Ntompejo ya Bulopwe bwa Leza Pano ke Mwanda Mumweke
Ntompejo ya Bulopwe bwa Leza Pano ke Mwanda Mumweke
“Muloñanga biyampe pomutele’ko mutyima [ku kinenwa kya bupolofeto], pamo bwa ku kimuni kitēma mu kifuko mudi fukutu.”—2 PETELO 1:19, NW.
1. I bintu’ka bishile bidi’ko mu ntanda ya dyalelo?
BUFUDILE pa bufudile bukwabo—o ke mwikadila wa ntanda ya dyalelo. Twadi na koneka kwa nshi pano ke butumbula bwatāla pi na pi, bine makambakano a bantu enda akoma ne mwa kupwijija’o mwine. Enka ne bipwilo bya ntanda bine i bikomenwe kukwasha’ko. Abyo bine byo bivudile kusonshila ne mudilo wa ntondo, mushikwa, ne kufwila muzo, bintu bikalañanya bantu. Bine, monka mokyālailwe, “fukutu fututu bwi-i” i mipūte “bantu.” (Isaya 60:2) Inoko, mu kitatyi kimo kyonka, kudi midiyo ya bantu idi na lukulupilo lutala pa mafuku a kumeso. Mwanda waka? Mwanda batele mutyima ku kinenwa kya Leza kya bupolofeto “pamo bwa ku kimuni kitēma mu kifuko mudi fukutu.” I betabije “kinenwa” kya Leza, musapu wandi utanwa pano mu Bible, kiludike matabula abo.—2 Petelo 1:19, NW.
2. Kukwatañana na bupolofeto bwa Danyele butala pa “kyaba kya kumfulo” i bāni kete bakapebwa kwivwanija kwa bintu bya ku mushipiditu?
2 Mupolofeto Danyele wāsonekele pangala pa “kyaba kya kumfulo” amba: “Bangibangi bakeneñenya abo bene [“bakanangakana koku na koku,” NW] ne kwitōkeja to-o, ne kutompibwa; ino’nka bapupakane bakalonga byabupupakane: kadi nansha umo mwine wa bapupakane ukevwanija; nanshi boba badi ne ñeni bakevwanija.” (Danyele 12:4, 10) Kwivwanija kwa bintu bya ku mushipiditu i kwa enka boba “bakanangakana koku na koku” mu Kinenwa kya Leza, ko kunena amba befunda na kininga ne kulonda misoñanya idi’mo, koku bekankila’ko kulonga kiswa-mutyima kyandi.—Mateo 13:11-15; 1 Yoano 5:20.
3. Mu myaka ya 1870, i bubinebine’ka bwa kamweno bwājingulwile befundi babajinji ba Bible?
3 Ku ngalwilo’tu kwa myaka ya 1870, kumeso kwa “mafuku a kumfulo” kushilula, Yehova Leza wāanjile kutuma mwinya wa kuyuka “bifibwe bya Bulopwe bwa mu madiulu.” (2 Temote 3:1-5; Mateo 13:11, Myanda Miyampe ku Bonso) Mu kine kitatyi’kya, kakisumpi ka befundi ba Bible—pa kwishila na mwādi mulangila bavule—kājingulula amba kujoka kwa Kidishitu i kwakubulwa kumweka. Yesu pa kupwa kubikikwa mūlu wādi wa kujoka, ko kunena’mba, aye byadi mulopwe, wādi wa kuta mutyima mpata pano panshi. Ino kiyukeno kimweke kya bipindi bivule kyo kyādi kya kuyukija bandi bana ba bwanga ngalwilo ya kwikala’po kwandi kwakubulwa kumweka.—Mateo 24:3-14.
Ntompejo Ibaikala Ke Mwanda Mumweke
4. I muswelo’ka waningishe Yehova lwitabijo lwa bengidi bandi ba mu ano mafuku?
4 Kimonwa kya kwalamuka yādi ntompejo ya kwanwa ya mukekadila Kidishitu mu ntumbo ya Bulopwe. (Mateo 17:1-9) Kino kimonwa kyāningishe lwitabijo lwa ba Petelo, Yakoba, ne Yoano mu kitatyi kyālekele bavule kulonda Yesu mwanda kālongelepo bintu byambulwa kukwatañana na Bisonekwa byobādi basaka. Mo monka ne mu kino kitatyi kya mfulo, Yehova waningishe lwitabijo lwa bengidi bandi ba mu ano mafuku na kwibamunikila mwinya muvule pa kufikidila kwa kyokya kimonwa kilenga moyo ne bupolofeto bukwabo bukwatañene nakyo. Tubandaulei pano myanda mimweke imoimo ya ku mushipiditu iningisha lwitabijo lwetu.
