1, 2. а) Чьрʹа тӧ баԝәр и кӧ Йаһоԝа щьмәʹта хԝә һʹьз дькә? б) Мәрьв бь кʹижан һʹәԝщәтийе һатьнә әʹфьрандьне?

 ЧЬРʹА тӧ баԝәр и кӧ Йаһоԝа щьмәʹта хԝә һʹьз дькә? Пешийа кӧ тӧ щаба ве пьрсе бьди, дина хԝә бьдә ԝан мәсәла: Гәләк сал хушк у бьра бь дьл у щан Тайилен ԛәԝи дькьрьн. Ԝана жерʹа дьгот кӧ әԝ жь хԝә гәләк тьшт дәʹԝа нәкә. Тайилен дьбежә: «Һәрге Йаһоԝа әз һʹьз нәкьрама, әԝи ԝе ӧса тʹьме ширәт нәдана мьн». Брищите паши мьрьна малхе хԝә, дӧ зарʹед хԝә тʹәне мәзьн кьр. Әԝ дьбежә: «Мәзьнкьрьна зарʹа дь ве дьнйа Шәйтʹанда, йәк жь шьхӧле лапи чәтьн ә, илаһи бона ԝан йед кӧ би нә. Ле әз баԝәр ьм кӧ Йаһоԝа мьн һʹьз дькә чьмки әз чахе дьлтәнг дьбум у дьгьрийам, әԝ тʹәви мьн бу у тʹӧ щар нәдьһишт кӧ щерʹьбандьнед мьн жь ԛәԝата мьн дәр бьн» (1 Корьнтʹи 10:13). Нәхԝәшийа Сандрайе һәйә, кʹижан кӧ найе ԛәнщкьрьне. Сәр щьвата мәзьн хушкәк нәзики ԝе бу, у һʹале ԝе пьрси. Малхе ԝе дьбежә: «Рʹаст ә мә әԝ хушк шәхси нас нәдькьр, ле чахе әԝ незики мә бу, мә шабунәкә мәзьн сьтанд. Чахе хушк у бьра һәла һе һʹьзкьрьнәкә бьчʹук жи әʹйан дькьн, әз тʹәхмин дькьм кӧ Йаһоԝа чьԛас зәʹф мә һʹьз дькә».

² Йаһоԝа мәрьв ӧса әʹфьрандьнә кӧ әԝана һʹәԝщә нә һʹьз кьн  у ӧса жи һʹәԝщә нә ԝана һʹьз кьн. Ле мәрьв дькарә һеса дьлтәнг бә у һʹьзкьрьне һьндава хԝә тʹәхмин нәкә жь бо нәхԝәшийа, йан проблемед пʹәрава гьредайи йан жи чахе ԛӧльхкьрьнеда пешдачуйине навинә. Ле һәрге әм дьфькьрьн кӧ Йаһоԝа ида мә һʹьз накә, әм гәрәке биньн бира хԝә кӧ әм ԛимәт ьн бона ԝи, у әԝ тʹәви мә йә, дәсте мәйи рʹасте дьгьрә у али мә дькә. Йаһоԝа ԝе тʹӧ щар мә бир нәкә һәрге әм ԝирʹа амьн ьн (Ишайа 41:13; 49:15).

3. Чь дькарә ԛәԝи кә ве баԝәрийа мә кӧ Йаһоԝа мә һәртʹьм һʹьз дькә?

