ДИАНА әʹмьрда 80 сал зедәтьр ә. Мере ԝе пе нәхԝәшийа Алтсгеймере нәхԝәш бу у пешийа мьрьна хԝә чәнд сала мала кал-пирада бу. Әԝе ӧса жи дӧ кӧрʹед хԝә ӧнда кьр у һьн жи бьстане ԝеда рʹәԛ һәбу. Ле чахе хушк-бьра щьватеда у хьзмәтийеда ле дьвиньн, әԝ тʹьме бь бәшәра хԝәш ә.

Щон 43 сала зедәтьр бәрпьрсийаре рʹеԝи бу. Әԝи әԝ щурʹә хьзмәти гәләк һʹьз дькьр, әԝ пʹарәкә әʹмьре ԝи бу! Ле чахе мәрьве ԝийи незик нәхԝәш кʹәт, әԝи хьзмәтийа хԝә да сәкьнандьне, у ньһа әԝ щьвата мьһала хԝәда хьзмәт дькә. Хушк-бьред кӧ Щон бәреда нас дькьн, чахе сәр щьватед мәзьн ԝи дьвиньн, дьбежьн кӧ әԝ ԛә нәһатийә гӧһастьне, әԝ диса ӧса дәвкʹән ә.

Ле чаԝа Диана у Щон шабуна хԝә ӧнда накьн? Ча мәрьве кӧ емосийалида йан жи физикида ԛӧдум кʹәтийә, дькарә диса жи ша бә? У чаԝа кәсе кӧ ида кʹьфшкьрьна хԝәда нинә, кʹижан гәләк һʹьз дькьр, диса жи дькарә бәхтәԝар бә? Кʹьтеба Пироз щаба ԝан пьрса ӧса дьдә: «Рʹасте пе Хӧдан ша бьн» (Зәб. 64:10). Әм әве йәке дькарьн һе рʹьнд фәʹм кьн, һәрге бьзаньбьн чь бь рʹастийе шабуне дькә дьле мәрьва.

Һьнә тьшт һәнә, кӧ һәр гав мәри ԝанрʹа ша дьбьн. Мәсәлә, чахе ԛиз у хорт һәв һʹьз дькьн у һәв дьстиньн, йан чахе кәсәкирʹа зарʹ дьбә, йан жи чахе щьватеда кʹьфшкьрьна тʹәзә дьстиньн. Әԝ тьшт бь рʹасти шабуне тиньн, у әԝ гәрәке ӧса бә чьмки әԝ һәрсек жи жь Йаһоԝа нә. Әԝи зәԝащ саз кьрийә, зарʹ жи пʹешкʹеша ԝи йә, у бь сайа щьвата Мәсиһи әԝ щурʹә-щурʹә шьхӧл дьдә мә (Дәстп. 2:18, 22; Зәб. 127:3; 1 Тимтʹ. 3:1).

Ле әԝ шабун дькарә ԝәʹдәлу бә. Сәд һʹәйф, щара дьԛәԝьмә кӧ мер йан жьн амьн наминә, йан жи дьмьрә (Һәзԛл. 24:18; Һос. 3:1). Йан зарʹ гӧрʹа де-бава у Хԝәде накьн, дьԛәԝьмә һәла һе жи жь щьвате тенә дәрхьстьне. Биньн бира хԝә, кӧрʹед Самуйел нәлайиԛ Йаһоԝарʹа хьзмәт дькьрьн, ӧса жи малбәта Даԝьд кʹәтә тәʹли-тәнгийа, жь бо кьред ԝи (1 Сам. 8:1-3; 2 Сам. 12:11). Әԝ тьшт кӧл-дәрда тиньн, нә кӧ шабуне.

 Ӧса жи кʹьфшкьрьна мә жи дькарә бе гӧһастьне, бәʹса хәбәре жь бо сьһʹәт-ԛәԝата хьраб, щабдарийед малбәтеда, йан жи гӧһастьнед тʹәшкиләта мәда. Гәләкед кӧ рʹасти ԝан гӧһастьна һатьнә, гьли кьрьнә ԝәки ԝана ԝәʹдәки шабуна хԝә кʹижан кӧ жь шьхӧле хԝә дьстандьн, ӧнда кьрьбун.

Бәле, әм дьвиньн ԝәки һәйә шабун кӧ ԝәʹдәлу йә. Ле гәло һәйә шабунәкә ӧса кӧ һәла һе ԝәʹде чәтьнайада жи дьминә? Бәле, һәйә, у сәрһатийа Самуйел, Даԝьд у йед хьзмәткʹаред дьн, дьдьнә кʹьфше кӧ әԝана ԝәʹде тәнгасийа шабуна хԝә ӧнда нәкьрьн.