5. Le Mutumbwe wa dyuba i ani, ne ‘wātambile’ kitatyi’ka?
5 Mutumibwa Petelo wādi wisambila pa kwalamuka kwa Yesu pa kusoneka’mba: “O mwanda tudi na kinenwa kya bupolofeto kiningijibwe nakampata; kadi muloñanga biyampe pomutele’ko mutyima, pamo bwa ku kimuni kitēma mu kifuko mudi fukutu, poso’nka bukye ne mutumbwe wa dyuba utambe, mu mityima yenu.” (2 Petelo 1:19, NW) Uno Mutumbwe wa dyuba wa kyelekejo nansha “mutumbwe wa lubanga utōka tō” i Yesu Kidishitu mutumbijibwe ntumbo. (Kusokwelwa 22:16) ‘Wātambile’ mu 1914 pābutwilwe Bulopwe bwa Leza momwa mūlu, ne kushilula wāshilula kitatyi kipya. (Kusokwelwa 11:15) Mu kimonwa kya kwalamuka, ba Mosesa ne Ediya bāmwekele kubwipi ne Yesu, besamba nandi. Le nabo belekeja bāni?
6, 7. I bāni belekejibwe na ba Mosesa ne Ediya mu kimonwa kya kwalamuka kwa Yesu, ne i myanda’ka ya kamweno idi mu Bisonekwa itala boba bobelekeja?
6 Ba Mosesa ne Ediya nabo byobāmwekele mu ntumbo pamo na Kidishitu, nanshi bano batumoni babidi ba kikōkeji belekeja boba bakabikala pamo na Yesu mu Bulopwe bwandi. Kuno kwivwanija myanda amba Yesu udi na bakabikala nabo i kukwatañane na ntompejo ya mu kimonwa kya kubikikwa kwa Meshiasa kwāmwene mupolofeto Danyele. Danyele wāmwene “umo wifwene’nka na mwana muntu” upebwa “bufumu bwa kulādilamo nyeke” na “Kafulamoba”—Yehova Leza. Ino tala byālombwelwe Danyele kinondanonda na pene’pa. Usoneka’mba: “Bulopwe ne bufumu ne [bukatampe] bwa malopwe, munshi mwa mūlu monsomonso, bikapebwa ku bantu ba ku bapandulwemo ba Mwine Mukatakata Mwine.” (Danyele 7:13, 14, 27) I amo, Leza wāsokwele myaka tutwa tutano ne kupita kumeso kwa kwalamuka kwa Yesu amba “bapandulwemo” bakeabila ntumbo ya bulopwe na Kidishitu.
7 Le bano bapandulwemo ba mu kimonwa kya Danyele i bāni? I boba besambila’po mutumibwa Polo amba: “Aye Mwine Mushipiditu witabijanga bwa kamoni ku mishipiditu yetu’mba: Mudi bāna ba Leza. Wivwane shi twi bāna, nankyo twi bakupyana, bampyana ba Leza, bakupyana pamo na Yesu; shi wivwane tususuke pamo na aye, amba tutumbijibwe ntumbo pamo ponka bwa aye.” (Loma 8:16, 17) Bano bapandulwemo ke bangipo, i bana ba bwanga ba Yesu bashingwe māni. Mu Kusokwelwa, Yesu unena’mba: “Yewa wakunekenya nkamupa kushikata nami pa lupona lwami, monka mo nanekenyenye ami, nashikata ne Tata pa lupona lwandi.” Bano ‘ba kunekenya’ basangulwe, bantu 144 000, bakabikala na Yesu ntanda yonsololo.—Kusokwelwa 3:21; 5:9, 10; 14:1, 3, 4; 1 Kodinda 15:53.