³ Әԝ мәрьвед кӧ дәрһәԛа ԝан жоре һатьбу готьне, баԝәр бун кӧ Хԝәде ԝәʹде тәнгасийа тʹәви ԝан бу. Әм жи дькарьн баԝәр бьн кӧ Йаһоԝа тʹәви мә йә (Зәбур 118:6, 7). Дь ве тʹемайеда әме шеԝьр кьн дәрһәԛа чар пʹешкʹешед Йаһоԝа, кʹижан кӧ избат дькьн, кӧ Йаһоԝа мә һʹьз дькә. Пʹешкʹеш әԝ ьн 1) әʹфьрине ԝи, 2) Кʹьтеба Пироз, 3) дӧакьрьн, 4) у кʹьрʹин. Һәрге әм бьфькьрьн дәрһәԛа ԝан тьштед баш чь кӧ Йаһоԝа бона мә кьрийә, әме һе зедә рʹази бьн жь Йаһоԝа бона һʹьзкьрьна ԝийә һәртʹьм. (Бьхунә Зәбур 77:11, 12.)

4. Әм чь педьһʹәсьн жь әʹфьринед Йаһоԝа?

⁴ Чахе әм әʹфьринед Йаһоԝа дьньһерʹьн, әм педьһʹәсьн кӧ әԝ чьԛас зәʹф мә һʹьз дькә (Рʹомайи 1:20). Мәсәлә, Йаһоԝа әʹрд ӧса әʹфьранд, кӧ әм дькарьн гәләк тьшт ль сәр бькьн, нә кӧ тʹәне бьжин. Әԝи һʹәму тьшт дайә мә, сәва кӧ әм жийина хԝәрʹа ша бьн. Мәрʹа хԝарьн лазьм ә, ле Йаһоԝа щурʹә-щурʹә хԝарьн дайә мә, у чахе әм әԝан хԝарьна дьхԝьн дьле мә хԝәш те (Ԝаиз 9:7). Хушкәк бь наве Катерина жь Канаде, чахе әʹфьрина дьвинә гәләк ԝе хԝәш те, илаһи чахе баһар дәстпедьбә. Әԝ дьбежә: «Рʹасти жи чьԛас әʹщебмайи йә кӧ ча һʹәму тьшт вәдьгәрʹә жийине: Кӧлирк ԝәʹде хԝә заньн у жь әʹрде дәрдькʹәвьн, тәйрәдә кӧ жь щийед гәрм вәдьгәрʹьн тен, ӧса жи колибьри, чʹьвика гәләк бьчʹук, кʹижан кӧ жь пьшт пʹәнщәра кʹохе мьн, щийе хԝарьна хԝә дьвинә. Рʹасти жи Йаһоԝа чьԛас зәʹф мә һʹьз дькә, ԝәки һаԛас гәләк тьштед һʹәԝас дайә мә». Баве мә Йаһоԝа әʹфьринед хԝә һʹьз дькә, у әԝ дьхԝазә кӧ әм жи ԝан әʹфьринарʹа ша бьн (Кʹаред Шандийа 14:16, 17).

5. Әԝ йәк кӧ Йаһоԝа мәрьв чь щурʹәйи әʹфьранд, ча һʹьзкьрьна ԝи дьдә кʹьфше?

⁵ Йаһоԝа мәрьв бь фәрәсәте ӧса әʹфьранд, кӧ әԝана дькарьн шьхӧле һʹәԝас бькьн у жь ԝе йәке шабуне бьстиньн (Ԝаиз 2:24). Әԝи шьхӧл дайә мәрьва кӧ әʹрде тʹьжә кьн, бещәр кьн у мьԛати мәʹсийа, тәйрәда, у тьштән дьн бьн йе сәр әʹрде (Дәстпебун 1:26-28). Һьн жи Йаһоԝа әм бь һʹӧнӧред ӧса баш әʹфьрандьнә, кӧ әм дькарьн чʹәʹв бьдьнә ԝи (Әфәси 5:1).

6. Чьрʹа әм гәрәке гәләк рʹази бьн бона Хәбәра Хԝәде?

