1. Ԝан пашԝәхтийада һьнә ԝәлатада чь гӧһастьн ԛәԝьминә?

БЬ Һʹәзара сала, сәр дьнйайе һʹәчʹи зәʹф мәрьв баԝәрмәнд бун у щурʹә-щурʹә рʹелигийада бун. Ле ԝан салед пашԝәхтийеда, мәрьв гәләк һатьнә гӧһастьне. Чьԛас дьчә һе зедә у зедә дьбьнә нәбаԝәр. Мәсәлә, һьнә ԝәлатада һʹәчʹи зәʹф бьнәли дьбежьн, ԝәки әԝана нәбаԝәрмәнд ьн * (Мәт. 24:12).

2. Мәʹни дьбәкә чь йә, кӧ гәләк мәрьв нәбаԝәрмәнд ьн?

² Ле чьрʹа һе зедә мәрьв дьбьнә нәбаԝәрмәнд? * Чьмки һьнәк пәй рʹьһʹәтийе дькʹәвьн, йан жи пәй проблемед хԝә (Луԛа 8:14). Һьнәк дьбьнә атеист. Һьнәк жи Хԝәде баԝәр дькьн, ле дьфькьрьн, ԝәки рʹелигийа ида тьштәки кәвьн ә у кʹаре найнә, йан жи тʹәви зандарийе у логике һәв нагьрә. Әԝана дьбәкә жь һәвал, дәрсдар йан жи жь медийайе дьбьһен, ԝәки жийин бь сайа еволусийайе дәстпебуйә, ле дәрһәԛа мәʹнийед логики кӧ Хԝәде һәйә, һьндьки дьбьһен. Һьнәк жи нахԝазьн бькʹәвьнә нава религийайе, чьмки дьвиньн сәрԝеред рʹелигийа пʹәрәһʹьз у һʹӧкӧмһʹьз ьн. Һьнә щийада жи, сәрԝеред дәԝләте ԛанунед ӧса дәрхьстьнә, кʹижан кӧ изьне надьн мәрьв аза Хԝәде бьһʹәбиньн.

3. Нета ве готаре чь йә?

³ Иса тʹәми да мә, кӧ «һʹәму мьләта бькьн шагьрт» (Мәт. 28:19, ИМ). Ле әм ча дькарьн али мәрьвед нәбаԝәрмәнд бькьн, ԝәки Хԝәде һʹьз бькьн у бьбьнә шагьртед Мәсиһ? Әм гәрәке бир нәкьн, ԝәки мәрьв ча хԝә дьдә кʹьфше гава әм шәʹдәтийе дьдьн, ве йәкева гьредайи йә, кӧ әԝ ча у кʹидәре мәзьн буйә. Мәсәлә, мәрьвед кӧ Әԝропайеда мәзьн бунә, щӧдә дьбьн жь мәрьвед Асйайеда. Чьрʹа? Әԝропайеда,  гәләк мәрьв дәрһәԛа Кʹьтеба Пироз заньн у бьһистьнә кӧ Хԝәде һʹәму тьшт әʹфьрандийә. Ле Асйайеда, һʹәчʹи зәʹф мәрьв һьндьк йан жи ԛә тьштәки ньзаньн дәрһәԛа Кʹьтеба Пироз, у дьбәкә баԝәр накьн ԝәки Әʹфьрандар һәйә. Нета ве готаре әԝ ә, кӧ али мә бькә рʹастийе бьгьһиньнә дьле һʹәму мәрьва, фьрԛи тʹӧнә әԝана жь кʹидәре нә йан жи чь баԝәр дькьн.

4. Чьрʹа әм дькарьн ньһерʹандьна позитив хԝәй кьн?

⁴ Позитив бьн. Һәр сал, мәрьвед нәбаԝәр дьбьнә Шәʹдед Йаһоԝа. Гәләк жь ԝана нав-намус дьжитьн у дӧрʹутийа рʹелигийа бәр чʹәʹве ԝан рʹәш бу, һьнәк жи бь әʹмьре нәщайиз дьжитьн, ле гәләк жи гәрәке хәйсәтед хԝәйә хьраб бьтʹәрькандана. Пе аликʹарийа Йаһоԝа, әм дькарьн дӧдьли нәбьн, кӧ әме ԝан мәрьва бьвиньн, йед кӧ һазьр ьн мьзгинийе ԛәбул кьн (Кʹар. Шанд. 13:48; 1 Тимтʹ. 2:3, 4).

