Һьнә ԛӧльхкʹаред Хԝәде һәма ӧса жи дьшьрмиш дьбьн. Ле әԝана рʹьнд заньн ширәта Паԝлос кӧ гәрәке бьзәԝьщьн тʹәне тʹәви «баԝәрмәнде Хӧдан»-у әԝана заньн кӧ әԝ ширәт бона һʹәму Мәсиһийа йә у әԝана жи гәрәке бьԛәдиньн (1 Корьнтʹи 7:39). Ле гәло чьрʹа һьнәк ӧса дьшьрмиш дьбьн чаԝа кӧ дәстпебуна тʹемайеда һатийә готьне?

Әԝед кӧ ӧса дьфькьрьн чаԝа жоре һатьбу готьне, дьшьрмиш дьбьн кӧ дь щьвата Мәсиһийада хушк һе зәʹф ьн нә кӧ бьра. Рʹасти жи дь гәләк ԝәлатада ӧса йә. Мәсәлә: Дь Корейайеда, ԝәкә 100 Шәʹдед Йаһоԝа азәп ьн, 57 хушк ьн у 43 жи бьра нә. Ле дь Колумбйайеда 66 сәләф хушк ьн у 34 сәләф бьра нә.

Дь һьнә ԝәлатада жи, чәтьнә кӧ бьзәԝьщьн сәр баԝәрмәнда, чьмки де-баве ԛизьке йед кӧ нәбаԝәр ьн, дькарьн ԛәләне гьран бьхԝазьн, жь бо чь жи бьред дәсттәнгрʹа чәтьн дьбә кӧ бьзәԝьщьн. Ләма хушк дькарә дьшьрмиш бә, кӧ нәреали йә ԝәки мер кә тʹәне тʹәви «баԝәрмәнде Хӧдан». Әԝ дьбәкә жи пьрсе бьдә хԝә: «Гәло әзе бькарьбьм дь щьватеда мәрьвәки хԝәрʹа лайиԛ бьвиньм?» a

Һәрге фькьре ӧса һатьнә һʹьше тә, баԝәр бә кӧ Йаһоԝа рʹьнд занә һʹале тә у дәрәщед тә. Бь  рʹастийе жи, дь ве дәрәщеда әԝ тә гәләк рʹьнд фәʹм дькә (2 Дирок 6:29, 30).

Ле ԝәки ӧса нә пьрс пешда те: Гәло чьрʹа Йаһоԝа әԝа тʹәми да щьмәʹта хԝә ԝәки бьзәԝьщьн тʹәне тʹәви баԝәрмәнде Хӧдан? Чьмки Йаһоԝа жь һʹәмушка баштьр занә чь щьмәʹта ԝирʹа ԛәнщ ә. Йаһоԝа нә кӧ тʹәне ԝе йәке дьхԝазә кӧ әм жь бо жьбартьна нәрʹаст нәчәрчьрьн, ле әԝ ӧса жи дьхԝазә кӧ әм бәхтәԝар бьн. Ԝәʹде Нәһәмийада гәләк мәрьвед щьһу дьзәԝьщин тʹәви нә щьһуйа, йед кӧ Йаһоԝарʹа ԛӧльх нәдькьрьн. Нәһәмийа дина ԝана да сәр мәсәла Сьлеман Пʹадша у ԝанарʹа гот, кӧ рʹаст ә Хԝәде Сьлеман һʹьз дькьр ле «жьнен бийан [хәриб] һʹәта ԝирʹа жи сущ дан кьрьн» (Нәһәмийа 13:23-26). Ләма иро жи Хԝәде тʹәмийе дьдә ԛӧльхкʹаред хԝә ԝәки бьзәԝьщьн тʹәне тʹәви ԝан, йед кӧ нава баԝәрийа рʹастда ньн (Зәбур 19:7-10; Ишайа 48:17, 18). Мәсиһийед рʹаст бь дьл у щан дьшекьриньн һʹьзкьрьн у хәмкьрьна Хԝәде у итʹбарийа хԝә рʹебәрийа ԝи тиньн. Бь ԝе йәке әԝана гӧрʹа Хԝәде дькьн, у ԛәбул дькьн кӧ әԝ ә Сәркʹаре лапи мәзьн (Мәтʹәлок 1:5).