⁶ Йаһоԝа Кʹьтеба Пироз дайә мә, чьмки әԝ мә гәләк һʹьз дькә. Әԝ мәрʹа дәрһәԛа хԝә гьли дькә у дьхԝазә кӧ әм бьзаньбьн әԝ һьндава мәрьва ча нә. Мәсәлә, әм жь Кʹьтеба Пироз педьһʹәсьн кӧ Йаһоԝа чаԝа бу һьндава Исраелийа, кʹижан кӧ гәләк щар гӧрʹа ԝи нәдькьрьн. Зәбур 78:38 дьбежә: «Бәле Хԝәде дьлован бу, ль фәсадийа ԝан дьбори [дьбахшанд], әԝ нәдьшандьн һәлаԛе [ԛьрʹ нәдькьрьн]; гәләк щаран ԝи дьгьрт һерса хԝә, ԝи нишан нәдьда тʹәваһийа хәзаба хԝә», (ИМ). Һәрге тӧ бьфькьри сәр ве рʹезе, әԝ йәк ԝе али тә бькә, кӧ фәʹм ки Йаһоԝа чьԛас зәʹф тә һʹьз дькә у бона тә хәм дькә. Әм дькарьн сәд сәләфи баԝәр бьн кӧ Йаһоԝа бона мә гәләк хәм дькә. (Бьхунә 1 Пәтрус 5:6, 7.)

7. Чьрʹа әм гәрәке Кʹьтеба Пироз ԛимәт кьн?

⁷ Әм гәрәке Кʹьтеба Пироз гәләк ԛимәт кьн. Чьрʹа? Чьмки Йаһоԝа бь Кʹьтеба Пироз мәрʹа хәбәр дьдә. Чахе де йан бав тʹәви зарʹа хԝә һʹәлал хәбәрдьдьн, әԝана һʹьзкьрьна  хԝә һьндава һәв ԛәԝи дькьн у итʹбарийа хԝә һәв тиньн. Йаһоԝа Баве мә йә кʹижан кӧ мә һʹьз дькә. Рʹаст ә мә әԝ тʹӧ щар нәдитийә у нә жи дәнге ԝи бьһистийә, ле әв тʹәви мә бь Кʹьтеба Пироз хәбәрдьдә. У әм гәрәке тʹьме гӧһ бьдьнә ԝи (Ишайа 30:20, 21). Чахе әм дьхуньн Кʹьтеба Пироз, әм Йаһоԝа нас дькьн у итʹбарийа хԝә ԝи тиньн. Әԝ рʹебәрийе дьдә мә у мә хԝәй дькә. (Бьхунә Зәбур 19:7-11; Мәтʹәлок 1:33.)

8, 9. Йаһоԝа дьхԝазә кӧ әм дәрһәԛа чь бьзаньбьн? Мәсәләке жь Кʹьтеба Пироз биньн.

⁸ Йаһоԝа дьхԝазә әм бьзаньбьн, кӧ әԝ мә һʹьз дькә, у әԝ дина хԝә дьдә сәр тьштед дьн, нә кӧ сәр нәԛәдандибуна мә. Әԝ тьштед баш нав мәда дьгәрʹә (2 Дирок 16:9). Ԝәрьн әм бьньһерʹьн мәсәләке, кӧ чаԝа Йаһоԝа тьштед баш нава пʹадшайе Щьһуда Йәһошәфатда дит. Йәһошәфат сафикьрьна нәрʹаст кьр чахе тʹәви Аһаб пʹадшайе Исраеле бу йәк у мьԛабьли Сурйайе дәркʹәт дь Рамот-гиләдеда. Рʹаст ә 400 пʹехәмбәред ԛәлп дьготьнә Аһабе зӧлм, кӧ ԝи шәрʹида әԝ ԝе сәркʹәвә, ле пʹехәмбәре Йаһоԝайи рʹаст Микайа готә Йәһошәфат у Аһаб, кӧ һәрге әԝана һәрʹьн шәрʹ бькьн, ԝе бьдьнә дәр. Һәма ӧса жи ԛәԝьми. Ԝи шәрʹида Аһаб һатә кӧштьне, ле Йәһошәфат анщах хьлаз бу. Паши ԝи шәрʹи, Йаһоԝа Йәһу да хәбате кӧ Йәһошәфат һьле у ширәт кә жь бо шашийа ԝи. Ле ӧса жи Йәһу готә Йәһошәфат: «Тәда тьштед ԛәнщ һатьн дитьн» (2 Дирок 18:4, 5, 18-22, 33, 34; 19:1-3).

