АХЬРЙА ЧЬQАС БАШ Ә! Әʹфьрандаре мә соз дайә, кö жийина һʹәта-һʹәтайе бьдә мә, wәки әм ль вьр сәр әʹрде бьжин. Гәләкарʹа чәтьн ә әве йәке баwәр бькьн. Әwана дьбежьн: «Wәʹдә те чахе һәр мәрьв дьмьрә. Жийин у мьрьн әв һәйә пʹара тʹәбйәти йа жийина мә». Һьнәк жи дьбежьн, кö мәрьв дькарьн һʹәта-һʹәтайе бьжин, ле нә сәр әʹрде. Ль гора гьлийе wан, мәрьв дькарә бьгьһижә жийина һʹәта-һʹәтайе паши мьрьне, гава һәрʹә ль сәр әʹзмен. Ле һуне чь бежьн?

Пешийа кö щаба ве пьрсе бьдьн, әм дькарьн шеwьр кьн wәки Кʹьтеба Пироз чь щабе дьдә сәр wан се пьрса: Әw кö чь щурʹәйи бәндә һатийә әʹфьрандьне, чаwа дьдә кʹьфше кö мәрьв чьqас гәрәке бьжита? Qьрарʹа Хwәдейә әʹwльн бона әʹрде у инсанәте чь бу? Чаwа мьрьн дәрбази инсанәте буйә?

Жь һʹәму әʹфьринед Хwәдейә сәр әʹрде, мәрьв бь рʹасти жи гәләк мәхсус ьн. Чь щурʹәйи? Кʹьтеба Пироз дьбежә кö мәрьв «дьлqе» Хwәдеда һатьнә әʹфьрандьне (Дәстпебун 1:26, 27, ПКʹМ). Әw чь те һʹәсабе? Әw те һʹәссабе кö мәрийарʹа хәйисәтед öса һатьбун дайине, кʹижан кö щәм Хwәде һәнә. Мәсәлә һʹьзкьрьн у һʹәqи.

Хенщи wе йәке мәрийарʹа һатьбу дайине фәрәсәтед öса, кö бькарьбьн бьфькьрьн у шеwьр кьн, бьзаньбьн чь йә рʹаст у чь йә хьраби, у хwәстьна хwә жи пек бинә, сәва кö дәрһәqа Хwәде һе зедә пебьһʹәсә. Ләма жи әм qимәт дькьн бәдәwийа гәрдуне у әʹфьрина, öса жи нәqьшкьрьна бәдәw, музике у һәлбәста. Хенщи wе йәке, мәрьв һьзрәт ә һәләqәтийа хwә тʹәви Әʹфьрандар чекә. Һәстед öса, мәрийа щöдә дькә жь әʹфьринед дьнә сәр әʹрде.

Һәла бьфькьрьн: Һәрге Хwәде бәндә әʹфьранд, кö жийина wан дьреж нәкʹьшинә, ле чьма Әw фәрәсәтед öса дайе мә, кʹижана кö әм дькарьн даһа баш кьн у һе мәзьн кьн? Бь рʹасти Хwәде әw фәрәсәт у хәйсәт дайә мәрьва, кö әwана бькарьбьн һʹәта-һʹәтайе сәр әʹрде жь wана ләзәте бьстиньн.

Һьнәк дьбежьн кö Хwәде qьрар нәкьрьбу, wәки мәрьв һʹәта-һʹәтайе бьжин. Әwана дьбежьн кö әʹрд мина маләкә wәʹдәлу бона мә һатийә әʹфьрандьне у әв wәк щерʹьбандьн ә, кö бьвиньн, һәла кʹижан мәрьв һежанә һәрʹьнә әʹзмен у тʹәви Хwәде һәрһәйи бьжин. Ле һәрге әв йәк öса буйа демәк дәрте wәки Хwәде щабдар ә бона һʹәму зöлмийе у хьрабийе, кö  сәр әʹрде тʹьжә буйә. Ле бь рʹасти әв йәк нә öса нә, чьмки Кʹьтеба Пироз дәрһәqа Хwәде дьбежә: «Һʹәму рʹийед wи һәqи нә. Хöдан амьн ә, нәһәqи щәм wи тʹöнәйә, әw һәq ә у ль сәр һәqийе йә» (Qануна Дöщари 32:4, ПКʹМ).

Кʹьтеба Пироз зәлал дькә qьрара Хwәдейә әʹсли бона әʹрде. Әw дьбәжә: «Әʹзман әʹзманед Хöдан ьн, ле әʹрд Wи да мәрьвайе» (Зәбур 115:16). Бәле, Хwәде әʹрд әʹфьранд кö әw бьбә маләкә бәдәw у һәрһәйи бона инсанәте. Әwи öса жи әʹрд тʹьжә кьр бь wан һʹәму тьшта, чьда кö әм һʹәwщә нә wәки бь жийинәкә һʹәта-һʹәтайе бьжин, ша бьн у ләзәте бьвьньн (Дәстпебун 2:8, 9).