Фәʹмдари йә кӧ һун нахԝазьн бькʹәвьнә «бьне нирәки» тʹәви мәрьве кӧ дьбәкә ԝә жь Хԝәде дур хә (2 Корьнтʹи 6:14). Гәләк Мәсиһийед иройин гӧрʹа ԝе ширәта Хԝәде кьрьн йе кӧ ԝана хԝәй дькә. У ԝана фәʹм кьр кӧ сафикьрьна ԝан бь аԛьлайи бу. Ле һьнәк щурʹәки майин сафикьрьна дькьн.

Меги b жь Австралйайе йә, әԝ гьли дькә чь ԛәԝьми паши ԝе йәке чахе әԝе дәстпекьр һәвалтийе бькә тʹәви нәбаԝәрәки. Әԝе гот: «Мьн гәләк щар щьват бәрдьдан, тʹәне сәва ԝе йәке кӧ кʹеләка ԝи бьм у рʹасти ԝи бем. Ләма жи әз рʹӧһʹанида гәләк кʹәтьм». Диса мәсәләк, Ратана жь Һьндьстане һәвале хԝәйи дәрсханеда бәгәм дькьр. Әԝи гәдәйи дәстпекьр һинбуна Кʹьтеба Пироз. Ле паше ԝәʹдә дәрбаз бу, әԝи да кʹьфше кӧ нета ԝи тʹәне әԝ бу, ԝәки һәләԛәтийа ԝийә романтик тʹәви ԛизьке һәбә. Ахьрийеда Ратана рʹасти һʹишт, у кʹәтә рʹелигийа дьнда, сәва кӧ мер кә тʹәви һәвале хԝәйи дәрсханеда.

Мәсәләкә дьн дәрһәԛа Ньдәнгайе жь Камеруне. Әԝе 19 салийа хԝәда мер кьр. Чахе дәргисти бу, дәргистийе ԝе соз дабу ԝе ԝәки бьһелә кӧ әԝ Хԝәдерʹа ԛӧльх кә. Ле паши дәʹԝате дӧ һʹәфти дәрбаз бу, мере ԝе ԛәдәхә кьр ԝәки әԝ һәрʹә сәр щьвата. Әԝ дьбежә: «Мьн хԝә тʹәне тʹәхмин дькьр у әз гәләк дьгьрийам. Мьн фәʹм кьр, кӧ әз хԝәха ида нькарьм сәрԝертийе хԝә бькьм. У тʹьме исафа мьн әз дьчәрчьрандьм».

Рʹаст ә һʹәму мере нәбаԝәр, хьраб у бефәʹм ниньн. Дьбәкә мере тә ԛәдәхә накә ԝәки тӧ Хԝәдерʹа ԛӧльх ки, ле һәла дьшьрмиш бә сәр ԝан пьрса: «Әԝ сафикьрьна тә кӧ тә нәбаԝәр станд, ча һʹӧкӧм бу сәр һәләԛәтийа тә тʹәви Баве тәйи әʹзмана?» Тӧ хԝә ча тʹәхмин дьки, чахе дьшьрмиш дьби кӧ тә һьлнәда ширәта ԝи, кӧ бона кʹара тә бу? У пьрса лапә фәрз, ле Хԝәде ча дьньһерʹә сәр сафикьрьна тә? (Мәтʹәлок 1:33)

