1, 2. Aweyi Yave katulongela o zola?

E MPILA yambote o se kalenda longela wan’andi i kubasonga e mbandu. Vava kesonganga o zola muna wan’andi, ukubalonganga una yau mpe balenda songela o zola. Ke vena muntu olutidi kutuzola ko avo ke Yave ko wa Se dieto. Muna mpila yayi, tulongokanga una tulenda songela o zola “kadi yandi wateka kutuzola.”—1 Yoane 4:19.

² Aweyi Yave kesongelanga vo yandi “wateka kutuzola”? Muna Nkand’a Nzambi tutanganga vo: “Wau twakal’asumuki, o Kristu watufwila.” (Roma 5:8) Yave wa Se dieto dianzodi wavana Mwan’andi se lukûlu muna kutuvevola muna sumu ye lufwa. Lukau lwalu lwantalu lwaziula e nzila kimana twafinama Yave yo kunsonga o zola. Yave watusonga e mbandu wau kavana lukau lwalu. Watulonga vo muna songa o zola tufwete kalanga akwa ntim’amvevo.—1 Yoane 4:10.

3, 4. Aweyi tulenda songela zola muna Nzambi?

³ O zola i fu kiantete kia Yave. Muna kuma kiaki, tulenda  bakula e kuma Yesu kavovela vo nkanikinu usundidi o nene i wau: “Zola Yave wa Nzambi aku yamuna nsi a ntim’aku yawonso, yo muna fulumwinu kiaku kiawonso yo muna nyindu aku wawonso, yo mun’efuka diaku diawonso.” (Maku 12:30) Yave ovavanga vo twanzolanga muna ‘nsi a ntim’eto yawonso.’ Yave kalendi yangalala ko avo tulutisi zola muntu yovo lekwa kiankaka ke mu yandi ko. Kansi o zola kweto muna yandi ke kufwete kala kwa nsi a ntima kaka ko. Yave ovavanga mpe vo twanzola muna ‘nyindu eto wawonso’ ye muna ‘ngolo zeto zawonso.’ Ediadi disongele vo tufwete zolanga Yave muna nyindu ye mavangu meto.—Tanga Mika 6:8.

⁴ Muna kuma kiaki, tufwete zolanga Yave muna kiwuntu kieto kiawonso ye yawonso tuna yau. Vava tukunsianga va fulu kiantete muna zingu kieto, tusonganga vo zola kikilu tukunzolanga. Muna longi diviokele, twavovele mpila yá o Yave kesongelanga e nzol’andi yanene muna wan’andi. Owau, yambula twazaya una tulenda wokesela zola kweto muna Yave yo songa vo zola tukunzolanga.

5. O yindula mawonso kevanganga o Yave muna wete dieto, adieyi dikutufilanga mu vanga?

⁵ Avo muntu uvene lukau, ka lukatikisu ko vo ovutulanga matondo. Vana ntandu, osadilanga lukau lwau kadi lwamfunu kwa ngeye. Yakobo wasoneka vo: “Konso lukau luambote, yo konso lukau luaziku, kuna ntandu luatuka, kw’Ese dia ntemo lukulumukanga, ona wina vo, kena ya soba-soba ko, ngatu tombe kia nzietoka.” (Yakobo 1:17) Tuvutulanga matondo wau vo Yave okutuvananga yawonso tuvuanga o mfunu muna zinga yo kala ye kiese. Wau tuzeye wo vo zola kikilu kekutuzolanga, yeto mpe tuzolele kunsonga vo zola tukunzolanga. Nga i wau omonanga?

6. Muna kwamanana sambulwa kwa Yave, adieyi diavavuanga kwa Aneyisaele?

⁶ Yave mambu mayingi mambote kavanga kwa Aneyisaele. Mu mvu miayingi, wabavana e nsiku mina miabafilanga ye yawonso bavuanga o mfunu muna zinga. (Nsiku 4:7, 8) Aneyisaele bafwana vutula matondo kwa Yave muna lemvokelanga e nsiku miami. Kasikil’owu, vava bavananga tukau kwa Yave, diavavanga vo bamvana “ina yantete ya ntomoni” a ntoto. (Luvaiku 23:19) Aneyisaele bazaya wo vo Yave wadi kwamanana kubasambula avo banlemvokele yo kumvana eyi yambote bakala yau.—Tanga Nsiku 8:7-11.