Иса заньбу кӧ бь рʹасти шабун чь йә. Әԝ һʹәта бьһата сәр әʹрде, сәр әʹзмана бу, кʹидәре гәләк хԝәш бу у әԝ «һәртʹьм ль бәр [Йаһоԝа] ша дьбу» (Мәтʹлк. 8:30). Сәр әʹрде, әԝ щара рʹасти тәнгасийед гәләк гьран дьһат. Йәкә Иса шабуна хԝә ӧнда нәдькьр, чьмки ԛьрара Баве хԝә дьани сери (Йуһʹн. 4:34). Кʹьтеба Пироз дьбежә ԝәки Иса һәла һе чәнд сьһʹәтед пешийа мьрьна хԝә жи, әв шабун ӧнда нәкьр. Кʹьтеба Пирозда әм дьхуньн: «Бона ԝе шабуна пешийа хԝә стуна щәфайе һьлани» (Ибрн. 12:2, ДТʹ). Ԝәрә әм ньһа дӧ ԛәԝьмандьнед дәрһәԛа шабуне шеԝьр кьн, кӧ тʹәви Иса ԛәԝьмин.

Щарәке, Иса 70 шагьрт шанд сәва мьзгинийе бәла кьн. Чахе әԝана жь хьзмәтийе вәгәрʹийан, пʹьрʹ ша дьбун, чьмки шьхӧле мәзьн кьрьбун, һәла һе жи щьн жь мәрьва дәрхьстьбун. Ле Иса ԝанрʹа гот: «Бь ԝе йәке ша нәбьн кӧ щьн ельми ԝә дьбьн, ле ша бьн, кӧ навед ԝә ль әʹзмана ньвисар ә» (Луԛа 10:1-9, 17, 20). Бәле, жь ве йәке әм дьвиньн кӧ ԛәбулкьрьна Йаһоԝа дьһа фәрз ә, нә кӧ тʹәне әԝ шьхӧле ԛимәт, кӧ әм дькьн. Иса ани бира ԝан шагьртед амьн, кӧ чь бь рʹасти шабуна лапә мәзьн тинә.

Щарәкә дьн жи Иса чахе тʹәви әʹлаләте хәбәр дьда, жьнәкә Щьһу дәрһәԛа дийа Иса гот, кӧ әԝ бәхтәԝар ә, чьмки дийа дәрсдарәки ӧса мәзьн ә. Ле Иса ньһерʹандьна ԝе рʹаст кьр у гот: «Һе хԝәзи ль ԝан, йед кӧ хәбәра Хԝәде дьбьһен у пек тиньн» (Луԛа 11:27, 28). Бәле, әԝ баш ә чахе де йан бав зарʹа хԝәрʹа фьрнаԛ дьбьн, ле шабуна һе  мәзьн әԝ ә, чахе һәләԛәтийа мерьв тʹәви Йаһоԝа баш ә, демәк чахе мәри гӧрʹа ԝи дькә.

Бәле, канийа шабуне у дьлрʹьһʹәтийе бь рʹасти әԝ ә, гава ԛәбулкьрьна Йаһоԝа дьстини. Тʹӧ тәнгаси нькарә әве йәке бьгӧһезә. Чахе ԝәʹде тәнгасийа әм амьн дьминьн, әԝ йәк шабуне дькә дьле мә у дьлрʹьһʹәтийе тинә (Рʹом. 5:3-5). Һьн жи, Йаһоԝа рʹӧһʹе хԝәйи пироз дьдә ԝан, йед кӧ итʹбарийа хԝә ԝи тиньн, у ӧса жи шабуне дьдә, чь кӧ бәре рʹӧһʹе ԝийи пироз ә (Галт. 5:22). Бь ве йәке әм һе рʹьнд фәʹм дькьн гьлийед жь Зәбур 64:10: «Рʹасте пе Хӧдан ша бьн».