5. Гәләк щар чь мәрьва һелан дькә, кӧ гӧһ дьдьнә мьзгинийа мә?

⁵ Һʹәйф у Мәʹрифәт бьн. Гәләк щар мәрьв мьзгинийа мә рʹьнд ԛәбул дькьн, нә бона ве йәке кӧ мә чь ԝанрʹа готийә, ле ча мә ԝанрʹа готийә. Дьле ԝан те чахе әм дькʹәвьнә һʹәйра ԝан, ԝанрʹа һʹәйф у бь мәʹрифәт ьн. Әм зоре ԝан накьн кӧ гӧһ бьдьнә мә. Дәԝсе әм дьхԝазьн фәʹм кьн һәла ньһерʹандьна ԝан сәр религийа ча нә. Мәсәлә, һьнә мәри һʹьз накьн тʹәви мәрьвед нәнас дәрһәԛа религийа хәбәр дьн. Һьнәк жи һʹәсаб дькьн, ԝәки бемәʹрифәти йә кӧ жь мәрьва бьпьрсьн, ԝәки әԝ дәрһәԛа Хԝәде чь дьфькьрә. Һьнәк жи шәрм дькьн чахе кәсәк ԝана дьвинә кӧ Кʹьтеба Пироз дьхуньн, илаһи тʹәви Шәʹдед Йаһоԝа. Чь жи һәбә, әм гәрәке ньһерʹандьн у фькьред мәрьва һьлдьн һʹәсаб (2 Тимтʹ. 2:24).

6. Паԝлосе шанди чаԝа дьда кʹьфше, ԝәки әԝи ньһерʹандьна мәрьва һьлдьда һʹәсаб, у ча әм дькарьн чʹәʹв бьдьнә ԝи?

⁶ Ле әм чь дькарьн бькьн, һәрге тʹәхмин дькьн, ԝәки мәрьва хԝәш найе чахе әм хәбәред ӧса дьдьнә хәбате, ча «Кʹьтеба Пироз», «әʹфьрандьн», «Хԝәде» йан жи «религийа»? Әм гәрәке чʹәʹв бьдьнә Паԝлос у щурʹәки майин тʹәви ԝан мәрьва хәбәр дьн. Чахе Паԝлос тʹәви Щьһуйа хәбәр дьда, әԝи Ньвисаред Пироз дьда хәбате. Ле чахе тʹәви философед Йунани бәр щьвина Арйопагойе хәбәр дьда, әԝи хәбәрданеда бәʹса Кʹьтеба Пироз нәдькьр (Кʹар. Шанд. 17:2, 3, 22-31). Ле ча әм дькарьн чʹәʹв бьдьнә Паԝлос? Һәрге һун рʹасти ԝи мәрьви бен, кʹижан кӧ Кʹьтеба Пироз ԛәбул накә, ԝе баш бә ԝәʹде хәбәрдане конкрет бәʹса рʹезед жь Кʹьтеба Пироз нәкьн. Һәрге һун тедәрдьхьн, ԝәки мәрьв нахԝазә кәсәк ԝи бьвинә, кӧ әԝ тʹәви ԝә Кʹьтеба Пироз дьхунә, жерʹа рʹеза ӧса нишан кьн, ԝәки нәкʹәвә бәр чʹәʹва, мәсәлә жь һащәта әләктроник нишан кьн.

7. Сәва әм чʹәʹв бьдьнә Паԝлос, ль гора 1 Корьнтʹи 9:20-23, әм гәрәке чь бькьн?

