala omudhiginini. — Fil. 3:12-14; Heb. 3:1; Eh. 2:10.   

7. Aagwayekwa ohaya tseya ngiini kutya oye na eithano lyomegulu?

⁷ Ongiini omuntu ta vulu okutseya kutya oku na eithano lyomegulu? Eyamukulo otali monika lya yela moohapu dhaPaulus ndhoka a lombwele mboka yokuRoma ya li ‘yi ithanwa kuKalunga, ya ninge aantu ye.’ Okwa li e ya lombwele a ti: ‘Ombepo ndjoka mwe yi pewa kuKalunga, kayi shi yoku mu ninga aapika, mu kale muumbanda. Ombepo otayi mu ningi aana yaKalunga, nokoonkondo dhayo otatu igidha kuKalunga tatu ti: “Tate! Tate!” Ombepo yaKalunga oyo yene tayi kwatathana noombepo dhetu mokuhempulula kutya otse aana yaKalunga.’ (Rom. 1:7; 8:15, 16) Onkee ano, Kalunga oha yelithile aagwayekwa okupitila mombepo ye ondjapuki kutya oye na eithano lyomegulu. — 1 Tes. 2:12.   

8. Johannes gwotango 2:20, 27, ota ulike ngiini kutya Aakriste aagwayekwa inaya pumbwa yalwe ye ya shilipaleke kutya yo aagwayekwa?

⁸ Jehova iha kaleke momalimbililo mboka e ya pa eithano lyomegulu. (Lesha 1 Johannes 2:20, 27.) Odhoshili kutya Aakriste aagwayekwa oya pumbwa okulongwa kuJehova okupitila megongalo, ngaashi owala kehe gumwe. Ihe inaya pumbwa gulwe e ya shilipaleke kutya oya gwayekwa. Jehova oha longitha ombepo ondjapuki, ndjoka yi li oonkondo oonene meshito alihe, e ya shilipaleke kutya yo aagwayekwa.

9. Uuna gumwe a gwayekwa, oshike hashi mu ningilwa, ngaashi sha popiwa mAaefeso 1:18?

⁹ Oyendji yomaapiya yaKalunga kunena, otashi vulika haya mono oshidhigu okuuva ko shoka hashi ningilwa omuntu, uuna Kalunga e mu gwayeke nombepo. Shika oshi shi okuuviwa ko, molwaashoka yo inaya gwayekwa. Kalunga okwa shita aantu ya kale nomwenyo sigo aluhe kombanda yevi, ihe hamegulu. (Gen. 1:28; Eps. 37:29) Nonando ongawo, Jehova okwa hogolola yamwe ya ka kale megulu. Onkee ano, uuna e ya gwayeke, oha lundulula noonkondo etegameno lyawo nomukalo gwawo gwokudhiladhila, opo ya kale netegameno lyoku ka kala nomwenyo megulu. — Lesha Aaefeso 1:18.

10. ‘Okuvalululwa’ otashi ti shike? (Tala wo enyolo lyopevi.)

¹⁰ Uuna Aakriste ya gwayekwa nombepo ondjapuki, kungawo oya “valululwa” nenge tu tye oya “valwa okuza megulu.” * Jesus okwa popi wo kutya omuntu iha vulu okuyelithila thiluthilu gulwe ngoka inaa gwayekwa nkene ngoka a “valululwa” nenge a “valwa pambepo,” ha kala e uvite. — Joh. 3:3-8.