8. Le bana ba bwanga ba Yesu bashingwe māni bengilanga namani mwāingidile ba Mosesa ne Ediya, ne i kulupuke bipa’ka?
8 Mwanda waka bene Kidishitu bashingwe māni i belekejibwe na ba Mosesa ne Ediya? Mwanda bano bene Kidishitu, pobakidi mu ngitu ya misunya, bengilanga mwingilo wiifwene na wāingile ba Mosesa ne Ediya. Kimfwa bengilanga bu Batumoni ba Yehova’nka ne mu kupangwapangwa mwine. (Isaya 43:10; Bilongwa 8:1-8; Kusokwelwa 11:2-12) Batulujanga na kininga mutōtelo wa bubela ne kwisāshila bantu ba mityima myoloke bepāne enka kudi Leza kete, pamo bwa ba Mosesa ne Ediya. (Divilu 32:19, 20; Kupituluka 4:22-24; 1 Balopwe 18:18-40) Le mwingilo wabo i mulupule bipa? Bine, i mulupule’byo! Kutentekela pa kukwasha kobakweshe ku mwingilo wa kukongakanya bashingwe māni ba mfulo, bakwashanga ne midiyo ya “mikōko mikwabo” ikale na mutyima wa kikōkeji kudi Yesu Kidishitu.—Yoano 10:16; Kusokwelwa 7:4.
Kidishitu Wavuya Bushindañani Bwandi
9. Kusokwelwa 6:2 ulombola namani mwikadile Yesu dyalelo?
9 Yesu pano ke Mulopwe mukomo, kakidipo muntu wa bituputupu ukandile pa kimbulu, mhm. Utelwa bu muntu ukandile pa kabalwe—kyelekejo kya bulwi mu Bible. (Nkindi 21:31) Kusokwelwa 6:2 unena’mba: “Na’mba; ntale, ne ku kabalwe katōka tō, pātantamine wabuta bwa miketo; ino wapebwa kilukwa, kadi kaenda munekenye wakunekenya.” Kadi, Davida mulembi wa mitōto wāsonekele pa mwanda utala Yesu amba: “Yehova ukatumanga mukombo wa bukomo bobe mu Ziona; bikala bulopwe umbukata mwa boba bakushikilwe.”—Mitōto 110:2.
10. (a) I muswelo’ka wāshilwile Yesu kukanda kabalwe ka kunekenya na ntumbo? (b) Bushindañani bubajinji bwa Kidishitu i buletele ba pano pa ntanda bonso bika?
10 Bushindañani bubajinji bwa Yesu wāshindile’bo balwana nandi bakomo—Satana ne bademona bandi. Wēbapangile mūlu, ne kwibela wēbela pano panshi. Ino mishipiditu imbi pa kuyuka amba kubebashadila kakitatyi katyetye, bapwilanga bantu mpumpu ya bulobo bwabo, ne kwibaletela malwa makatampe. Ano malwa elekejibwe mu Kusokwelwa na bantu basatu batentamine pa tubalwe. (Kusokwelwa 6:3-8; 12:7-12) Kukwatañana na bupolofeto bwa Yesu butala pa ‘kiyukeno kya kwikala’po kwandi ne kuvuika kwa ngikadilo ya bintu,’ kutentama pa tubalwe kwabo i kulete mavita, nzala, ne bipupo bileta lufu. (Mateo 24:3, 7; Luka 21:7-11) Pamo bwa bisanso bya lubutulo, bino bintu “bya pangalwilo pa misongo” bikenda bilundila’ko enka ne ‘bikanekenya’ Kidishitu kufika ne pa mfulo pa konakanya nkoka yonso ya bulongolodi bwa Satana bumweka na meso. *—Mateo 24:8.
11. Le mānga ya kipwilo kya bwine Kidishitu ibingija namani lupusa lwa bulopwe lwa Kidishitu?
11 Lupusa lwa bulopwe lwa Yesu i lumweke ne mu kulama kwalamine kipwilo kya bwine Kidishitu, mwanda wa kivuije mwingilo okipelwe wa kusapula musapu wa Bulopwe ntanda yonso. Nansha byokudi lwana lwa malwa lwa Babiloni Mukatakata—umbikalo wa ntanda yonso wa mitōtelo ya bubela—ne lwa imbikalo itushikilwe, mwingilo wa kusapula ao wendelelanga kumeso kadi ubafika pa ludingo kelwafikilwepo kashā mu mānga ya ntanda. (Kusokwelwa 17:5, 6) Bine, buno i bukamoni bukatampe bwa kubikala kwa Kidishitu!—Mitōto 110:3.
