Danyele 10:1-21
10 Mu mwaka wa busatu wa Kilusa+ mulopwe wa Peleshia, Danyele, mwine wadi witwa dijina dya bu Beleteshazale, wapebwa kusokwelwa;+ kadi mwanda’wa wadi wa bine, wadi wa bulwi bukatampe. Waivwanije mwanda’wa ne kupebwa ñeni ya byobya byawamwene.
2 Mu mene mafuku’a, ami Danyele, nadi ndila madilo+ mayenga asatu matuntulu.
3 Nkyadilepo byakudya bya bumeni, kadi mwita nansha vinyu kebyatwelelepo mu kyakanwa kyami, nkyeshingilepo māni mayenga asatu matuntulu.
4 Mu difuku dya 24 dya kweji mubajinji, ponadi ku lubungo lwa munonga mukatampe, wa Tigele.*+
5 Natala mūlu namona muntu uvwele bukonge,+ kadi wadi na mukaba wa olo* ya ku Ufaza mu kifuka kyandi.
6 Umbidi wandi wadi pamo bwa dibwe dya kisodite,+ mpala yandi yadi imweka bwa mapeni, meso andi adi pamo bwa byenge bya mudilo, maboko andi ne binyantyilo byandi byadi bimweka bwa mukuba ukelema,+ kadi diwi dya binenwa byandi dyadi pamo bwa diwi dya kibumbo.
7 Enka ami Danyele ye wamwene kimonwa’kya; bantu bonadi nabo kebamwenepo kimonwa.+ Ino luzakalo lukatampe lwebakwata, banyema bakafyama.
8 Penepo nashala bunka, kadi ponamwene kino kimonwa kikatampe, nkyashelepo na bukomo kadi mumwekelo wami wa bulēme wapwa, najimija bukomo bonso.+
9 Penepo naivwana diwi dyandi dīsamba; ino ami pa kumwivwana wisamba, napona mu tulo tukatampe mpala yami pa nshi.+
10 Ino penepa kuboko kwauntenga,+ kwaunjinya amba mfukate mu makasa ne mu manwi.
11 Ebiya waunena’mba:
“A Danyele, abe muntu mulēme bininge,*+ tá mutyima ku binenwa byonsa kwisamba nobe. Pano imana pa kyobe kyaba, mwanda i bantume kodi.”
Aye pa kunena namino, naimana koku nzakala.
12 Kupwa waunena’mba: “A Danyele, kokakwatwa moyo.+ Binenwa byobe byaivwenwe tamba difuku dibajinji dyowatele mutyima obe ku ñeni ne ku kwityepeja ku meso a Leza obe, kadi naiya pa mwanda wa binenwa byobe.+
13 Ino mfumu+ wa ntanda ya bulopwe bwa Peleshia waimene kulwa nami mafuku 21. Ino Mikele,*+ umo wa mu bamfumu bakatampe,* waiya kunkwasha; kadi naikala kwine’kwa kubwipi na balopwe ba Peleshia.
14 Naiya kukwivwanija kintu kisa kuponena bantu bobe ku mfulo ya mafuku,+ mwanda i kimonwa kya mu mafuku āya kumeso.”+
15 Ino paesambile nami bino binenwa, natadija mpala yami pa nshi, nakomenwa kunena.
16 Penepo yewa wadi umweka pamo bwa muntu wantenga ku milomo,+ naasama kyakanwa kyami kenena yewa wadi wimene ku meso ami amba: “A mfumwami, ntetemanga pa mwanda wa kimonwa, kadi nkidipo na bukomo.+
17 Le penepo mwingidi wa mfumwami ubwanya kwisamba na mfumwami namani?+ Mwanda pano nkidipo na bukomo, kadi nkikidipo na umpuya.”+
18 Yewa wadi umweka pamo bwa muntu wantenga monka, waunkomeja.+
19 Kupwa wanena’mba: “A muntu mulēme bininge,*+ kokikwatwa moyo.+ Ndoe ikale nobe.+ Wikomeje, bine, wikomeje.” Aye pa kwisamba nami nakomejibwa kenena’mba: “Mfumwami esambe, mwanda ubankomeja.”
20 Penepo wanena’mba: “Le uyukile kyonaila kodi? Pano kenjoka kukalwa na mfumu wa Peleshia.+ Shi nataluka, mfumu wa Ngidiki ukāya.
21 Inoko nsa kukulombola bintu bilembelwe mu bilembwa bya bubine. I kutupu unkwasha na bukomo mu bino bintu poso Mikele,+ mfumu wenu.+
