“Nusiamanen’o Zolana”
Kapu Kia 16
“Nusiamanen’o Zolana”
1. Nkia mambu metoma sivikisanga wantu ampa bekwenda lungananga muna tukutakanu twa Mbangi za Yave?
VAV’O wantu bekwenda lungananga e nkumbu antete kuna nkutakani ya Mbangi za Yave besivikanga e mpila zola kusongwanga ko. Bemonanga o zola kwaku muna ntambula betambulwanga ye kikundi kiambote. Anzenza bekwendanga kuna nkungi mieto mpe bemonanga o zola kwaku. Mwangi a nsangu mosi wasoneka mu kuma kia nkungi mieto: ‘Ke vena nkolw’a malavu ko ngatu nue a diamba. Ke vena miangu ko ngatu kazu. Ke vena mosi ko onungunanga wakaka. Ke vena mosi ko owandanga kinkodia kwa nkw’andi. Ke mosi ko odianga e ndofi yovo siba. Ke vena ye nsaka zambi ko ngatu mpova za nsoni. Ke vena mosi ko onuanga e fomo. Ke vena mwivi ko. Ke vena muntu ko otubanga e lekwa vana ntoto. Diasivi kikilu diakala.’ Mama mawonso i ziku kia mpil’a zola ke ‘kuvanganga mana malembi songa ko, ke kukuvàvila wandi wete ko.’—1 Korinto 13:4-8.
2. (a) Adieyi difwete zaywa mu kuma kia zola kweto? (b) Muna tanginina Kristu, nkia mpila zola tufwete songa?
2 O zola kw’ampangi i sinsu kiswasanisanga Akristu akieleka. (Yoane 13:35) Vava tunungunukanga muna mwanda, tulongokang’o songa o zola una ufwene. O Paulu wa ntumwa wasamba kimana o zola kwa ampangi zandi z’Akristu “kwanungunukin’o wokela.” (Filipi 1:9) O Yoane wa ntumwa wasonga vo o zola kweto kufwete kalanga kwa mvevo. Wasoneka vo: “Muna wau i tuzayidi o zola, e kuma kadi, yandi [Mwan’a Nzambi] wayekwela moyo andi muna yeto: oyeto mpe, tufwete yekwela mioyo mieto [mu kuma kia ampangi zeto, NW].” (1 Yoane 3:16; Yoane 15:12, 13) Nga tulenda vana e mioyo mieto mu kuma kia ampangi zeto? Kana una vo nanga ke tubwilwa diambu divavanga wo vanga ko, kansi nkia tezo tusilanga e ngolo muna kubasadisa owau, kana nkutu diampasi kuna kwa yeto?
3. (a) Nkia mpila tulenda songela o zola kweto una ufwene? (b) Ekuma dinina o mfunu dia siamanen’o zolana muntu yo nkw’andi owau?
3 Kumosi ye mavangu mesonganga e nzol’eto ya mvevo, tufwete zolanga mpe ampangi zeto. E Diambu dia Nzambi dikutuwondelelanga vo: “Mun’owu wa nzolani a ungudi, nukalaziana yo walakazi.” (Roma 12:10) Yeto awonso tuna ye aya tuluta zolanga. Kansi, nga tulenda songa o zola kwaku kuna kw’akaka mpe? Wau vo e tandu kiaki mu kwenda kina ku mfoko, diamfunu kwa yeto dia finamanga Akristu y’akweto. O Nkand’a Nzambi uvovanga vo: “E nsukilu a lekwa yawonso ifinamene. . . . vana ntandu a mambu mawonso nusiamanen’o zolana; kadi zola i kufùka mbidi a masumu.”— 1 Petelo 4:7, 8.
Vava Vebwangwa e Diambu
4. (a) Ekuma valenda bwil’e diambu vana vena ampangi muna nkutakani? (b) Kana una vo ke ntangwa zawonso ko tuvavang’o landa elongi dia Nkand’a Nzambi, nkia nluta miambote dilenda twasa kele vo tulemvokele dio?
4 Dia ludi vo, wau vo twakinu asumuki, vekalanga ye lumbu tuvanga edi dikendeleka akaka. Ampangi zeto mpe balenda kutusumukina mpila zayingi. (1 Yoane 1:8) Kele vo dibwididi ediadi adieyi ovanga? E Sono ivananga luludiku lwamfunu. Kansi, mana yivovanga nanga ke mau ko tuvavang’o vanga yeto asumuki. (Roma 7:21-23) Kansi kadi, e ngolo tuvanganga muna lemvokela luludiku lwa Nkand’a Nzambi i ziku kisonganga o luzolo lweto lwa yangidika Yave yo wokesa o zola kweto kw’akaka.