7. Aweyi tulenda sadila ‘mavwa’ meto muna songa kwa Yave vo zola tukunzolanga?

⁷ Yeto mpe tuzolele songa kwa Yave vo zola tukunzolanga muna kumvananga “vwa” kweto. (Ngana 3:9) Tuvanganga wo vava tusadilanga ina tuna yau muna kunkembelela. Kasikil’owu, tulenda vananga tukau muna yikama salu kia Kintinu kia nkutakani zeto ye kia nz’amvimba. Kiakala mavwa mayingi tuna mau yovo ve, yeto awonso tulenda sadila ina tuna yau muna songa zola kweto muna Yave. (2 Korinto 8:12) Kansi, vena ye mpila zankaka tulenda songela zola muna Yave.

8, 9. Nkia mpila yankaka tulenda songela zola kweto muna Yave? Adieyi mpangi Mike ye esi nzo andi bavanga?

 ⁸ Yesu watulonga vo twasianga Kintinu vana fulu kiantete yo lembi tokana kwayingi mu kuma kia madia ye mvuatu. O Se dieto wasia nsilu vo okutuvana yawonso tuvuidi o mfunu. (Matai 6:31-33) Wau vo tubundang’e vuvu muna Yave, tuzeye wo vo olungisa nsilu wau. Kadi, o muntu ona tutoma zolanga, tukumbundanga mpe vuvu. Avo tubundanga kikilu e vuvu muna Yave, o zola kweto mpe muna yandi kuwokela. (Nkunga 143:8) Tulenda kiyuvula: ‘Nga makani mame ye mpila isadilanga ntangwa ye ngolo zame isonganga vo izolanga kikilu Yave? Nga ikalanga ye vuvu vo Yave olungisa e nsatu zame za lumbu ke lumbu?’

⁹ Mpangi Mike ye esi nzo andi babundang’e vuvu muna Yave. Vava mpangi Mike kakala nleke, wakala ye kani dia kwenda samun’e nsangu zambote ku nsi yankaka. Kana nkutu vava kasompa yo wuta wana wole, kasoba kani diandi ko. Vava mpangi Mike ye esi nzo andi batanga e nsangu za mpangi z’akala ye z’akento ana bayenda sadila kuna kuvavanga ateleki ayingi, babak’e nzengo za vevola zingu kiau. Bateka e nzo au yo kwenda zingila mu nzo yakete. Mpangi Mike wakulula mpe lutangu lwa awana kasadilanga e salu kia luveleleso yo vava una kalenda fidila salu kiaki tuka kuna nsi yankaka muna sadila Internete. Muna kuma kiaki, mpangi Mike ye esi nzo andi bayaluka ku nsi yankaka. Batoma yangalela salu kiau kia umbangi kuna nsi yayina. Mpangi Mike wavova vo: “Twamona e ziku kia mvovo mia Yesu miasonama muna Matai 6:33!”

10. Nze una Davidi wa ntinu kavanga, ekuma dinina diambote mu badikanga mana tulongokanga mu kuma kia Yave?

¹⁰ Davidi wa ntinu wasoneka vo: “Ezulu ditelekanga nkembo a Nzambi; E ngambwila isonganga salu kiandi kia moko.” Wakudikila vo: “O nsiku a Yave walunga, uvutulwisa moyo: Mabika ma Yave masikidi, mevana ngangu kwa tunga.” Vava Davidi kabadikanga muna nsiku mia Yave ye muna lekwa kavanga, e ngwizani andi yo Yave yawokelanga yo kala ye tima dia songa zola kwandi muna yandi. Davidi wavova vo: “E mvovo mia nu’ame, ye mbalu za ntima, Mbula zatambukakana oko wina, E Yave w’etadi diame yo nkûdi.”—Nkunga 19:1, 7, 14.

11. Aweyi tulenda sadila zayi kekutulonganga o Yave mu songa zola kweto muna yandi? (Tala fwaniswa kuna lubantiku lwa longi.)