«Әʹзман әʹзманед Хöдан ьн, ле әʹрд Wи да мәрьвайе» (Зәбур 115:16).

Кʹьтеба Пироз дәрһәqа qьрара Хwәде, йа бона инсанәте жи зәлал дькә. Әwи тʹәми дабу Адәм у Һевайе: «Әʹрде тʹьжи кьн у хwәйитийе ле бькьн, һʹöкöми ль сәр мәʹсийед бәʹре тәйрәдед әʹзмен у һʹәму һʹәйwанед ль сәр әʹрдейә кö дьһʹәжьн бькьн» (Дәстпебун 1:28, ПКʹМ). Qәдьрәки чьqас мәзьн бу бона wан, кö әwана гәрәке мьqати әʹрде буна у тʹәмамийа әʹрде бькьрана щьнәт! Бь рʹасти жи һевийа чьqас баш пешйа Адәм, Һевайе у зорʹәтед wан бу. Демәк әwана гәрәке ль сәр әʹрде һʹәта-һʹәтайе бьжитана, нә кö ль сәр әʹзмен.

Ле чьма әм дьмьрьн? Кʹьтеба Пироз дьбежә, кö әʹфринәки Хwәде йе рʹöһʹани мьqабьли Хwәде дәркʹәт у бу Шәйтʹан Мире-щьна. Әwи хwәст мьqабьли qьрара Хwәде дәре. Лә чь щурʹәйи?

Шәйтʹан, Адәм у Һева һелан кьрьн, кö әwана тʹәви wи бьбьнә йәк у мьqабьли Хwәде дәрен. У чахе әwи гот кö Хwәде тьштәки баш жь wана вәдьшерә, демәк тедәрхьн чь йә рʹаст у чь йә хьраб, һьнге wана алийе Шәйтʹан гьрт у пьшта хwә данә Хwәде. Әве йәке чь пәй хwә ани? Wәʹдә шунда чаwа кö Хwәде wанарʹа пешда готьбу, әwана мьрьн. Wана öнда кьр һевийа баш, кö дь Щьнәтеда һʹәта-һʹәтайе бьжин (Дәстпебун 2:17; 3:1-6; 5:5).

Мьqабьлибуна Адәм у Һевайе ль сәр тʹәмамийа инсанәте һʹöкöм кьрийә һʹәта рʹожа иройин. Хәбәра Хwәде дьбежә: «Чаwа бь мәрьвәки гöнә кʹәтә дьне у жь гöнә жи мьрьн һат, öса жи мьрьн сәр һʹәму мәрьва бәла бу» (Рʹомайи 5:12). Демәк әм дьмьрьн, чьмки жь де-баве мәйи пешьн, гöнә у мьрьн дәрбази сәр мә буйә, нә кö жь бо qьрара Хwәде.

Мьqабьлибуна дь бахче Адәнеда, qьрара Хwәде йа бона әʹрде у инсанәте нәтәмьранд. Һʹьзкьрьн у һәqийа Хwәде, әw һелан кьрьн мәщаләке чекә, кö мә жь дилтийа гöнә у мьрьне аза кә. Паwлосе шанди әве йәке öса шьроwәдьке: «Чьмки маше гöнә мьрьн ә, ле пʹешкʹеша Хwәде жийина һʹәта-һʹәтайе йә, бь сайа Хöдане мә Мәсиһ Иса» (Рʹомайи 6:23). Жь һʹьзкьрьне, Хwәде «кöрʹе хwәйи тайе тʹәне бәрва да, wәки һәр кәсе кö wи баwәр бькә öнда нәбә, ле жийина wийә һʹәта-һʹәтайе һәбә» (Йуһʹәнна 3:16). Иса бь һазьрбун жийина хwә бона мә кьрә qöрбан у бь wе йәке, әwи вәгәрʹанд һʹәму тьштед кö Адәм öнда кьрьбу. a

Зутьрәке, wе созед Хwәде дәрһәqа әʹрде щьнәте бенә сери. Тö дькари әв ахьрийа баш qазанч ки, һәрге гöһ бьди гьлийе Иса: «Дәре тәнгрʹа бькʹәвьнә һьндöрʹ, чьмки фьрә йә әw дәри у бәр ә әw рʹийа кö дьбә бәрбь öндабуне у гәләк ьн әwед кö wеда дьчьн; Ле гәләки тәнг ә әw дәри у зәʹмәт ә әw рʹийа кö дьбә бәрбь жийине у һьндьк ьн әwед кö wе рʹейе дьбиньн» (Мәтта 7:13, 14). Бәле, ахьрийа тә бьжартьна тәва гьредайи йә. Ле тöйе чь бьжбери?