Danyele 9:1-27
9 Mu mwaka mubajinji wa Dadiusa+ mwanā Ahaswelusa—wa ku lutundu lwa bene Mede wabikikilwe bu mulopwe pa bulopwe bwa bene Kaladea+—
2 mu mwaka mubajinji wa bulopwe bwandi, ami Danyele, najingulula kupityila ku mikanda* bungi bwa myaka yatelelwe mu kinenwa kyanenene Yehova kudi Yelemia mupolofeto ya kufikidija kusalwa kwa Yelusalema,+ ko kunena’mba myaka 70.+
3 Penepo natadija mpala yami kudi Yehova Leza wa bine, namuzenza mu milombelo, ne kushikilwa na nzala+ ne masāka ne buto.
4 Nalombela kudi Yehova Leza wami ne kwisapula bubi, kenena’mba:
“A Yehova Leza wa bine, Mwine mukatampe ne ulenga nzuba, ulamanga kipwano kyandi ne kulombola buswe bwa ndamatyidile+ ku boba bamusenswe ne balamine mbila yandi,+
5 tubapi mambo, tubaluba, kadi tubalonga bibi ne kutomboka;+ tubasāsuka mbila yobe ne butyibi bobe.
6 Ketwaivwenepo bengidi bobe bapolofeto,+ besambile mu dyobe dijina na balopwe betu, bamfumu betu, bakulutuba betu, ne bantu bonso ba ntanda’ya.
7 A Yehova, boloke i bobe, ino bumvu* i bwetu na motwikadile dyalelo, ne bwa bantu ba Yuda, bekadi ba Yelusalema, ne Isalela ense, boba ba kubwipi ne ba kulampe, mu matanda onso mowebapalakeninye mwanda bakulongēle bintu pampikwa kikōkeji.+
8 “A Yehova, bumvu* i bwetu, bwa balopwe betu, ne bamfumu betu, ne bakulutuba betu, mwanda tubakupi mambo.
9 Lusa ne lulekelo+ i bya Yehova Leza wetu, mwanda batwe tubamutombokela.+
10 Ketwakōkelepo diwi dya Yehova Leza wetu na kulonda bijila byandi byaatūdile ku meso etu kupityila kudi bengidi bandi bapolofeto.+
11 Isalela ense wajilwile bijila byobe kadi wasāsukile pa kuleka kukōkela diwi dyobe, ebiya nobe wetupungulwila mafingo ne mutyipo bisonekelwe mu Bijila bya Mosesa mwingidi wa Leza wa bine,+ mwanda twamupile mambo.
12 Aye wafikidije binenwa byandi byaanenene potudi+ ne padi balopwe betu badi betubikele,* wetuletela kyamalwa kikatampe; kashā kekwalongekele kintu munshi mwa madiulu onso pamo bwa kyokya kyalongekele mu Yelusalema.+
13 Monka mokisonekelwe mu Bijila bya Mosesa, kino kyamalwa kyonso kibetuponena,+ ino ketwazenzelepo* Yehova Leza wetu etutōkelwe mutyima na kuvundamina kilubo kyetu+ ne kulombola bujinguludi mu bubine* bobe.
14 “O mwanda Yehova wadi utala’nka kutala kadi wetuletele kyamalwa, mwanda Yehova Leza wetu i moloke mu mingilo yonso yalongele; ino batwe ketwakōkelepo diwi dyandi.+
15 “Shi ke pano, a Yehova Leza wetu, Abe watambije bantu bobe mu ntanda ya Edipito na kuboko kwa bukomo,+ welongela dijina kufika ne dyalelo,+ twi bapye mambo kadi twi balonge bibi.
16 A Yehova, mwendele bilongwa byobe byonso byoloke,+ nakwisāshila, bulobo bobe ne bukalabale bobe bisonsoloke Yelusalema kibundi kyobe, lūlu lobe lujila; ke-pantu, pa mwanda wa bubi bwetu ne bilubo bya bakulutuba betu, Yelusalema ne bantu bobe ke kintu kya kutukibwa ku bonso betujokolokele.+
17 Ino pano, a Leza wetu, ivwana milombelo ya mwingidi obe ne kuzenza kwandi, kadi eñenya mpala yobe pa kipandulwe kyobe+ kyobasadile,+ pa mwanda wa abe mwine, a Yehova.