 ⁹ Чәнд сал пешда Йәһошәфат фәрман дабу сәрԝера, левийа у кʹәшиша кӧ һәрʹьнә һʹәму шәһәред Щьһуда, сәва кӧ мәрьва ԛануна Йаһоԝа һин кьн. Ԝана әԝ шьхӧл ӧса рʹьнд кьрьн, кӧ һәла һе мәрьве жь мьләте дьн жи дәрһәԛа Йаһоԝа пеһʹәсийан (2 Дирок 17:3-10). Рʹаст ә паше Йәһошәфат сафикьрьна нәрʹаст кьр, ле Йаһоԝа кьрьнед ԝийә баш кʹижан кӧ әԝи бәре кьрьбу, бир нәкьр. Әв мәсәлә мә гәләк дьлгәрм дькә, чьмки щара әм жи шашийа бәрʹдьдьн. Ле һәрге әм бь дьл у щан ԝирʹа ԛӧльх дькьн, әԝ ԝе бәрдәԝам кә мә һʹьз бькә, у ԝе бир нәкә ԝан тьштед баш кӧ мә кьрийә.

10, 11. а) Чьрʹа дӧакьрьн пʹешкʹешәкә ԛимәт ә жь Йаһоԝа? б) Хԝәде ча щаба дӧайед мә дьдә? (Бьньһерʹә шькьле әʹԝльн.)

¹⁰ Бав кӧ зарʹед хԝә һʹьз дькә, ԝәʹдә дьвинә кӧ гӧһ бьдә ԝан чахе әԝана дьхԝазьн тʹәви ԝи хәбәрдьн. Бав дьхԝазә бьзаньбә һʹале зарʹед хԝә, чьмки әԝ хәм дькә бона ԝан. Баве мә Йаһоԝа жи ӧса нә. Әԝ мә дьбьһе чахе әм ԝирʹа дӧа дькьн. Хәбәрдана тʹәви Баве мә гәләк ԛимәт ә у ԛәдрәки гәләк мәзьн ә!

¹¹ Әм дькарьн Йаһоԝарʹа дӧа бькьн һәр гава. Әԝ досте мә йә, у әԝ тʹьме һазьр ә дӧайед мә бьбьһе. Тайлен, дәрһәԛа кʹижане кӧ жоре һатә готьне дьбежә: «Тӧ дькари һʹәму тьшти Йаһоԝарʹа бежи». Чахе әм дәрһәԛа фькьред хԝәйә кʹур Йаһоԝарʹа гьли дькьн, әԝ дькарә щаба мә бьдә бь Кʹьтеба Пироз, бь әʹдәбйәтед мә, йан жи бь хушк-бьра. Йаһоԝа дӧа-дьрозгед мәйә бь дьл дьбьһе. Һьн жи чахе тʹӧ кәс нькарә мә фәʹм кә, ле Йаһоԝа мә фәʹм дькә. Щабед ԝи сәр дӧакьрьнед мә избат дькьн, кӧ һʹьзкьрьна ԝи һьндава мә кʹӧта набә.

12. Чьрʹа әм гәрәке дина хԝә бьдьнә ԝан дӧа, кʹижан кӧ дь Кʹьтеба Пирозда һәнә? Мәсәле бинә.