Хушк бьред нав тʹәмамийа дьнйайе избат бунә кӧ зәԝаща тʹәви «баԝәрмәнде Хӧдан» сафикьрьна лапә баш ә. Әԝед кӧ азәп ьн ԛайим сафи кьрьнә, ԝәки дьле Хԝәде шакьн, әԝана дьхԝазьн бьзәԝьщьн тʹәне тʹәви ԛӧльхкʹаред Хԝәде. Мичико жь Жапонйайе чахе азәп бу, мәрьвед ԝейи незик зор дьданә ԝе, ԝәки йе нәбаԝәр бьстинә. Ле әԝе дит кӧ һәвал у насед ԝе хԝәрʹа һәвалзәԝащ дь щьватеда дьвиньн. Әԝ дьбежә: «Мьн тʹьме хԝәрʹа дьгот кӧ Йаһоԝа ‹Хԝәдейе хԝәзьли› йә, у бәхтәԝарийа мә ве йәкева гьредайи нинә кӧ әм азәп ьн йан на. Әз ӧса жи баԝәр дькьм кӧ әԝ хԝәстьнед дьле мә тинә сери. Ләма һәрге әм дьхԝазьн бьзәԝьщьн, ле нькарьн хԝәрʹа һәвалзәԝащ бьжберьн, ԝи чахи һе баш ә азәп бьминьн» (1 Тимотʹейо 1:11). Ахьрийе, Мичико мер кьр тʹәви бьраки рʹӧһʹани, у әԝ гәләк бәхтәԝар ә у ша йә ԝәки ләз нәкʹәт.

Һьнә бьра жи һивийе бун ԝәки хԝәрʹа һәвалзәԝащ бьвиньн, кʹижан кӧ ԝе бәгәм кьн. Мәсәлә Билл жь Австрйайе йә. Әԝ гьли дькә кӧ щар щара әԝи жьнед ве дьнйайе бәгәм дькьр. Ле әԝи изьн нәда хԝә ԝәки тʹәви ԝана незик һәвалтийе бькә. Чьрʹа? Чьмки әԝи нә дьхԝәст кӧ бькʹәта «бьне нирәки» тʹәви нәбаԝәра. Әԝи нава гәләк сала, һьнә хушк бәгәм дькьр, ле ԝана ԝи бәгәм нәдькьрьн. Паше 30 сал дәрбаз бу. У әԝи хушкәк дит кʹижан кӧ бәгәм кьр. Билл дьбежә: «Әз ԛә дәрһәԛа тʹӧ тьшти бәрхԝәнакʹәвьм». Әԝ  шьровәдькә: «Әз тʹәхмин дькьм кӧ мьн кʹәрәм станд, чьмки әз тʹәви жьна хԝә дьчьм сәр даннасинкьрьне, әм тʹәвайи леколин дькьн, у тʹәвайи Хԝәдерʹа ԛӧльх дькьн. Әз гәләк ша мә чахе рʹасти һәвалед жьна хԝә тем, чьмки әԝана жи ԛӧльхкʹаре Йаһоԝа нә. Әм дь зәԝащеда принсипед жь Кʹьтеба Пироз дьдьнә хәбате».

Һун чь дькарьн бькьн, чахе ԝә хәмед хԝә дайә дәсте Йаһоԝа? Һун дькарьн дьшьрмиш бьн мәсәлә һун чьрʹа нәзәԝьщи нә. Мәсәлә һәрге мәʹни әԝ ә кӧ һун дьхԝазьн бьзәԝьщьн тʹәне «тʹәви баԝәрмәнде Хӧдан», һун гәләк һежайи пʹайа нә, чьмки принсипа Хԝәде дьԛәдиньн. Дӧдьли нәбьн у баԝәр кьн, кӧ Йаһоԝа ԛәбул дькә у ԛимәт дькә кӧ ԝә сафи кьрийә гӧһ бьдьнә Хәбәра ԝи (1 Самуйел 15:22; Мәтʹәлок 27:11). Тӧ бәрдәԝан кә «дьле хԝә ԝәкә бәр» Хԝәде дӧакьрьнеда (Зәбур 62:8). Чахе тӧ тʹьме бь дьл у щан жь Хԝәде дӧакьрьнеда һиви дьки, дӧакьрьнед тә һе бь нет дьбьн. Һьн жи, һәрге тӧ һәргав мьԛати хԝәстьнед хԝә дьби, щерʹьбандьнада ԛайим дьсәкьни, һәләԛәтийа тә тʹәви Хԝәде ԝе рʹож бь рʹож һе ԛәԝи бә. Баԝәр кә кӧ Хԝәдайе Һьмзор мьԛати һʹәму ԛӧльхкʹаред хԝә дьбә, у тӧ жи бәр чʹәʹве ԝи гәләк ԛимәт и. Әԝ хәм дькә бона һʹәԝщед тә у хԝәстьнед тә. Рʹаст ә Хԝәде һәр кәсирʹа һәвалзәԝащ соз нәдайә. Лә һәрге һун рʹасти жи дьхԝазьн кӧ бьзәԝьщьн, Хԝәде занә ча хԝәстьна ԝә бинә сери, бь щурʹе баш (Зәбур 145:16; Мәтта 6:32).