5. Kele vo muntu utuvangidi diambi ekuma ka tufwete vutulwila mbi muna mbi ko?
5 Akaka vava bevangangw’e mbi ezak’e ntangwa bevavanga land’e kunda kwa ndiona ubavangidi embi. Kansi, ediadi mpasi kaka diwokesanga. Kele vo tumbu kafwanukini o muntu, tufwete yekeka e diambu diadi va moko ma Nzambi. (Ngana 24:29; Roma 12:17-21) Akaka nanga balenda yambula vovana yo ndiona ubasumukini. Kansi ka tufwete dio vanga ko kwa asambidi y’akweto, kadi e nsambil’eto muna lenda tambuka, yivavanga vo twazolanga mpangi zeto. (1 Yoane 4:20) Muna kuma kiaki o Paulu wasoneka: “Nuvezananga mambu yo yambuziana, ovo muntu obakidi nkw’andi diambu; wauna kanuyambulwila o Mfumu, i una mpe nuyambulwila.” (Kolosai 3:13) Nga olenda wo vanga?
6. (a) Nkumbu kwa tufwete lolokanga ampangi zeto? (b) Nkia diambu tufwete zaya muna yeto kibeni dilenda kutusadisa mu zizidila ana batusumukini?
6 Adieyi tuvanga kele vo muntu utusumukini nkumbu miayingi kansi kavenge esumu diampwena ko dina dilenda kumvaikisisa muna nkutakani? Mu kuma ki’esumu diadi diandwelo, o Petelo wa ntumwa wavova vo unloloka “yamuna nkumbu nsambwadi.” Kansi o Yesu wavova: ‘Ke yamuna nkumbu nsambwadi ko: kansi yamuna nkumbu lusambwadi lua nsambwadi.’ Oyandi wasonga vo e mfuka tuvwilu kwa Nzambi isundidi ke mu yina tuvwidi kwa konso muntu ko. (Matai 18:21-35) E lumbu yawonso tusumukanga Nzambi mu mpila zayingi—ezak’e ntangwa mu kuma kievangu di’eloko, yovo mana tuvovanga yo yindula, yovo mu mana ke tulendanga vanga ko,—mana tusumukanga lembi zaya. (Roma 3:23) Elo, o Nzambi okutufwilang’aka e nkenda. (Nkunga 103:10-14; 130:3, 4) Ovavanga vo twavanga diau adimosi kwa muntu yo nkw’andi. (Matai 6:14, 15; Efeso 4:1-3) Ozevo, tusonga e mpila zola kwina vo “ke kubadika diambi ko.”— 1 Korinto 13:4, 5; 1 Petelo 3:8, 9.
7. Adieyi tufwete vanga kele vo o mpangi utulundidi ekasi?
7 Vena ye ntangwa tulenda mona vo o mpangi eto utulundidi ekasi kana una vo oyeto katusidi ye diambu kwa yandi ko. Tulenda kweto dio ‘fùka yo zola,’ nze una usonganga 1 Petelo 4:8. Yovo tulenda kuyivana yo kwenda mokena yandi muna vutulwisa e ngemba.— Matai 5:23, 24.
8. Kele vo akwikidi y’akw’aku bekutontanga o ntima adieyi difwete vangwa muna kuma kiaki?
8 Kuna diak’e sambu, dilenda kala vo o nkwikidi wa nkw’aku otontang’o ntima ke wa ngeye kaka ko kansi ye wa akaka mpe. Nga ke diambote ko vo muntu kamokena yandi? Elo. Kele vo ngeye kibeni wele mokena yandi kuna lembama kwawonso dilenda twasa nluta miambote. Kansi ofwete teka kukiyuvula: ‘Mana kevanganga nga metumbwanga muna Nkand’a Nzambi? Yovo mu kuma kia sia vo o lusansu ye ndongoka zame zaswaswana ye zandi?’ Keba walembi sia nsiku mia ngeye kibeni yo fundisa e diambu una obadikidi dio. (Yakobo 4:11, 12) O Yave lembi swaswanesa wantu otondanga wantu a nsi zawonso yo songa luzindalalu kwa yau ekolo benungunukanga muna mwanda.
9. (a) Nani ofwete tala mambu m’esumu diampwena muna nkutakani? (b) Nkia ntangwa dikalanga se mbebe kwa ndiona osumukinu mu teka vava singik’e diambu ye nkia kuma?