12. Mwanda waka bantu bavule kebanañunapo kwikala’po kwa Kidishitu kwampikwa kumweka?
12 Ino i kya bulanda mwanda bavule, kubadila’mo ne midiyo ya bantu betela bu bene Kidishitu, i batunye kunañuna bubine bwampikwa kumweka bufyeme kunyuma kwa binkumenkume bilongeka pano pa ntanda. Basepanga’nka ne kusepa na kibengo boba basapula Bulopwe bwa Leza. (2 Petelo 3:3, 4) Mwanda waka? Mwanda Satana i mwibasabe meso a mityima yabo. (2 Kodinda 4:3, 4) Bine, wāshilwile tamba kala kwibapūta kilenda kya fukutu wa ku mushipiditu pano kepadi tutwa twa myaka, wēbalekeja’nka ne lukulupilo lulēme lwa Bulopwe lwine.
Abaleka Lukulupilo lwa Bulopwe
13. Kilenda kya fukutu wa ku mushipiditu i kifikije bantu ku bika?
13 Yesu wālaile amba batupondo, badi pamo bwa bityani mu ñano, bakekuja mu kipwilo kya bwine Kidishitu ne kupondola bavule bene. (Mateo 13:24-30, 36-43; Bilongwa 20:29-31; Yude 4) Mwenda myaka, bano bene Kidishitu ba dijina bitupu bāitabije masobo, bisela, ne lufundijo lwa bujentaila, bēbishinga ne luvumba lwa “bwine Kidishitu.” Kimfwa Noele, i mitambe ku bisela bya butōtyi bwa Mithra ne Saturne, bilezaleza bya bajentaila. Ino i bika byālengeje boba betela bu bene Kidishitu ku kwitabija ano masobo a bujentaila? Dibuku The New Encyclopædia Britannica (1974) dinena’mba: “Noele, masobo a kubutulwa kwa Yesu Kidishitu, āshilwilwe’ko mwanda bantu bāikele kulengwa kutengela kobādi batengele kujoka kwa panopano kwa Kidishitu.”
14. Le lufundijo lwa Origène ne lwa Augustin lwāfulamwine namani bubinebine butala pa Bulopwe?
14 Ivwana kadi kunyengakanya kobanyengakenye buluji bwa kishima “bulopwe.” Dibuku Bulopwe bwa Leza mu Nshintulwilo ya Myaka Tutwa 20 (Angele) dinena’mba: “Origène [mwifundi wa teoloji wa mu myaka katwa ka busatu] washintyile mwingidijijo wa bwine Kidishitu wa kishima ‘bulopwe’ amba i umbikalo wa Leza mu mutyima wa muntu.” Le i kwepi kwāselele Origène buno bufundiji? Ke mu Bisonekwapo, ehe, i mu “lunkunkwa mulongo lwa mafilozofi ne mimweno ya ntanda, bintu bishile kulampe na mulangilo wa mu myaka yādi’ko Yesu ne kipwilo kibajinjibajinji.” Mu kitabo kyandi De Civitate Dei (Kibundi kya Leza), Augustin wa Hippo (354-430 K.K.) unena amba kipwilo akyo kine i Bulopwe bwa Leza. Uno mulangilo mwitupe na Bisonekwa o wāpele Bipwilo bya Kine Kidishitu kyalwilo kya mitōtelo yabo kwikuja mu mapolitike. Kadi i balwile luno lupusa mu bula bwa tutwa twa myaka, divule dine na kimpuma.—Kusokwelwa 17:5, 18.
15. Ngalatea 6:7 i mufikidile namani pa Bipwilo bivule bya Kine Kidishitu?
15 Ino dyalelo dino bipwilo byangulanga byobyākunine. (Ngalatea 6:7) Bivule byendanga bijimija lupusa lwabyo, pakwabo’nka ne bana ba kipwilo bene. Kino kintu i kimweke nakampata mu Bulaya. Mungya julunale Bwine Kidishitu Dyalelo (Angele), “mashikola makatampe a mu Bulaya [keakidipo] mobo a kutōtela’mo ino ke mobo a bintu bya kala, ashele apempulwa’nka na banangi.” Kino kikokeja kumweka ne mu bifuko bikwabo bya ntanda. Le kino kilombola bika pa mutōtelo wa bubela? Le usa kwifwila ao mwine mwanda ubabulwe ba kwiukwasha? Le mutōtelo wa bine utalwa namani na uno mwanda?