11. Yelitha nkene omadhiladhilo gomuntu ngoka a gwayekwa haga lunduluka.

 ¹¹ Uuna Aakriste ya gwayekwa, okudhiladhila kwawo ohaku lunduluka ngiini? Manga Aakriste mbaka inaaya gwayekwa kuJehova, ohaya kala ye na etegameno lyoku ka kala nomwenyo sigo aluhe kombanda yevi. Ohaya kala wo ya tegelela nondjuulukwe onene, ethimbo ndyoka Jehova ta ka kutha po uukolokoshi awuhe nokuninga evi oparadisa. Otashi vulika wo nokuli ya li haya dhiladhila nkene taya ka hambelela yaandjawo nenge ookuume kawo mboka ya sa. Ihe konima sho ya gwayekwa, omadhiladhilo gawo oga lunduluka. Omolwashike mbela? Shika itashi ti ando kutya inaya gwanenwa ketegameno lyoku ka kala kombanda yevi. Inaya lundulula okudhiladhila kwawo, molwaashoka ya gwililwa po nenge taya mono iihuna unene. Ihaya tameke owala ombadhilila ye uvite kutya kombanda yevi otaya ka sila ko ezaza. Pehala lyaashono, Jehova oha longitha ombepo ye ondjapuki, a lundulule omukalo gwawo gwokudhiladhila netegameno ndyoka ye na.

12. Shi ikolelela kuPetrus gwotango 1:3, 4, Aakriste aagwayekwa ohaya kala ye uvite ngiini kombinga yetegameno lyawo?

¹² Omuntu ngoka a gwayekwa, otashi vulika a kale e uvite inaa gwana okupewa uuthembahenda mbuka wi ikalekelwa. Nonando ongawo, iha kala nando e na omalimbililo ngele Jehova okwe mu hogolola. Omutima gwe ohagu kala tagu hunga kenyanyu noha kala e na olupandu, uuna ta dhiladhila ketegameno lyomonakuyiwa ndyoka e na. — Lesha 1 Petrus 1:3, 4.

13. Aagwayekwa ohaya kala ye uvitile ngiini onkalamwenyo yawo yokombanda yevi?

¹³ Mbela shono otashi ti kutya aagwayekwa ohaya kala ya hala okusa? Omuyapostoli Paulus okwa yamukula epulo ndyoka. Okwa yelekanitha omalutu gawo gopanyama netsali, a ti: “Manga tu li metsali ndika lyokevi, otatu fudhagana, tu uvite twa thiminikwa. Itashi ti ando, otwa hala okuhulwa olutu lwetu, ihe, otwa hala owala okuzalekwa ndoka lwomegulu, opo shoka tashi si, shi hemukile mumwe naashoka shi na omwenyo.” (2 Kor. 5:4) Aakriste mbaka inaya kanitha ohokwe monkalamwenyo ndjika, ando ya hala yi hule mbala. Mepingathano naashono, ohaya nyanyukilwa onkalamwenyo noya hala oku yi longitha esiku kehe mokulongela Jehova pamwe noyaandjawo nonookuume kawo. Shimwe ishewe, kutya nduno otaya ningi shike, aluhe ohaya kaleke momadhiladhilo etegameno ewanawa lyomonakuyiwa ndyoka ye na. — 1 Kor. 15:53; 2 Pet. 1:4; 1 Joh. 3:2, 3; Eh. 20:6.

14. Oshike ihaashi ulike kutya omuntu okwa gwayekwa nombepo ondjapuki?

¹⁴ Otashi vulika to ipula ngele owa gwayekwa nombepo ondjapuki. Ngele osho, dhiladhila komapulo ga simana taga landula: Mbela oho kala wa halelela okulonga ehalo lyaJehova? Mbela owu uvite kutya ngoye omulaadhi, unene tuu miilonga yokuuvitha? Mbela ngoye omuntu ngoka ha konakona Oohapu dhaKalunga nuulaadhi nowu hole okwiilonga iinima ‘yomuule womadhiladhilo gaKalunga?’ (1 Kor. 2:10) Mbela owu wete Jehova e ku kwathela wu mone iizemo iiwanawa miilonga yokuuvitha? Mbela owu uvite wu na oshinakugwanithwa oshinene shokukwathela yalwe yi ilonge kombinga yaJehova? Mbela owa mona kutya Jehova okwe ku kwathela momikalo odhindji dhokondandalunde monkalamwenyo yoye? Ngele eyamukulo lyoye komapulo agehe ngoka oeeno, mbela shoka otashi ulike kutya owu na eithano lyomegulu? Hasho nando. Omolwashike? Omolwaashoka aapiya ayehe yaJehova otashi vulika ya kale ye uvite ngaaka, kutya nduno aagwayekwa nenge hasho. Kekwatho lyombepo ondjapuki, Jehova ota vulu okupa kehe omupiya gwe oonkondo a ninge iinima mbyoka kutya nduno oku na etegameno lini. Ngele oho kala wa limbililwa kutya ngoye omugwayekwa, uushili owo  kutya ku shi omugwayekwa. Mboka ya hogololwa kuJehova, ihaya kala ya limbililwa ngele oya gwayekwa nenge hasho. Ohaya kala ye shi shi!