9 Kansi kadi, kele vo muntu muna nkutakani ovenge esumu diampwena nze dia zumba, vafwete talwa diambu vana vau. Aki nani bafwete dio tala? Akuluntu. ( Yakobo 5:14, 15) Kansi, kele vo osumukini muntu nanga mu kuma kia mambu ma kinkita, yovo mu vaikisa mpova za nsoni muna nu’andi, ozevo, ndiona osumukinu ofwete teka sadisa o nsumuki va yau kwau kaka. (Matai 18:15) Kele vo ediadi ka disingikidi e diambu ko, balenda vanga mana malende nze una uyikwanga muna Matai 18:16, 17. O zola kwa mpangi eto osumukini yo luzolo lwa vava ‘kunbaka’ lukutusadisa mu vanga wo mu mpila yilenda kunsadisila.— Ngana 16:23.
10. Vava vebwanga e diambu nki kilenda kutusadisa mu badikila dio mu mpila ifwene?
10 Vava vebwanga e diambu diampwena yovo diandwelo, tusadiswanga twazaya una kebadikilanga dio o Yave. Oyandi ketondanga konso mpila y’esumu ko, ye muna ntangw’andi, ana balembi viluk’o ntima muna masumu mau mampwena bevaikiswanga muna nkutakani andi. Kansi kadi, mbula yeto awonso twazaya wo vo tusumukanga ntangwa zayingi, ozevo nkenda yo luzindalalu lwandi tuvwang’o mfunu. Ozevo, o Yave osonganga e mbandu ina tufwete tanginina vava tusumukwanga kw’akaka. Vava tusonganga e nkenda kw’akaka, zola kwandi tusonganga.— Efeso 5:1, 2.
Vava e Mpila ya “Wokesela” Yo
11. Ekum’o Paulu kakasakesela esi Korinto mu “wokesa” o zola?
11 O Paulu ngonde zayingi kasala muna ludika e nkutakani kuna Korinto ya Ngerekia. Wasala kwayingi mu sadisa ampangi, ye wabazolanga. Kansi, vakala ye ana ke bansonganga zola ko. Akumbi kikilu bakala. Wabavovesa mu “wokesa” o zola kwau. (2 Korinto 6:11-13, NW ); 2Kor 12:15) Yeto awonso diambote twabadikanga e tezo tusongelanga o zola kw’akaka yo vava e mpila ya wokesela yo.— 1 Yoane 3:14.
12. Aweyi tulenda wokesela o zola kweto kwa awonso muna nkutakani?
12 Nga vena ye wantu muna nkutakani ke tulendanga finama yau ko? Kele vo tusia ngolo mu lembi badikanga konso fidiambu fibwidi—nze una tuzolanga vo oyau batuvanga—dilenda sadisa mu vutulwisa e ngwizani eto. Tulenda soba mpe e mpila twababadikilanga kele vo tuvav’o sia o meso muna fu yau yambote. Ediadi diwokesa o zola kweto kwa yau.— Luka 6:32, 33, 36.
13. Aweyi tulenda wokesel’o zola kwa ampangi muna nkutakani eto?
13 Dia ludi vo ka tulendi vanga mawonso tuzolele ko kwa akaka. Ka tulendi kayisa awonso muna konso lukutakanu ko. Ka tulendi bokela awonso ko beza dia yo yeto vava tudianga elambu y’akundi akaka. Kansi, nga katulendi bonga miniti kana miakete ko mu toma zaya muntu muna nkutakani eto? Nga tulenda lomba mu vaika mu salu kia umbangi ye mpangi ndiona ka tutomene zaya ko?
14. Vava tukalanga kumosi ye ampangi ana katuzeye ko, aweyi tulenda songela o zola kwa muntu yo nkw’andi?
14 E nkungi mia Kikristu mikutuvananga elau diampwena muna wokesa o zola kweto. Nanga mazunda belungananga ko. Ka tulendi mokena ye awonso ko, kansi tulenda songa muna nkal’eto vo tusianga ewete diau vana fulu kiantete ke mu dieto ko. Kuna mfoko ya konso kunku, tulenda vwa akaka o mfunu muna vav’o kaisa awana tufongele yau ku sambu dimosi. Vena ye lumbu kikala vo awonso bezingila ova ntoto bekala se ampangi za makento ye zamakala, tuyikana muna nsambila ya Nzambi aludi ye Se diawonso. Nkia mpila kiese kikala muna zaya muntu yo nkwandi! Osiamanen’o zolana kukutufila mu vava wo vanga. Ekuma olembi yantikila owau?
Yuvu ya Lufimpu
• Vava vebwanga e diambu vana vena Akristu, aweyi difwete singikilwa, mu nkia kuma?
• Wau tunungunukanga muna mwanda, o zola kweto mpe nkia mpila kufwete nungunukina?
• Aweyi tulenda songela o zola ke kwa akundi eto kaka ko kansi ye kw’akaka mpe?
[Yuvu ja longokela]
[Foto muna lukaya 148]
O zola kwa Kikristu kusongelwanga mu mpila zayingi, nze muna nkutakani