⁷ Фәʹмкʹар бьн у Гӧһ Бьдьнә Мәрьва. Әм гәрәке фәʹм кьн, кӧ чьрʹа ньһерʹандьна мәрьва ӧса йә (Мәтʹлк. 20:5). Дина хԝә бьдьнә мәсәла Паԝлос. Әԝ нава Щьһуйада мәзьн бьбу. Ләма жи чахе әԝи мәрьвед нә жь мьләте Щьһурʹа мьзгини бәла дькьр, демәк ԝан мәрьварʹа, йед кӧ дәрһәԛа Йаһоԝа у Ньвисаред Пироз һьндьк йан жи ԛә тьштәк ньзаньбун, гәрәке щурʹе хәбәрдана хԝә бьгӧһаста. Ԝе баш бә әм леколина бькьн йан жи жь хушк-бьред щерʹьбанди пебьһʹәсьн, һәла мәрьвед мьһала мәда ча дьфькьрьн у чь тʹәхмин дькьн. (Бьхунә 1 Корьнтʹи 9:20-23.)

8. Чаԝа әм дькарьн дәрһәԛа Кʹьтеба Пироз хәбәрдане дәстпекьн?

⁸ Нета мә әԝ ә, ԝәки мәрьвед «һежа» бьгәрʹьн (Мәт. 10:11). Бона ве йәке, әм гәрәке мәрьва бьпьрсьн, кӧ әԝана дәрһәԛа фьлан тьшти чь дьфькьрьн у паше бь сәбьр гӧһ бьдьнә ԝан. Бьрак жь Инглистане мәрьва дьпьрсә, кӧ бь тʹәхмина ԝан,  мәрьв ча дькарә зәԝащеда бәхтәԝар бә, чаԝа зарʹед хԝә рʹаст мәзьн кә, йан жи чаԝа бәр нәһәԛийе тәйах кә. Әԝ гӧһ дьдә щабед ԝан, у паше пьрсе дьдә ԝан: «Һун ча дьфькьрьн, әва ширәта кӧ ԝәкә 2 000 сал пешда, һатийә ньвисаре, ԝе керһати бә?» У әԝ тʹела хԝәда рʹезед жь Кʹьтеба Пироз ԝанрʹа дьхунә, ле хәбәра «Кʹьтеба Пироз» надә хәбате.

9. Әм ча дькарьн али ԝан мәрьва бькьн, йед кӧ хԝә жь хәбәрдана дәрһәԛа Хԝәде дур дьгьрьн?

⁹ Чаԝа әм дькарьн Хәбәра Хԝәде бьгьһиньнә дьле ԝан мәрьва, йед кӧ хԝә дур дьгьрьн жь хәбәрдана дәрһәԛа Хԝәде? Әм дькарьн тʹәви ԝан дәрһәԛа ԝан тьшта шеԝьр кьн, кʹижан кӧ ԝанрʹа һʹәԝас ьн. Мәсәлә, гәләк мәрьв әʹщебмайи дьминьн сәр тʹәбийәте у әʹфьрина. Ләма жи әм дькарьн ԝанрʹа тьштәки ӧса бежьн: «Һун дьбәкә заньн, ԝәки зандара тьштед тʹәбийәте леколин кьрьнә, у мина ԝан әʹфьрина тьшт чекьрьнә. Мәсәлә, йед кӧ микрофон чекьрьнә, гӧһ леколин кьрьнә, ле йед кӧ камера чекьрьнә, чʹәʹв леколин кьрьнә. Ле бь тʹәхмина ԝә кʹе чʹәʹв у гӧһ әʹфьрандийә?» Чахе мә рʹьнд гӧһ да щаба ԝан, паше әм дькарьн бежьн: «Әз тьштәки һʹәԝас пеһʹәсийамә жь поетәки бәре, кӧ ньвисийә: ‹Ма йе кӧ гӧһ әʹфьрандьнә, ԛәй нькарә бьбьһизә? Йан жи әԝе кӧ чʹәʹв чекьрьнә, ма нькарә бьвинә? Ԛәй Йе, кӧ занйарийе һини мәрьва дькә, гәло әԝ ньзанә?›. Һьнә зандар ԝан гьлийарʹа ԛайил ьн у баԝәр дькьн, ԝәки әʹфьрандар һәйә» (Зәб. 94:9, 10, ДО). Паши ве йәке, әм дькарьн jԝ.org^®-да «Интервиу у Сәрһатида» видеоке нишани ԝан кьн, бьн ве бьнсәрида «Ньһерʹадьна сәр Пешдаһатьна Әʹмьр» (Бькʹәвьн НӘШЬРКЬРЬН > ВИДЕО). Ӧса жи әм дькарьн бьрошура «Гәло Жийин Һатийә Әʹфьрандьн?» йан «Канйа Әʹмьр-Пенщ Пьрсед Фәрз» бьдьнә ԝан.