¹¹ O unu, Yave mayingi kekutulonganga mu kuma kiandi, kani diandi, nsema ye Diambu diandi. E nza ikasakesanga wantu mu longoka, kansi nkumbu miayingi e sikola zandá zifilanga wantu mu vidisa zola kwau muna Nzambi. Nswaswani ye nza, Yave kazolele kaka ko vo twavua o  zayi, kansi okutusadisanga mpe mu kala ye ngangu. Ozolanga vo twasadila mana tulongokanga muna wete dia yeto kibeni yo sadisa akaka. (Ngana 4:5-7) Kasikil’owu, Yave ozolanga vo twalonga o ‘zayi wa ludi’ kw’akaka yo kubasadisa kimana bavuluzwa. (1 Timoteo 2:4) Tusonganga zola muna Yave ye wantu vava tulonganga kwa wantu ayingi oma ma Kintinu kia Nzambi ye mana kilungisa muna wete dia wantu.—Tanga Nkunga 66:16, 17.

12. Adieyi mpangi mosi ankento kavova mu kuma kia lukau katambula kwa Yave?

¹² Aleke mpe balenda badika muna mawonso kevanganga o Yave muna wete diau ye mana kekubalonganga. Shannon wakinu sungamena una kamona muna lukutakanu lwa mvivu bayenda vava kakala ye kimbuta kia mvu 11, o mbunzi andi ankento kimbuta kia mvu 10. Muna kunku kimosi kia lukutakanu lwa mvivu lwakala yo ntu a diambu vo “Vumina Nzambi,” aleke awonso kumosi yo Shannon yo mbunzi andi balombwa vo bavuanda va fulu kiakubikwa mu kuma kia aleke. Kuna lubantiku o ntim’andi ke wakala wavuvama ko. Kansi wasivika vava konso nleke kavewa nkanda Os Jovens Perguntam —Respostas Práticas. Aweyi kamona mu kuma kia Yave vava katambula lukau lwalu? Wavova vo: “Tuka wauna, yabakula vo Yave una kieleka ye otoma kunzolanga. Ekwe kiese tuna kiau wau vo Yave wa Nzambi eto okutuvananga tukau twayingi twambote!”

13, 14. Adieyi tufwete vanganga avo Yave utuvene longi? Ekuma?

¹³ Nkand’a Nzambi ukutusungamesanga vo: “O Yave, ona kazola i kesemba; Nz’ese muna mwan’ona keyangalela.” (Ngana 3:12) Vava tutambulwilanga longi dia Yave yo yambula vo diatusingika, tulongokanga vanga edi diambote yo kututwasila luvuvamu. Kansi, ‘kuna lubantiku e longi ke dikalanga diakiese ko, dia ntantu kaka.’ (Ayibere 12:11) Kana una vo i wau, adieyi tufwete vanganga vava Yave kekutuvananga e longi? Ke tufwete vezanga longi dia Yave ko yovo lunda makasi avo ke tuyangalele longi batuvene ko. Wau vo Yave tuzolanga, tutambulwilanga longi diandi yo singika konso dina tufwete singika.

¹⁴ Muna lumbu ya Malaki, Ayuda ayingi ke bawilanga Yave ko. Ke batokananga ko wau vo tukau bavananga ke twanyangidikanga ko. Muna kuma kiaki, Yave wabatumba mu kuma kia diambu diadi. (Tanga Malaki 1:12, 13.) Yave nkumbu miayingi kabavananga e longi, kansi ke bazola kunlemvokela ko. Muna kuma kiaki, wabavovesa vo: “Ikunutwikil’e sibu, yasiba nsambu zeno.” (Malaki 2:1, 2) Ediadi disongele vo avo tukangidi matu muna longi dia Yave yo mona vo ke dina mfunu ko, tuvidisa e ngwizani eto yo yandi.