¹² Әм дькарьн гәләк тьшт һин бьн жь дӧа, кʹижан кӧ дь Кʹьтеба Пирозда һәнә. У ԝе гәләк керһати бә, кӧ щара сәр ԛӧльхкьрьна тʹәви малбәте, дәрһәԛа ԝан дӧа шеԝьр кьн. Чахе әм бьфькьрьн сәр дӧайед ԛӧльхкʹаред Йаһоԝайи бәре, дӧайед мә ԝе һе баш бьн. Мәсәлә, әм дькарьн сәр дӧакьрьна Уньсә бь мьлукти бьфькьрьн, чахе әԝ дь зьке мәʹсийе мәзьнда бу (Уньс 1:17–2:10). Әм ӧса жи дькарьн сәр әԝе дӧакьрьна Сьлеманә бь дьл у щан бьфькьрьн, чахе әԝи ԝәʹде тʹәсмилкьрьна пʹарьстгәһе дӧа кьр (1 Пʹадшати 8:22-53). Ӧса жи гәләк керһати йә кӧ бьфькьрьн сәр дӧакьрьна Иса (Мәтта 6:9-13). Тʹьме бьра «хԝәстьна ԝә . . . Хԝәдева әʹйан бә». Бь ԝе йәке «әʹдьлайийа Хԝәде кӧ жь һәр һʹьш-аԛьли дәрбазтьр ә, ԝе дьл у фькьред ԝә . . . хԝәй кә». У рʹазибуна мә һьндава һʹьзкьрьна Хԝәде ԝе һе мәзьн бә (Филипи 4:6, 7).

13. Бь сайа кʹьрʹине әм кʹижан мәщале дьстиньн?

¹³ Йаһоԝа пʹешкʹеш дайә мә демәк кʹьрʹин, бь сайа кʹижани әм дькарьн жийина һʹәта-һʹәтайе ԛазанщ кьн (1 Йуһʹәнна 4:9). Паԝлос дәрһәԛа ԝе пʹешкʹеше кӧ һʹьзкьрьна Хԝәде әʹйан дькә, ньвиси: «Мәсиһ бона мә нәпʹака ԝәхтда мьр. Дәгмә бона мәрьвәки рʹаст йәк бьмьрә, бәлки бона мәрьвәки ԛәнщ йәке бьԝерә бьмьрә, ле бәле Хԝәде һʹьзкьрьна хԝә һьндава мәда һьнге да кʹьфше, гава әмә һе гӧнәкʹар бун, Мәсиһ бона мә мьр» (Рʹомайи 5:6-8). Кʹьрʹин әԝ әʹйанкьрьна һʹьзкьрьна Хԝәдейә лапә мәзьн ә, кʹижан кӧ мәщале дьдә мәрьва кӧ һәләԛәтийа ԝанә незик тʹәви Йаһоԝа һәбә.

14, 15. Кʹьрʹин чь те һʹәсабе бона а) Мәсиһийед рʹункьри? б) ԝан, гӧмана кʹе жийина сәр әʹрде йә?

¹⁴ Кʹомәкә бьчʹукә Мәсиһийа һʹьзкьрьна Йаһоԝайә һәртʹьм, бь щурʹәки мәхсус сәр хԝә тʹәхмин дькьн (Йуһʹәнна 1:12, 13;  3:5-7). Хԝәде әԝана кʹьфш кьрьн бь рʹӧһʹе пироз, у ләма әԝана ньһа тенә һʹәсабе ча зарʹед ԝи (Рʹомайи 8:15, 16). Рʹаст ә һьнәк жь рʹункьрийа һе сәр әʹрде нә, ле чьрʹа Паԝлос гот кӧ әԝана рʹуньштьнә «ль дийаре әʹзмана . . . бь сайа Мәсиһ Иса?» (Әфәси 2:6). Чьмки Йаһоԝа гӧмана жийина һʹәта-һʹәтайе сәр әʹзмана да ԝан (Әфәси 1:13, 14; Колоси 1:5).