10. Әм ча дькарьн хәбәрдане дәстпекьн тʹәви ԝан мәрьва, йед кӧ нахԝазьн дәрһәԛа Хԝәде хәбәр дьн?

¹⁰ Һʹәчʹи зәʹф мәрьв дьхԝазьн ахьрийа ԝан баш бә. Ле гәләк дьтьрсьн, ԝәки әʹрд ԝе ԝеран бә, йан жи жийина сәр әʹрде ԝе кʹӧта бә. Бәрпьрсийарәки мьһале жь Норԝәже дьбежә, ԝәки мәрьвед кӧ нахԝазьн дәрһәԛа Хԝәде хәбәр дьн, гәләк щар дьхԝазьн дәрһәԛа һʹале дьнйайе хәбәр дьн. Чахе әԝ мәрьва сьлав дькә, паше дьбежә: «Һун ча дьфькьрьн, ахьрийа мә ԝе чаԝа бә? Гәло ахьрийа мәйә баш политикава, зандарава йан жи кәсәки дьнва гьредайи йә?» Паше чахе әԝ щаба мәрьва дьбьһе, рʹезәкә жь Кʹьтеба Пироз, кʹижан кӧ дәрһәԛа ахьрийа баш ә, дьхунә йан жи бь әзбәри дьбежә.  Һьнә мәрьварʹа һʹәԝас ә һе зедә пебьһʹәсьн дәрһәԛа созе жь Кʹьтеба Пироз, кʹидәре те готьне, ԝәки әʹрд ԝе һʹәта-һʹәтайе бьминә у мәрьвед ԛәнщ ԝе сәр һʹәта-һʹәтайе бьжин (Зәб. 37:29; Ԝаиз 1:4).

11. Чьрʹа әм гәрәке һьндава мәрьва щурʹә-щурʹә метода бьдьнә хәбате, у чаԝа әм дькарьн чʹәʹв бьдьнә Паԝлос, дәрһәԛа кʹижани Рʹомайи 1:14-16-да те готьне?

¹¹ Ԝе баш бә әм щурʹә-щурʹә метода бьдьнә хәбате тʹәви щурʹә-щурʹә мәрьва. Ле чьрʹа? Чьмки һәр мәрьв щурʹәки йә. Чь кӧ йәкерʹа һʹәԝас бә, дькарә йе майинрʹа һʹәԝас нибә. Һьнәка хԝәш те дәрһәԛа Хԝәде у Кʹьтеба Пироз хәбәр дьн, ле һьнәкарʹа жи һʹәԝас ә дәрһәԛа тьштед майин хәбәр дьн. Чь жи һәбә, әм гәрәке һәр мәщале бьдьнә хәбате, сәва тʹәви һʹәму щурʹә мәрьва хәбәр дьн. (Бьхунә Рʹомайи 1:14-16.) Әм ӧса жи гәрәке бир нәкьн, ԝәки тʹәне Йаһоԝа рʹастийе дьле ԝан мәрьвада мәзьн дькә, йед кӧ рʹастийе һʹьз дькьн (1 Корн. 3:6, 7).

12. Ча әм дькарьн али мәрьвед жь ԝәлатед Асйайе бькьн, йед кʹур нәфькьринә сәр ве йәке кӧ Әʹфьрандар һәйә?

¹² Нав тʹәмамийа дьнйайеда, гәләк мьзгинван рʹасти ԝан мәрьва тен, йед кӧ Хԝәдейе рʹаст баԝәр накьн, у ӧса жи рʹасти мәрьвед жь ԝан щийа тен, кʹидәре сәрԝеред дәԝләте бона рʹелигийа синора датиньн. Гәләк ԝәлатед Асйайеда, мәрьв бь рʹасти нә жи кʹур фькьринә сәр ве йәке, кӧ Әʹфьрандар һәйә. Һьнә мәрьв зу ԛәбул дькьн һинбуна Кʹьтеба Пироз, чьмки дьхԝазьн тьштед тʹәзә пебьһʹәсьн, һьнәкарʹа жи һʹәԝас нинә тьштед тʹәзә пебьһʹәсьн. Әм ча дькарьн али ԝан бькьн? Һьнә мьзгинванед щерʹьбанди хьзмәтийеда һе пешдачуйи дьбьн, чьмки хәбәрдане бь һәвалти дәстпедькьн, мәрьварʹа дьдьнә кʹьфше бона ԝана хәм дькьн, у гьли дькьн кӧ ча бь сайа хәбьтандьна принсипед жь Кʹьтеба Пироз, әʹмьре ԝан алийе башда һатийә гӧһастьне.