15. Nkia fu tufwete venga?

¹⁵ E nza ya Satana ikasakesanga wantu mu kala ye fu kia lulendo ye loko. Ayingi ke bezolanga singikwa ko yovo voveswa dina bafwete vanga. Akaka betambulwilanga kaka e longi kele vo komekenwa bakomekeno. Ke tufwete kala nze wantu awaya ko. Nkand’a Nzambi ukutuvovesanga vo twayambula ‘kuyisia fwani-fwani ye tandu kiaki.’ Tufwete zayanga dina Yave kevavanga kwa yeto yo vanga mana mekunyangidikanga. (Roma 12:2) Osadilanga nkubik’andi mu kutuvana luludiku muna ntangw’ambote. Kasikil’owu, tusungameswanga una tufwete kadilanga ye muntu una vo ke nkaz’eto ko, una tufwete solela akundi ye mpil’a nsaka tufwete sakana.  Vava tutambulwilanga e longi dia Yave yo vanga nsobani muna kunyangidika, tusonganga vo tuyangalelanga luludiku lwandi. Tusonganga mpe vo zola kikilu tukunzolanga.—Yoane 14:31; Roma 6:17.

16, 17. (a) Ekuma tufwete vavilanga zaya e ngindu za Yave vitila twabaka e nzengo? (b) Adieyi Aneyisaele bavanga vana fulu kia bund’e vuvu muna Yave?

¹⁶ O wan’akete bekalanga ye vuvu vo mase mau mekubasadisa yo kubatanina. Kana nkutu ambuta bevavanga lusadisu kwa mase mau. Kana una vo bafwana baka nzengo yau kibeni, bazeye wo vo mase mau balenda kubavana luludiku lwambote. O Yave wa Se dieto okutuyambulanga vo twabaka nzengo yeto kibeni. Kansi, wau vo tukumbundang’e vuvu yo kunzola, tuvavanga lusadisu lwandi yo vanga mawonso tulenda mu zaya e ngindu zandi vitila twabak’e nzengo. Avo tubundidi e vuvu muna Yave, okutuvana mwand’andi avelela mu kutusadisa twavanga edi diambote.—Filipi 2:13.

¹⁷ Muna lumbu ya Samuele, Aneyisaele basundwa vava banuana e vita ye Afelesetia. Vana fulu kia yuvula kwa Yave dina bafwete vanga, bavova vo: ‘Tubonga nkele ekangu dia Yave kuna Silo, yatuvuluza vana koko kwa mbeni zeto.’ E nzengo zazi nkia mfwilu zabatwasila? “Vakala mpond’angolo; muna Isaele yazi tatu ya wantu ivondelo. E Nkel’a Nzambi ikutumwinu.” (1 Samuele 4:2-4, 10, 11) Aneyisaele babanza vo avo banete e Nkele kuna vita, Yave okubasadisa yo kubatanina. Kansi, ke balomba lusadisu ko kwa Yave ngatu vava zaya e ngindu zandi. Bavanga dina bamona vo diambote yo kubatwasila mpasi zayingi.—Tanga Ngana 14:12.

18. Adieyi Nkand’a Nzambi ukutulonganga muna diambu ditadidi bund’e vuvu muna Yave?

¹⁸ Ntozi a nkunga ona watoma zolanga Yave yo kumbund’e vuvu wavova vo: “Sia Nzambi e vuvu, kadi ikumvana matondo muna luvuluzu lua ndose andi. E Nzambi ame, o moyo ame, ukafalele: Muna diadi ikuyindwila.” (Nkunga 42:5, 6) Nga i wau omonanga mu kuma kia Yave? Nga ngwizani ambote una yau yo yandi yo kumbund’e vuvu? Tulenda longoka una tulenda siamisina vuvu kieto muna yandi. Muna Nkand’a Nzambi tutanganga vo: “Bunda Yave e vuvu yo ntim’aku wawonso, kuyekamena waku umbakuzi ko: Muna ngyenda zaku zawonso untadila, oyandi osingika nzila zaku.”—Ngana 3:5, 6.

19. Aweyi olenda songela kwa Yave vo zola okunzolanga?

¹⁹ Wau vo wateka kutuzola, Yave okutulonganga una tulenda songela o zola muna yandi. Yambula twayindulanga mawonso kevanganga muna wete dieto ye mpila kekutuzolelanga. Tusonga vo tukunzolanga ye nsi a ntim’eto wawonso, fulumwinu, nyindu ye ngolo zeto zawonso.—Maku 12:30.