Witeakanye ku Difuku Dikatampe dya Leza
16. Mwanda waka mushikwa wenda uvudila’ko wa kushikwa Babiloni Mukatakata i wa kuta’ko mutyima?
16 Monka mulombwelanga mwishi ne buto butamba ku lūlu lulasa mudilo alo’ko lwadi ke lutalale amba pano kelusa kusabika ponka, mo monka ne mushikwa wenda uvula ushikibwa bipwilo mu bipindi bivule bya ntanda nao ulombola amba mafuku a mutōtelo wa bubela endanga afula. Panopano ponka, Yehova usa kutonona mapolitike a pano pa ntanda ekūkile mwa kuvūdila ne kusala Babiloni Mukatakata wa bwitwa bwa ku mushipiditu. (Kusokwelwa 17:15-17; 18:21) Le bene Kidishitu ba bine bafwaninwe kutyina uno mwanda ne byobya bisa kulongeka pa “kyamalwa kibūke” kisa kulonda’po? (Mateo 24:21) Nansha dimo! Abo bafwaninwe kusangala pasa kutukija Leza babi. (Kusokwelwa 18:20; 19:1, 2) Ivwana kimfwa kya Yelusalema mu myaka katwa kabajinji ne bene Kidishitu bādi bekele’mo.
17. Mwanda waka bengidi ba kikōkeji ba Yehova bakulupile amba mfulo ya ino ngikadilo ikebapita biyampe?
17 Bibumbo bya bene Loma byātekēle Yelusalema kasāla mu 66 K.K., ino bene Kidishitu balanguke ku mushipiditu kebāfityilwepo ne kuzakala, mhm. Byobādi befundi bayampe ba Kinenwa kya Leza, bāyukile amba “musala wakyo ubafwena” pabwipi. (Luka 21:20) Kadi bādi bayukile amba Leza usa kwibashitwila dishinda dya abo kunyema ne kumona mutyima-ntenke. Uno mukenga pa kumweka, bene Kidishitu bānyema. (Danyele 9:26; Mateo 24:15-19; Luka 21:21) Ne dyalelo nadyo monka na monka, boba bayukile Leza ne kukōkela wandi Mwana bafwaninwe kukulupila amba bikebapityila biyampe pasa kufula ino ngikadilo. (2 Tesalonika 1:6-9) I amo, pasa kuposoka kyamalwa kibūke, abo basa ‘kubandula mitwe yabo na nsangaji, ke-pantu kukūlwa kwabo kubafwena.’—Luka 21:28.
18. Le bikafula namani pakāya Koka kutamba bengidi ba Yehova kimpwididi?
18 Pasa kupwa konakanibwa Babiloni Mukatakata, Satana, Koka wa Makoka, usa kutamba kimpwididi Batumoni ba Yehova, bantu badi mu ndoe. Bibumbo bya Koka bikāya “pamo’nka bwa dikumbi kupūta ntanda,” bilanga amba bisa kutambula bushindañani bipēla byonka. Bine, i mwiko mukata wibatengele! (Ezekyele 38:14-16, 18-23) Mutumibwa Yoano usoneka’mba: “Namwene mūlu mwashitulwa, na’mba, ntale, ne ku kabalwe katōka, tō, ne utentaminepo wa dijina dya bu-Binebine ne dya bu-Mulumbuluke . . . Kadi ne mu kyakanwa mwamutamba lupete lwa būi, amba akupile nalo mizo.” Uno “mulopwe wa umbalopwe” kashindwe ukapandija batōtyi ba dikōkeji ba Yehova ne konakanya fututu balwana nabo bonsololo. (Kusokwelwa 19:11-21) Bine, kano ko kanketenkete ka kufikidila kwa kimonwa kya kwalamuka kwa Yesu!
19. Le bushindañani bwa mfulo bwa Kidishitu bukapityila bana bandi ba bwanga ba dikōkeji namani, ne tufwaninwe kulonga bika tamba’nka pano?
19 Yesu ukekala wa “kutendelwa mudi boba bonso bakwitabija mu dyodya difuku.” (2 Tesalonika 1:10) Le nobe usaka kukabadilwa mu boba bakemana ne kutendela Mwanā Leza ukatambula bushindañani? Nankyo endelela na kutamija lwitabijo lobe ne ‘kwiadija kala kutengela, mwanda mu difuku dyokutele’ko nansha mutyima mwine aye Mwanā muntu wafika kala.’—Mateo 24:43, 44.
