BAIBO IKAAVWA ANTU UKUSENUKA
“Yancindike sana.”
YA GUADALUPE VILLARREAL
MWAKA UNO YAVIILWE: 1964
KUNO YAVYALILWE: MEXICO
VINO UMI WALI: YALI NI MIYELE IPE
VINO NAALI: Umu lupwa lwitu twali ana 7, nakulile umu musumba wa Hermosillo mu Sonora, uku Mexico, nupya umu ncende ii mwali sana upiina. Ya tata yafwile ala ncili umwance, fwandi ya mayo aliyo yatandike ukutusakamala. Insita izingi ntazwalanga insapato pano tutakweti impiya izyakukalila. Natandike ukuomba pakuti naazwilizyako ukulonda ivikulondekwa pa ng’anda, ala ncili umwance. Wakwe vino cikaya uku ndupwa izingi, twali aingi pa ng’anda.
Insita ikulu umu wanda, ya mayo aakutucingilila yatayanga pa ng’anda. Lino naali ni myaka 6, umulumendo uwa myaka 15 watandike ukulungana nani. Nupya watwalilile ukucita vii pa nsita itali. Ni cacitike icakuti natandike ukwelenganya sile pa uzelele. Nupya natandike ukwelenganya nu kuti caya sile ningo ukulaalana na aonsi yanji. Lino nalenzile uwazwilizyo kuli yadokota na ya simapepo, yanenyile ukuti ntakweti intazi ili yonsi nu kuti vino nayuvwanga vyali sile ningo.
Lino naali ni myaka 14, napingwilepo ukulacita ivintu nu kuzwala wa yantu aakalaalana na ainsi yatupu nanti anaci yatupu. Natwalilile ukucita vii pa myaka 11, nupya nikalanga na aonsi apusane pusane. Mukuya kwa nsita, nasambilile ivya kuzifya antu inyele nu kuyapenta nupya nakweti syopu muno nacitilanga vii. Lelo ntali ni nsansa. Ilingi naculanga nupya nayuvwanga ukuti kusi umuntu ali wensi angangazwa. Nupya nilwike ukuti vino nacitanga vitaali ningo. Natandike ukuyuzya ukuti, ‘Uzye kwayako antu amiyele isuma nupya aangangazwa?’
Nelenginye pali mangulenzi. Watandike ukusambilila Baibo na ya Nte Yakwe Yeova nupya umukuya kwa nsita wizile abatiziwa. Wanenangako vino wasambililanga, lelo ntikangako mano. Nanti ciye vivyo, nakumbwanga vino wikalanga alino ni cupo cakwe. Naweni vino wene na ya iya yatemwanine na vino yacindikananga. Nupya yali sana ni cikuuku. Lino papisile insita, nani nizile intandika ukusambilila Baibo na ya Nte Yakwe Yeova. Pa kutandika ntalondesyanga ukusambilila, fwandi nalondelangamo sile. Lyene ivintu vizile ivisenuka.
VINO BAIBO YANGAZWILE UKUSENUKA: Ya Nte Yakwe Yeova yanenyile ukuti nkazanweko uku kulongana, nupya naile. Wali ali muku wa kutandikilapo ukuyuvwa vino nayuvwile. Antu asyala yansekanga, lelo ya Nte yene yatacisilepo vivyo. Yandamwike ni cikuuku, nupya yancindike sana. Canfisile sana pa mwenzo.
Natemilweko ya Nte lino naile inzanwako uku ukongano wa ciputulwa. Nanti cakuti antu yaa yaali aingi, yali ningo sana kwati sile a nkazi wane. Nayuzizye ndi cakuti antu yaa ali antu aamiyele isuma, nupya aangangazwa yano nalondesyanga pa nsita itali. Vino yatemwanine nu kulemana, alino na vino yaomvyanga Baibo pa kwasuka amauzyo yonsi, vyanzungwisye. Nilwike ukuti Baibo i yalenzile ukuti yaye ni miyele isuma. Nupya naweni ukuti nani kwene nalondekwanga ukusenuka pakuti inje wakwe aliyo.
Alino nalondekwanga ukusenuka sana pano naali ni miyeele kwati u mwanaci. Nalondekwanga ukusenuka umu milandile, micitile ya vintu, mizwalile, misakwile ya nyele, alino nu mu misoolwele iya vyuza. Yacuza yano nakweti yatandike ukunseka, nu kunena iyati: “I cani cino ukucitila vii? Vivi kwene vino waali, wali sile ningo. Utasambilila Baibo. Wakwata vyonsi vino ungalondekwa.” Icintu icantalile sana, u kuta imiyele iipe ino nakweti.
Nanti ciye vivyo namanyile ukuti ningasenuka, pano amazwi amuli Baibo aya pali 1 Kolinto 6:9-11 yanfisile pa mwenzo, aakuti: “Nanti uzye mutaamanya ukuti antu aatalungama yatalingila umu Wene wakwe Leza? Mutaabepwa. Antu aakacita uzelele, aakapepa ivilubi, aakacita ucende, aonsi aakazumilizya aonsi yauze ukucita nayo uzelele, aonsi aakacita uzelele na onsi yauze . . . yatalingila umu Wene wakwe Leza. Nupya yamwi pali mwemwe avino mwali. Lelo mwaswefiwa.” Yeova wazwile antu ukusenuka uku cisila, nupya nani kwene wangazwa. Casenzile imyaka ingi sana pakuti nsenuke, lelo vino ya Nte yantungululanga Baibona na vino yandanganga ukutemwa vyangazwile sana.
IVISUMA VINO NAZANA: Ndakai lyene naya nu umi usuma. Natwala, nupya mamane nani tukasambilizya umwana witu umulumendo ukulalondela ivisinte ivya muli Baibo. Nasenuka sana umu miyele ino nakweti mpiti, nupya nkaipakizya ivintu ivingi vino nkasambilila pali Leza alino ni milimo ino napelwa umu cilongano. Nene eluda umu cilongano, nupya natwalilila ukwazwa yauze ukusambilila icumi icaya umwi Izwi Lyakwe Leza. Vino nasenwike vyalenzile ya mayo ukuya sana ni nsansa icakuti yapingwilepo ukutandika ukusambilila Baibo nupya izile iyabatiziwa. Nakaci wane kwene uwali ni miyele iipe wizile aya a Nte Yakwe Yeova.
Na antu kwene amanyile vino naali mpiti yakalola ukuti lyene nasenuka nupya naya ni miyele isuma. Nupya namanya ivyalenga ukuti nsenuke. Ku cisila naile kuli yano yasambilila sana kuti yangazwe, nomba vino yanenanga vitangazwanga. Lelo Yeova wangazwile sana. Nanti cakuti nailolanga ukuti ntacindama, wambweni nu kundanga ukutemwa nupya wanteekelile. Vino Leza uwaya nu kutemwa nupya uwakwatisya mano wambweni nu kulonda ukuti inje nu umi usuma, vyangazwile sana.