18 A Leza wami, tá kutwi kobe wivwane! Pūtula meso obe umone musala wetu ne kibundi kyaityīlwe pa dijina dyobe; ke-pantu ketukuzenzangapo pa mwanda wa bilongwa byetu byoloke, ino i pa mwanda wa lusa lobe lukatampe.+
19 A Yehova, ivwana. A Yehova, lekela.+ A Yehova, tá mutyima ne kulonga’po kintu! Kokeja, pa mwanda wa abe mwine, a Leza wami, mwanda dijina dyobe dyaityīlwe pa kibundi kyobe ne pa bantu bobe.”+
20 Ponadi nekīsamba ne kulombela ne kwisapula bubi bwami ne bubi bwa bantu bami bene Isalela ne kulomba kutōkelwa mutyima ku meso a Yehova Leza wami pa mwanda wa lūlu lujila lwa Leza wami,+
21 bine, ponadi nekīsamba mu milombelo, muntu Ngabudyele,+ onamwene dibajinji mu kimonwa,+ waiya kondi ponadi mupungile bininge kubwipi na kitatyi kya kulambula kyabuntu kya kyolwa.
22 Waumpa ñeni, kanena’mba:
“A Danyele, naiya kukupa bujinguludi ne ñeni.
23 Powashilulanga kuzenza, kinenwa kibatambenga, nami naiya kukusapwila’kyo, mwanda abe wi muntu mulēme bininge.*+ Shi ke pano bandaula mwanda kadi ivwanija kimonwa.
24 “Kudi mayenga* 70 atungilwe bantu bobe ne kibundi kyobe kijila,+ mwanda wa kuvuya kujilula, kupwa bubi,+ kupūta kilubo,+ kuleta boloke bwa nyeke,+ kukoma kashé pa kimonwa ne bupolofeto,*+ ne kushinga Kijila kya Bijila* māni.
25 Ufwaninwe kuyuka ne kwivwanija’mba, kushilwila ku kutamba kwa kinenwa kya kulongolola ne kūbakulula Yelusalema+ kufika ne kudi Meshiasa*+ Mutangidiji,+ pakekala mayenga 7, ne mayenga 62.+ Ukalongololwa ne kūbakululwa, pamo ne kīkwe ne mukola, inoko mu bitatyi bya byamalwa.
26 “Kadi pa kupwa kwa mayenga 62, Meshiasa ukatyibwa’ko,*+ kwampikwa kintu kyandi nansha kimo.+
“Ebiya bantu ba mutangidiji umo usa kwiya, bakonakanya kibundi ne kifuko kijila.+ Kadi kikafudijibwa na dilobe. Kufika ne ku mfulo, kukekala divita; butyibi bukwetwe i musala.+
27 “Kadi ukalamina bantu bavule kipwano mu yenga umo; kadi pa bukata bwa yenga, ukafudija kitapwa ne kyabuntu kilambulwe.+
“Kadi pa dipapa dya bintu bya mukenye pakekala yewa uleta musala;+ kufika ne ku kukubijibwa, butyibi bukwetwe bukapungululwa ne pa yewa ulēle mu masala.”
Kunshi kwa Dyani
^ Ko kunena’mba, mikanda ikola.
^ Kishima pa kishima i, “bumvu bwa mpala.”
^ Kishima pa kishima i, “bumvu bwa mpala.”
^ Kishima pa kishima i, “batyibi betu badi betutyibila mambo.”
^ Nansha’mba “ketwanekenyepo mpala ya.”
^ Nansha’mba “bubinebine.”
^ Nansha’mba “musanshibwe bininge; mulēmekibwe kutabuka.”
^ Ko kunena’mba, mayenga a myaka.
^ Nansha’mba “Kijila Nakampata.”
^ Kishima pa kishima i, “mupolofeto.”
^ Nansha’mba “Mushingwe Māni.”
^ Nansha’mba “ukepaibwa.”
