Betania, vata diakete diakala, diavavuka kilometa 3 ye Yerusaleme. (Yoane 11:18) Vitila lufwa lwa Yesu, sumbula kiabwa kuna vata diadina. Lazaro, mosi muna akundi a Yesu wabakama kimbevo kiangolo yo fwa.

Vava Yesu kawá e nsangu zazi, wavovesa alongoki andi vo Lazaro waleka kakala, kansi wakala y’ekani dia kwenda kunsikamesa. (Yoane 11:11) Kansi, alongoki ke babakula nsas’a mvovo mia Yesu ko, muna kuma kiaki Yesu wabavovesa vo: ‘Lazaro ofwidi.’—Yoane 11:14.

Vioka lumbu yá tuka kina Lazaro kazikilwa, Yesu walwaka kuna Betania muna fiaulwisa Mareta wa nsang’a Lazaro. Mareta wavova vo: ‘E Mfumu, kele vo wakele vava, o mpangi’ame nga kafwidi ko.’ (Yoane 11:17, 21) Yesu wamvutula vo: ‘Mono i lufuluku yo moyo: On’okwikilang’omu mono, kana nkutu ofwidi, ozinga diaka.’—Yoane 11:25.

Muna songa vo mvovo miandi mialudi, Yesu wafinama vana ziami yo kaza vo: ‘E Lazaro, vaika!’ (Yoane 11:43) Wantu bakala vana ziami basivika vava bamona vo muntu wafwa ofulukidi.

Vitila lufuluku lwa Lazaro, Yesu wateka fula wantu wole. Lumbu kimosi, Yesu wafula dumbelele wa mwana Yairo. Vitila kafula dumbelele ndioyu, Yesu wanyikila vo waleka kakala.—Luka 8:52.

Yesu watezanesa lufwa yo tulu. Tulenda mona ziku kia diambu diadi vava kavovela lufwa lwa Lazaro ye lwa mwan’a Yairo. E nona kiaki kiamfunu kikilu. Ekuma? Ekuma kadi muntu avo olele kezayanga diaka diambu ko, i sia vo ovundidi muna mpasi ye ntantu zawonso. (Kimpovi 9:5; tala babu kina yo ntu a diambu vo  “O Lufwa Luna nze Tulu.”) Muna mpila yayi, alongoki a  Yesu batoma bakula dina dikutubwilanga vava tufwanga. O nkanda A Enciclopédia de Religião e Ética uvovanga vo: “Kuna kwa alongoki a Yesu o lufwa i leka o tulu, e ziame i fulu kia vundila . . . kuna kw’awana bafwa yo lukwikilu.” *

Dialufiaulwisu kwa yeto mu zaya vo amafwa baleka bena muna ziami ye ke bemonanga mpasi ko. Wau vo tuzeye dina dikutubwilanga vava tufwanga, ke tufwete monanga wonga wa mafwa ko.

Vava tuvundanga kuna tulu, nani okalanga yo luzolo lwa leka yakwele mvu? Aweyi tuzayidi wo vo awana baleka muna ziami besikama nze una wavangama kwa Lazaro yo mwana Yairo?

O Yobi wa selo kia Nzambi kuna nz’ankulu wayuvula kiuvu kiamfunu vava kamona vo se kefwa. Wayuvula vo: ‘O muntu avo ofwidi, ng’olenda zinga diaka?’—Yobi 14:14.

Yobi vava kayika diambu diadi kwa Nzambi wa Mpungu-ngolo, yandi kibeni wavana mvutu vo: ‘Okumbokela, yatambulwila. Osi’etima mun’evangu dia moko maku.’ (Yobi 14:15) Yobi wazaya wo vo Yave una y’etima dia fula selo kiandi kia kwikizi. Nga Yobi ndozi ankatu kalota? Ve.

O lufuluku kavanga Yesu, i ziku kisonganga vo Yave wamvana wisa kia fula mafwa. Nkand’a Nzambi usonganga vo Yesu watambula “nsabi za fwa ye nsi-a-fwa.” (Lusengomono 1:18) Yesu osinga ziula mwelo a ziami nze una kakatulwisila e tadi diakala vana mwelo a ziami kia Lazaro.

Nkumbu miayingi Nkand’a Nzambi uvovelanga nsilu a lufuluku. Mbasi mosi wavovesa Daniele wa ngunza vo: “Ovunda, yo telama muna tambula kunku kiaku kuna mbaninu a lumbu.” (Daniele 12:13) Yesu wavovesa Asaduki, i sia vo Afidi a nsambila y’esi Yuda ana ke bakwikilanga muna nsilu wa lufuluku ko vo: ‘Nwavila, wau nulembele zaya e Sono ngatu nkum’a Nzambi.’ (Matai 22:23, 29) Paulu wa ntumwa wavova vo: ‘Ngina ye vuvu muna Nzambi . . . vekala yo lufuluku lwa ansongi ye awana balembi songa.’—Mavangu 24:15.

O lufuluku lu’asongi y’ana balembi songa, nkia ntangwa lukala? O mbasi wavovesa Daniele wa ngunza vo otelama “kuna mbaninu a lumbu.” Mareta mpe wakwikilanga vo Lazaro wa mpangi andi “ofuluka muna lufuluku muna lumbu kiambaninu.”—Yoane 11:24.

Nkand’a Nzambi ufwananesanga e “lumbu kiambaninu” yo luyalu lwa Kintinu kia Kristu. Paulu wavova vo: ‘[Kristu] yala keyala kaka, yavana kevwa vindakes’atantu awonso kunansi a malu mandi. O ntantu osukinin’o tumbwa i fwa.’ (1 Korinto 15:25, 26) E kiaki i kuma tufwete lombelanga muna sambu vo Kintinu kia Nzambi kiza ye luzolo lwa Nzambi lwavangama ova ntoto. *

Yobi wazaya wo vo Yave osinga fula mafwa. Vava e diambu diadi divangama, o lufwa lusukiswa emvimba. Ke vekala diaka muntu oyuvula ko vo: ‘Nga lufwa i mfoko a mawonso?’