Әԝ йәк жь сәрһатийа Дианайе у Щон те кʹьфше, дәрһәԛа кʹижана мә жоре гот, ԝәки ԝәʹде тәнгасийа карьбунә шабуна һәртʹьм ӧнда нәкьн. Диана дьбежә: «Мьн хԝә кьрә бьн пʹәре Йаһоԝа, мина зарʹа кӧ хԝә ль де-баве хԝә дьгьрә». Ле ча әԝ тʹәхмин дькә кӧ Хԝәде ԝе ԛәбул дькә? Әԝ дьбежә: «Әз дьвиньм ԝәки әԝи мьн бь ве йәке кʹәрәм кьр, кӧ хьзмәтийа хԝә бь бәшәра хԝәш бәрдәԝам дькьм». Щон, кʹижан кӧ паши шьхӧле бәрпьрсийартийе хьзмәтийеда хирәт ма, шьровәдькә кӧ чь али ԝи кьр: «Жь сала 1998 чахе әз һатьмә кʹьфшкьрьне ча дәрсдар Мәкʹтәба Башкьрьна Хьзмәтийеда, мьн һаԛас леколинкьрьнед шәхси дәрбаз кьрьн, кӧ тʹӧ щар әʹмьре хԝәда һаԛас нәкьрьбу». Паше әԝи дәрһәԛа хԝә у жьна хԝә гот: «Мәрʹа һеса бу әве гӧһастьне ԛәбул кьн, чьмки нава гәләк салада чь дәсте мә дьһат мә хьзмәтийеда дькьр. Әм ԛә пʹошман набьн мә чь жи кьр».

Гәләк хушк-бьред дьн жи сәр хԝә тʹәхмин дькьн гьлийед жь Зәбур 64:10. Бәʹса хәбәре, жьн-мер кӧ 30 сала зедәтьр Бәйтʹәла Амәрикайеда хьзмәт кьрьнә, ча пешәнгед мәхсус һатьнә кʹьфшкьрьне. Ԝана гот: «Чахе тӧ тьштәки ӧнда дьки чь кӧ һʹьз дьки, тʹәбийәти йә кӧ тӧйе бәрхԝә кʹәви. Ле тӧйе тʹәмамийа әʹмьре хԝә әви дәрди нәкʹьшини». Әԝ жьн-мер дәрберʹа дәстпекьрьн тʹәви щьвата хԝә дәркʹәвьн хьзмәтийе. Әԝана дьбежьн: «Мә дәрһәԛа тьштед конкрет жи дӧа дькьр. У гава мә дьдит кӧ чаԝа Хԝәде щаба мә дьдә, әм ԛәԝи у дьлша дьбун. Һьнә ԝәʹдә шунда, щьвата мәда һьнә хушк-бьра бунә пешәнг, у ӧса жи мә кʹәрәмәкә ӧса станд кӧ тʹәви дӧ мәрьва һинбуна Кʹьтеба Пироз дәрбаз дькьн, йед кӧ рʹӧһʹанида пешда дьчьн».

Фәʹмдари йә, ԝәки һеса нинә тʹьме дьлша бьн, чьмки щара һʹал баш ә щара жи хьраб ә. Ле йәкә Йаһоԝа рʹебәри кьр, ԝәки әԝ гьлийед жь Зәбур 64:10 бенә ньвисаре. Һәла һе чахе әм дьлтәнг ьн жи, әм гәрәке дӧдьли нәбьн ԝәки мәрьвед рʹаст, йед кӧ ԝәʹде тәнгасийада жи амьн дьминьн, ԝе «пе Хӧдан ша бьн». Һьн жи әм һивийа созед Йаһоԝа нә дәрһәԛа «әʹзманед ну у әʹрде ну». Ԝи ԝәʹдәйи гьшк ԝе беԛьсур бьн. Тʹәмамийа щьмәʹта Хԝәде ԝе бәхтәԝар бә у һʹәта-һʹәтайе ша бә, жь бо кьред Хԝәде у пʹешкʹешед ԝи (Иша. 65:17, 18, ДТʹ).

Бьдьнә бәр чʹәʹве хԝә, һьнге әʹмьр ԝе ча бә: сьһʹәт-ԛәԝата мә ԝе беԛьсур бә у һәр шәбәԛ әме бь ԛәԝат һʹьшйар бьн. Фьрԛи тʹӧнә бәре мә чь дәрд-кӧл кʹьшандийә, әԝ еш ԝе нәминьн. Йаһоԝа соз дьдә, ԝәки «тьштед бәре» ида ԝе нәкʹәвьнә бира мә, у нә жи дьле мәда бьминьн. Чахе мьри рʹабьн, әԝана диса жи ԝе тʹәви мәрьвед хԝәйи һʹьзкьри бьн. Беһʹәсаб мәри ԝе хԝә мина де-баве ԝе ԛизька 12 сали тʹәхмин кьн, кʹижан Иса жь мьрьне рʹакьр. Кʹьтеба Пироз дәрһәԛа ԝан дьбежә: «Һʹьше сәре ԝан чу» (Марԛ. 5:42). Ахьрийеда, сәр әʹрде ԝе тʹәне мәрьвед рʹаст бьн, у ԝе бь тʹәмами һʹәта-һʹәтайе «пе Хӧдан ша бьн».