13. Чь щурʹәйи әм дькарьн һʹәԝаса мәрьва һьндава Кʹьтеба Пироз пешда биньн? (Бьньһерʹә шькле руйе журнале.)

¹³ Гәләк мәрьв бәгәм дькьн биланийа кӧ Кʹьтеба Пирозда һәйә (Ԝаиз 7:12). Нийу Йоркеда, хушкәк йа кӧ шәʹдәтийе дьдә мәрьвед кӧ сәр зьмане Мандарини хәбәр дьдьн, дьбежә: «Әз дькʹәвьмә һʹәйра мәрьва у гӧһ дьдьмә ԝан. Һәрге әз педьһʹәсьм, ԝәки әԝана емигрантед тʹәзә нә, щара жь ԝана дьпьрсьм: ‹Һун ча һини ви щийи бунә? Ԝә хәбат хԝәрʹа дитийә? Мәрьвед ԝьра ԝәрʹа һʹәйф ьн?›». Щара әԝ йәк али ԝе дькә кӧ гьли кә, Кʹьтеба Пироз чь һин дькә. Чахе те стандьн, хушк зедә дькә: «Бь тʹәхмина ԝә чь йә тьште лапи фәрз, ԝәки һәләԛәтийа баш хԝәй кьн тʹәви мәрьва? Изьн ә әз ԝәрʹа мәтʹәлокәкә жь Кʹьтеба Пироз бьхуньм? Ԝьра те готьне: ‹Дәстпебуна шерʹ мина авбәрʹдане йә, һе шәрʹ кӧ гьран нәбуйә же дур кʹәвә›. Һун ча дьфькьрьн, әԝ ширәт дькарә али мә бькә, ԝәки һәләԛәтийа мә тʹәви мәрьва баш бә?» (Мәтʹлк. 17:14). Хәбәрдана ԝи щурʹәйи дькарә али мә бькә, ԝәки ԝан мәрьва бьвиньн, йед кӧ дьхԝазьн һе зедә пебьһʹәсьн.

14. Чаԝа бьраки жь Рʹоһьлата Дур али ԝан мәрьва дькә, йед кӧ дьбежьн, ԝәки Хԝәде баԝәр накьн?

¹⁴ Ле әм ча дькарьн тʹәви ԝан мәрьва хәбәр дьн, йед кӧ Хԝәде баԝәр накьн? Бьраки мә кӧ Рʹоһьлата Дурда хьзмәт дькә, кʹидәре кӧ мәрьвед нәбаԝәр дьжин, дьбежә: «Бь рʹасти чахе ԝьра мәрьв дьбежә: ‹Әз Хԝәде баԝәр накьм›, әԝ дьхԝазә бежә, ԝәки әԝ ԝан хӧдана наһʹәбинә, кʹижан кӧ бь әʹдәти мәрьвед ԝьра дьһʹәбиньн. Ләма жи әз ԝанрʹа гәләк щар ԛайил ьм, кӧ һʹәчʹи зәʹф хӧдан бь дәсте мәрьва тенә чекьрьне у сах ниньн. У әз ԝанрʹа гәләк щар Йерәмйа 16:20 дьхуньм: ‹Ԛә мәрьв дькарә хԝәрʹа хӧдана чекә, гава әԝана бь рʹасти нә хӧдан ьн, ДТʹ?›  Паше әз дьпьрсьм: ‹Ле ча әм дькарьн тедәрхьн, һәла кʹижан хԝәде реали йә, ле кʹижан мәрьва хԝәха чекьрийә йан жи бәр хԝә дәрхьстийә?› Әз рʹьнд гӧһ дьдьм щаба ԝан, у паше ԝанрʹа дьхуньм Ишайа 41:23: ‹Гьли кьн мәрʹа ахьрийеда ԝе чь бьԛәԝьмә, у әме бьзаньбьн кӧ һун хӧдан ьн, ДТʹ›. Паше әз пʹехәмбәртике нишани ԝан дькьм, кʹижан кӧ Йаһоԝа пешда дәрһәԛа ахьрийе готийә».

