“Eeno, ongoye nguka ho uvu omagalikano. Aantu ayehe otaye ya kungoye.” — Episalomi 65:2.

Aantu yamwe ohaya galikana oshoka ohaya ti kutya egalikano ohali ya ningitha ya kale yu uvite ya pepelelwa, nonando inayi itaala kutya opu na ngoka e ya pulakena. Ihe egalikano ihali tu ningitha owala tu kale twa pepelelwa, opo tu vule okuungaunga nomaupyakadhi getu. Ombiimbeli otayi tu shilipaleke kutya “Omuwa * oku li popepi naayehe mboka taye mu ithana, naamboka taye mu galikana moshili . . . notu uvu omaindilo gawo e te ya hupitha.” — Episalomi 145:18, 19.

Onkee otatu vulu okukala nuushili kutya Jehova Kalunga oha pulakene komagalikano gaapiya ye. Okwa popi pahole a ti: “Otamu ka ithana ndje. Otamu ke ya tamu galikana ndje, notandi ke mu yamukulae.” — Jeremia 29:12.

“Dhiginineni okugalikana.” — Aaroma 12:12.

MOmbiimbeli otatu ladhipikwa tu kale hatu ‘galikana’ notu tsikile okukala hatu ‘galikana aluhe.’ Osha yela kutya Jehova okwa hala tu kale hatu galikana kuye. — Mateus 26:41; Aaefeso 6:18.

Omolwashike Kalunga a hala tu galikane kuye? Natu tale kwaashi: Omuvali guni taka kala inaa hala okuuva okamwana take mu lombwele taka ti: “Tate, kwathela ndje wu ningile ndje.” Oshoshili kutya he otashi vulika a kale e shi nale kutya okamwana oka pumbwa shike nenge oku uvite ngiini, ihe ngele oku uvu taka pula ekwatho, otashi ulike kutya okamwana oke mu inekela noke na ekwatathano ewanawa naye. Sha faathana, uuna tatu galikana kuJehova Kalunga, otatu ulike kutya otwe mu inekela notwa hala okukala popepi naye. — Omayeletumbulo 15:8; Jakob 4:8.

“Mu tsikeni iimpwiyu yeni ayihe, oshoka oye omusilishimpwiyu gweni.” — 1 Petrus 5:7.

Kalunga okwa hala tu kale hatu galikana kuye, oshoka oku tu hole noku na ko nasha natse. Omaupyakadhi getu agehe naashoka tatu ipula nasho oku shi shi nawa nokwa hala oku tu kwathela.

Monkalamwenyo ye ayihe, Omukwaniilwa David okwa li ha galikana kuJehova Kalunga e mu kwathele nokwa li he Mu lombwele omadhiladhilo nomaiyuvo ge. (Episalomi 23:1-6) Kalunga okwa li e uvitile ngiini David? Okwa li e hole David nokwa li a pulakene komagalikano ge ogendji. (Iilonga 13:22) Sha faathana, Kalunga oha pulakene komagalikano getu, molwaashoka oku na ko nasha natse.

Oohapu ndhoka odha nyolwa kugumwe gwomaanyoli yomapisalomi mOmbiimbeli. Okwa li e shi kutya Kalunga oha uvu omagalikano ge, naashoka osha li she mu kwathele noonkondo. Okwa li e uvite e li popepi naKalunga nokwe mu pe oonkondo a ungaunge nuudhigu nosho wo noluhodhi lwe. — Episalomi 116:1-9.

Ngele otu na uushili kutya Kalunga oha uvu omagalikano getu, otatu ka tsikila okugalikana kuye. Tala koshiholelwa shaPedro ngoka ha kala muumbangalantu waSpania. Omwanamati gwomimvo 19 okwa li a si moshiponga shohauto. Moluhodhi lwe, Pedro okwa lombwele Kalunga nkene e uvite nokwa kala ha galikana e mu hekeleke noku mu ambidhidhe. Oshike sha ningwa po? Pedro ota ti: “Jehova okwa yamukula egalikano lyandje okupitila mAakriste ooyakwetu mboka ye tu hekeleke noku tu ambidhidha nomukulukadhi gwandje.”

Nonando omagalikano gaPedro inaga ningitha omwana a yumuke, oge mu kwathela noonkondo naanegumbo lye. Omukulukadhi gwe, María Carmen ota ti: “Omagalikano oga li ga kwathele ndje ndi idhidhimikile oluhodhi lwandje. Onda li ndi shi kutya Jehova Kalunga oku wete kutya ondu uvite ngiini, molwaashoka uuna nda galikana kuye, onda li handi kala ndi uvite ombili nonda ngungumana.”

Ombiimbeli nosho wo iinima mbyoka aantu ya ningilwa moonkalamwenyo dhawo, otayi ulike kutya Kalunga oha uvu omagalikano. Ihe nonando ongawo, iha yamukula omagalikano agehe. Omolwashike Kalunga ha yamukula omagalikano gamwe, ihe gamwe ihe ga yamukula?