Danyele 12:1-13
12 “Mu kine kitatyi’kya Mikele*+ ukemana, mfumu mukatampe+ wimanine bantu bobe.* Kukekala kitatyi kya tusua kekyaikele’ko tamba kashā kwikala muzo kufika ne mu kine kitatyi’kya. Kadi mu kine kitatyi’kya bantu bobe bakapanda,+ yewa ense utanwa mulembwe mu mukanda.+
2 Bavule mu boba balēle mu luvumbi lwa panshi bakalanguka, bamo ku būmi bwa nyeke, bakwabo ku mutonko ne ku kafutululo ka nyeke.
3 “Boba badi na bujinguludi bakeñenya tō pamo bwa lwelēle lwa mūlu, boba bafikija bavule ku boloke nabo pamo bwa ñenyenye, nyeke ne nyekeke.
4 “Ino abe Danyele, fya bino binenwa, kadi lamika mukanda kufika ne ku kitatyi kya ku mfulo.+ Bavule bakajokoloka,* kadi buyuki bwa bine bukavula.”+
5 Penepo ami Danyele, natala, namona bantu babidi bakwabo bemene kwine’kwa, umo ku luno lubungo lwa kamunonga, mukwabo nandi ku lubungo lukwabo lwa kamunonga.+
6 Ebiya umo wanena yewa muntu wadi uvwele bukonge,+ wadi peulu pa mema a kamunonga amba: “Le bino bintu bya kutendelwa bikafula kitatyi’ka?”
7 Penepo naivwana muntu wadi uvwele bukonge, wadi peulu pa mema a kamunonga, aye pa kutulula kuboko kwandi kwa lundyo ne kuboko kwandi kwa lunkuso mūlu ne kutyipa mu dijina dya Yewa udi’ko nyeke+ amba: “Kikekala pa kitatyi kitungwe, bitatyi bitungwe, ne kipindi kya kitatyi.* Pakafula’tu+ kutyumunwa bipindibipindi kwa bukomo bwa bantu bajila, bino bintu byonso bikafika ku mfulo yabyo.”
8 Ino ami, naivwene, inoko nkyaivwanijepo;+ ebiya naipangula’mba: “A mfumwami, le bino bintu bikafula namani?”
9 Penepo wanena’mba: “A Danyele, abe enda, mwanda bino binenwa i bya kufya ne kulamikwa kufika ne ku kitatyi kya ku mfulo.+
10 Bavule bakesubula ne kwitōkeja kadi bakoijibwa.+ Kadi babi bakalonga bibibibi, i kutupu mubi ukevwanija; ino boba badi na bujinguludi bakevwanija.+
11 “Tamba kitatyi kikatalulwa kitapwa kya kitatyi kyonso*+ ne kikatūlwa’ko kintu kya mukenye kileta musala,+ pakekala mafuku 1 290.
12 “Wa nsangaji i yewa ukungila nyeke* ne ufika ku mafuku 1 335!
13 “Ino abe, enda ku mfulo. Ukakōkolokwa, ino ukemana mwanda wa kipindi kyobe* ku mfulo kwa mafuku.”+
Kunshi kwa Dyani
^ Ko kushintulula’mba “Le I Ani Udi bwa Leza?”
^ Kishima pa kishima i, “bana bana-balume ba bantu bobe.”
^ Nansha’mba “bakabandaula’o [ko kunena’mba, mukanda] ne pa mfulo.”
^ Ko kunena’mba, bitatyi bisatu ne kipindi.
^ Nansha’mba “kitapwa kya nyeke.”
^ Nansha’mba “utengele na kipyupyu.”
^ Nansha’mba “mu kifuko kyobe kikupelwe na bubale.”