15. Otu shi shi ngiini kutya haantu ayehe mboka ya pewa ombepo yaKalunga, ya hogololwa ya ye megulu?

¹⁵ MOmbiimbeli omu na iiholelwa oyindji yaalumentu mboka ya li ye na eitaalo lya kola, mboka ya li ya pewa ombepo ondjapuki, ihe kaya li ye na etegameno lyoku ka kala megulu. David okwa li ha wilikwa kombepo ondjapuki. (1 Sam. 16:13) Ombepo ondjapuki oya li ye mu kwathele a uve ko iinima yomuule kombinga yaJehova, noya li wo ye mu wilike a nyole iitopolwa yimwe yOmbiimbeli. (Mark. 12:36) Nonando ongawo, omuyapostoli Petrus okwa ti kutya David “ina londa megulu.” (Iil. 2:34) Johannes Omuninginithi okwa li a ‘udhithwa ombepo ondjapuki.’ (Luk. 1:13-16) Jesus okwa li a ti kutya kapu na omuntu omunene e vule Johannes, ihe nonando ongawo, okwa ti wo kutya Johannes ita ka kala gumwe gwomwaamboka taya ka pangela pamwe naye megulu. (Mat. 11:10, 11) Jehova okwa li a longitha ombepo ye ondjapuki a kwathele ooitaali mboka, ya longe iikumithalonga, ihe ka li e yi longitha e ya hogolole ya ka kale megulu. Mbela shoka otashi ti kutya yo kaya li aadhiginini ngaashi mboka ya hogololwa ya ka pangele megulu? Aawe. Shoka otashi ti owala kutya Jehova ote ke ya yumudha, ya ka kale nomwenyo mOparadisa kombanda yevi. — Joh. 5:28, 29; Iil. 24:15.

16. Kunena aapiya yaKalunga oyendji, oye na etegameno lini?

¹⁶ Ongundu onene yaapiya yaKalunga kombanda yevi kunena, kayi na etegameno lyoku ka kala nomwenyo megulu. Ngaashi Abraham, Sara, David, Johannes Omuninginithi nosho wo aalumentu naakiintu yalwe oyendji yopethimbo lyOmbiimbeli, nayo oye na etegameno lyoku ka kala kombanda yevi, kohi yelelo lyUukwaniilwa waKalunga. — Heb. 11:10.

17. Omapulo geni tatu ka kundathana moshitopolwa tashi landula?

¹⁷ Kunena aagwayekwa yamwe natango oye li mokati ketu, notashi vulika tu ipule omapulo gontumba. (Eh. 12:17) Pashiholelwa, aagwayekwa oye na okwiitala ko ngiini? Ngele gumwe megongalo lyeni okwa tameke okulya oshikwiila nokunwa omaviinu pEdhimbuluko, mbela owu na okuungaunga naye ngiini? Ongiini ngele omwaalu gwaamboka tayi iti kutya aagwayekwa, otagu ende tagu indjipala? Mbela owu na okukala to ipula nasho? Omapulo ngoka otaga ka yamukulwa moshitopolwa tashi landula.