Wilame Umbyonso
20. (a) Tukalombola namani amba tufwijanga’ko Leza pangala pa kwitupa kwaitupele “umpika wa binebine, udi na manwa”? (b) I bipangujo’ka byotufwaninwe kwiipangula batwe bene?
20 “Umpika wa binebine, udi na manwa” wisāshilanga kitatyi ne kitatyi bantu ba Leza bekale nyeke balanguke ku mushipiditu ne kwilama mu byonso. (Mateo 24:45, 46; 1 Tesalonika 5:6) Le usangelanga bino bivulujo bīya pa kitatyi kifwaninwe? Lelo utanga’ko mutyima shi kotūla bintu bya kutangidija mu būmi bobe? Ubulwe’po kwiipangula’mba: ‘Le mumweno wami wa ku mushipiditu unkwashanga mone senene Mwanā Leza ubikele momwa mūlu? Le mumonanga mwawisakenya mwa kwiila kufikidija butyibi pa Babiloni Mukatakata ne pa bikwabo bishele’ko mu ngikadilo ya Satana?’
21. Mwanda waka padi bamo kebadi na kafi ka ku mushipiditu, ne i bika byobafwaninwe kulonga pampikwa kwija?
21 Bamo belungile pano na bantu ba Yehova kebadi na kafi ka ku mushipiditu. Le i pa mwanda ababulwe kitūkijetyima ne kūminina pamo bwa bamo ba mu bana ba bwanga babajinji ba Yesu? Lelo i kuzumbija mutyima kwa umbūmi, kuswa kwa bupeta, nansha kupangwapangwa kwebōbika? (Mateo 13:3-8, 18-23; Luka 21:34-36) Padi bamo i bamone myanda kampanda ilupwilwe na “umpika wa binebine, udi na manwa” i mikomo kwivwanija. Shi bidi uno muswelo ne kodi abe, nabya tubakulombe wifunde Kinenwa kya Leza na kujokeja bupyasakane bobe ne kulomba Yehova akupe bukomo bupya, ne kupwana nandi kipwano kityite.—2 Petelo 3:11-15.
22. Lelo kubandaula kwa kimonwa kya kwalamuka kwa Yesu ne bupolofeto bukwatañene nakyo bibakutenga muswelo’ka?
22 Kimonwa kya kwalamuka kwa Yesu kyāpelwe bandi bana ba bwanga enka pa kitatyi kyobādi basakilwa kukankamikwa. Dyalelo netu tudi na kintu kikatampe mpata kya kwitukankamika—ke kufikidila kwa yoya ntompejo ya kutendelwa ne kwa bupolofeto buvule bukwatañene nayo kadi. Potumona kuno kufikidila kwa ntumbo ne buluji bwako mu mafuku āya kumeso, netu tulupulei na mityima yetu yonso malango ālupwile mutumibwa Yoano wānene amba: “Amena; iya Mfumwetu Yesu.”—Kusokwelwa 22:20.
[Kunshi kwa dyani]
^ Mu Kingidiki kibajinjibajinji, kishima kyalamwinwe bu “bya pangalwilo pa misongo” kishintulula pa bute pa bute “bisanso bya lubutulo.” (Mateo 24:8, Kingdom Interlinear) Kino kilombola amba pamo’nka bwa bisanso bya lubutulo, makambakano a ntanda akenda ebweja’ko mu kulondakana, mu bukomo, ne mu kwija, enka ne byoakanana ku kyamalwa kibūke.
Le Ukivulukile?
• Mu myaka ya 1870, kakisumpi katyetye ka befundi ba Bible kāivwanije bika bitala pa kujoka kwa Kidishitu?
• Kimonwa kya kwalamuka i kifikidile namani?
• Bushindañani bwa Yesu budi na lupusa’ka pa ntanda ne pa kipwilo kya bwine Kidishitu?
• Tufwaninwe kulonga bika shi tusaka kubadilwa mu bakapanda pakakonkeja Yesu bushindañani bwandi?
[Bipangujo bya Kifundwa]
[Kifwatulo pa paje 9]
Ntompejo pano ke mwanda mumweke
[Kifwatulo pa paje 10]
Le uyukile byalongekele pashilwile Kidishitu bushindañani bwandi?