¹⁵ Әԝед кӧ нәрʹункьри нә дькарьн бьбьнә досте Хԝәде, һәрге әԝана дьдьнә кʹьфше баԝәрийа хԝә һьндава кʹьрʹине. Мәщала ԝан жи һәйә кӧ бьбьнә зарʹед Хԝәде у бьжин сәр әʹрде щьнәтеда һʹәта-һʹәтайе. Демәк бь сайа кʹьрʹине Йаһоԝа һʹьзкьрьна хԝә һьндава һʹәму мәрьва әʹйан дькә (Йуһʹәнна 3:16). Чьԛас баш ә кӧ әм заньн һәрге әм Хԝәдерʹа амьн ԛӧльх дькьн, әԝ ԝе жийина сәр әʹрде бьдә мә! Ԝәрьн әм бьдьнә кʹьфше кӧ ԛимәт дькьн әԝе кʹьрʹине, кʹижан кӧ избат дькә һʹьзкьрьна Хԝәде кӧ кʹӧта набә.

16. Һәрге әм бьфькьрьн сәр һʹьзкьрьна Хԝәде, әме һелан бьн чь бькьн?

¹⁶ Әм нькарьн һʹәсаб кьн һʹәму щурʹе һʹьзкьрьна Йаһоԝа һьндава мә. Даԝьд Пʹадша сьтра: «Фькьред тә йед жь бо мьн, чьԛас бь рʹумәт ьн, әй Хԝәде, тʹәваһийа ԝан, чьԛас пʹьрʹ ьн! Һәгәр әз ԝан бьжмерьм, жь селаке [ԛуме] зедәтьр ьн» (Зәбур 139:17, 18, ИМ). Чахе әм бьфькьрьн сәр щурʹәщурʹә һʹьзкьрьна Йаһоԝа һьндава мә, әме һелан бьн кӧ ԝи һʹьз кьн, демәк щаба һʹьзкьрьна ԝи бьдьн.

17, 18. Бь кʹижан һьнә щурʹа әм дькарьн һʹьзкьрьна хԝә һьндава Хԝәде бьдьнә кʹьфше?

¹⁷ Әм дькарьн бь гәләк щурʹа һʹьзкьрьна хԝә һьндава Йаһоԝа бьдьнә кʹьфше. Мәсәлә әм дькарьн Йаһоԝарʹа бьдьнә кʹьфше кӧ әм ԝи һʹьз дькьн, чахе бь хирәт мәрьварʹа гьли кьн дәрһәԛа мьзгинийа Пʹадшатийе (Мәтта 24:14; 28:19, 20). Әм ӧса жи дькарьн һʹьзкьрьна хԝә һьндава Хԝәде бьдьнә кʹьфше, чахе амьн бьминьн ԝәʹде щерʹьбандьна. (Бьхунә Зәбур 84:11; Аԛуб 1:2-5.) Ле һәрге щерʹьбандьнед мә гәләк чәтьн бьн, әм дькарьн баԝәр бьн кӧ Йаһоԝа дьвинә һʹале мә у ԝе али мә бькә, чьмки әԝ мә ԛимәт дькә (Зәбур 56:8).

¹⁸ Һʹьзкьрьна мә һьндава Йаһоԝа дькарә мә һелан кә кӧ бьфькьрьн сәр һʹәму тьштед кӧ әԝи әʹфьрандийә. Чахе әм бь дьл у щан Кʹьтеба Пироз леколин дькьн әм әʹйан дькьн кӧ Йаһоԝа у Хәбәра ԝи һʹьз дькьн. Әм Йаһоԝарʹа тʹьме дӧа дькьн, чьмки әм ԝи һʹьз дькьн у дьхԝазьн кӧ һәләԛәтийа хԝә тʹәви ԝи ԛәԝи кьн. У чахе әм дәрһәԛа кʹьрʹина ԝийә ԛимәт дьфькьрьн, һʹьзкьрьна мә һьндава ԝи һе ԛәԝи дьбә (1 Йуһʹәнна 2:1, 2). Әԝ тʹәне һьнә тьшт ьн, кӧ чаԝа әм дькарьн әʹйан кьн, кӧ әм гәләк ԛимәт дькьн һʹьзкьрьна ԝи кӧ кʹӧта набә.