Щара дьбәк тӧ хԝә чаԝа зәбурбеж Даԝьд тʹәхмин дьки, йе кӧ гот: «Зу бәрсив бьдә мьн, йа Хӧдан, рʹӧһʹе мьн дәрдькʹәвә. Рʹӧйе хԝә жь мьн нәньхемә» (Зәбур 143:5-7, 10, ИМ). Изьне бьдә Баве хԝәйи әʹзмана, ԝәки тәрʹа нишан кә чь бона тә дьхԝазә. Тʹӧ дькари әԝе йәке бьки чахе Хәбәра ԝи дьхуни у сәр дьфькьри. Ӧса тӧйе бьзаньби тʹәмийед ԝи, у тӧйе бьвини ча әԝи бәреда хԝә дьда кʹьфше һьндава щьмәʹта хԝә. Һәрге тӧ бь рʹастийе жи гӧһ бьди Хԝәде, тӧйе избат би кӧ рʹасти жи бь билани йә чахе гӧһдарийа ԝи дькьн.

Ча тӧ дькари азабуна хԝә, баш у керһати бьди хәбате? Тӧ азабуна хԝә дькари бьди хәбате һәрге һʹӧнӧред ӧса пешда бини, кʹижан кӧ ԝе гәләк керһати бьн дь жийина малбәтеда. Мәсәлә сәрԝахтбуна рʹӧһʹани, һʹәйфбун, хәбатһʹьзи, амьни, у наве баш дькари хԝәрʹа чеки (Дәстпебун 24:16-21; Рʹутʹ 1:16, 17; 2:6, 7, 11; Мәтʹәлок 31:10-27). Бәре пешьн Пʹадшатийа Хԝәде бьгәрʹә бь даннасинкьрьна хԝә у дь шьхӧлед дьнда. Әԝ йәк ԝе тә хԝәй кә. Билл дәрһәԛа кʹижани дь ве тʹемайеда һатьбу готьне, дәрһәԛа ԝи ԝәʹдәйи чахе дьхԝаст бьзәԝьщә, гьли дькә: «Әԝ ԝәʹдә ӧса зу дәрбаз бу! Мьн әԝ ԝәʹдә да хәбате ԝәки чаԝа пешәнг ԛӧльх кьм».

Рʹасти жи, бьзәԝьщьн сәр «баԝәрмәнде Хӧдан» реали йә. Һәрге тӧ гӧһ дьди әԝе принсипе, әԝ йәк ԝе али тә бькә кӧ Йаһоԝа рʹумәт ки у бьстини бәред баш. Кʹьтеба Пироз дьбежә: «Хԝәзи бь ԝан кӧ жь Хӧдан дьтьрсьн, бь әʹмьрен ԝи гәлләк дьлша дьбьн! Ԝе мала ԝи дь фьрәһи у дәԝләмәндийеда бә, Рʹастарийа ԝи һәр у һәр бьминә» (Зәбур 112:1, 3, ИМ). Хԝәрʹа сафи кә кӧ бьԛәдини әԝе принсипе кӧ бьзәԝьщи тʹәне «тʹәви баԝәрмәнде Хӧдан».