15. Әм чь дькарьн һин бьн жь мәсәла бьраки жь Корейа Рʹоһьлате?

¹⁵ Бьраки мә жь Корейа Рʹоһьлате, ԝәʹде сәрледана дӧбарә методәкә ӧса дьдә хәбате. Әԝ гьли дькә: «Әз ԝанрʹа нишан дькьм биланийа жь Кʹьтеба Пироз, пʹехәмбәртийед жь Кʹьтеба Пироз кӧ һатьнә сери, у ԛанун кʹижан кӧ гәрдуне контрол дькьн. Паше әз ԝанрʹа нишан дькьм чаԝа әԝ һәр тьшт әʹйан дькә, ԝәки Әʹфьрандаре сах у билан һәйә. Гава әԝ мәрьв ԛайил дьбә, кӧ дьбәкә жи Хԝәде һәйә, әз ԝирʹа нишан дькьм, ԝәки Кʹьтеба Пироз чь дьбежә дәрһәԛа Йаһоԝа».

16. Ль гора Ибрани 11:6, чьрʹа фәрз ә мәрьве кӧ Кʹьтеба Пироз һин дьбьн, баԝәрийа хԝә һьндава Хԝәде у Кʹьтеба Пироз пешда биньн, у ча әм ве йәкеда дькарьн али ԝан бькьн?

¹⁶ Чахе әм һинбунед Кʹьтеба Пироз дәрбаз дькьн тʹәви мәрьвед нәбаԝәр, әм гәрәке тʹьме баԝәрийа ԝан мәзьн кьн ве йәкеда кӧ Хԝәде һәйә. (Бьхунә Ибрани 11:6.) У әм гәрәке али ԝан бькьн, ԝәки әԝана баԝәрийа хԝә Кʹьтеба Пироз биньн. Дьбәкә бона ве йәке әм чәнд щара мәрьварʹа тьштәки бьԝәкʹьлиньн. Ԝәʹде һәр һинбуне, әм дькарьн тʹәви ԝан избаткьрьнәке шеԝьр кьн, кӧ Кʹьтеба Пироз Хәбәра Хԝәде йә. Мәсәлә, әм дькарьн тʹәви ԝан шеԝьр кьн дәрһәԛа пʹехәмбәртийед жь Кʹьтеба Пироз, кӧ һатьнә сери, ӧса жи ча Кʹьтеба Пироз алийе зандарийеда у тʹәрихийеда рʹаст ә, у ча ширәтед жь ԝе, жийина һәррʹожида кери мә тен.

17. Һʹьзкьрьна мә һьндава мәрьва ча дькарә сәр ԝана һʹӧкӧм кә?

¹⁷ Чахе әм һьндава мәрьва һʹьзкьрьне дьдьнә кʹьфше, бь ве йәке әм али ԝан дькьн, ԝәки бьбьнә шагьртед Мәсиһ, фьрԛи тʹӧнә әԝана баԝәрмәнд ьн йан на (1 Корн. 13:1). Ԝәʹде һинкьрьне нета мә әԝ ә, кӧ бьдьнә кʹьфше, ԝәки Хԝәде мә һʹьз дькә у дьхԝазә әм жи ԝи һʹьз бькьн. Һәр сал, бь һʹәзара мәрьвед кӧ бәре тʹӧ рʹелигийада нибун, тенә ньхӧмандьне, чьмки ԝана Хԝәде һʹьз кьр. Ләма жи позитив бьн, бькʹәвьнә һʹәйра һʹәму щурʹә мәрьва у ԝана һʹьз бькьн. Гӧһ бьдьнә ԝана, у һʹал у ньһерʹандьна ԝан фәʹм бькьн. Пе мәсәла хԝә ԝана һин кьн, кӧ бьбьнә шагьртед Мәсиһ.