KAPU 11

Lusadisu ya Bawanzyo ya Nzambi

BANTU mingi ketubaka nde bo kekwikilaka kaka na bima yina bo kemonaka. Kansi yo ke buzoba. Ke ti bima mingi ya kyeleka ya beto memonaka ntete ve ti meso na beto. Keti nge le tangila munu zina ya kima mosi?—

Inki nge le tuba sambu na mupepe yina beto kepemaka? Keti beto le wa yo?— Tombula diboko na nge, mpi fula mupepe na zulu na yo. Keti nge mewa kima mosi?— Nge mewa kima mosi, kansi keti nge le mona mupepe?—

Beto tubilaka dezia bantu ya kimpeve, yina beto le mona ve. Beto monaka nde mingi ke ya mbote kansi bankaka ke ya mbi. Pesa ndambu ya bazina ya bantu ya kimpeve yina ke ya mbote kansi ya beto le mona ve.— Mu mbandu Yehowa Nzambi, Yezu, ti bawanzyo ya mbote. Keti bawanzyo ya mbi mpi kele?— Biblia ketuba nde bo kele. Tela munu mambu ya metala bo yina nge simbaka ntangu beto longukaka.—

Dyambu mosi ya beto mezaba kele nde bawanzyo ya mbote ti bawanzyo ya mbi meluta beto na ngolo. Longi ya Nene kuzabaka mambu mingi yina metala bawanzyo. Yandi zabaka yo sambu yandi vandaka wanzyo na ntwala ya kwisa kubutuka bonso bebe na ntoto. Yandi zingaka ti bawanzyo yankaka na zulu. Yandi zabaka bawanzyo mingi mpenza. Keti bawanzyo yango yonso ke ti bazina?—

Ee, beto monaka nde Nzambi kupesaka bazina na bambwetete. Yo yina, beto kendima nde bawanzyo yonso mpi le vanda ti bazina. Beto mezaba mpi nde bo le solula bo na bo sambu Biblia ketubaka nde ‘bandinga ya bawanzyo’ kele. (1 Korinto 13:1) Nge keyindula nde bawanzyo ketubilaka nki mambu? Keti bo ketubilaka mambu ya metala beto bantu ke na ntoto?—

 Beto mezaba nde bawanzyo ya Satana, bademo, kesosaka kupusa beto na kukolama na Yehowa. Ntembe kele ve nde, yo fwe vanda nde bo kesolulaka sambu na kuzaba mutindu ya bo le sala yo. Bo kezola nde beto vanda bonso bo sambu Yehowa kuzola beto dyaka ve. Kansi nki beto le tuba sambu na yina metala bawanzyo ya kwikama ya Nzambi? Keti nge keyindula nde bo mpi ketubilaka mambu ya metala beto?— Ee, bo mpi ketubilaka yo. Bo kezolaka kusadisa beto. Bika mu tela nge mutindu bawanzyo ya Nzambi kusadisaka bantu yina vandaka kuzola mpi kusadila Yehowa.

Mu mbandu, kuvandaka ti muntu mosi na zina ya Daniele yina kuzingaka na Babilone. Bantu mingi ya bwala yina vandaka kuzola ve Yehowa. Nkutu bantu kubasisaka nsiku nde bo tapesa ndola na konso muntu yina tasambila Yehowa Nzambi. Kansi Daniele kubikisaka ve na kusamba Yehowa. Keti nge mezaba nki bo salaka Daniele?—

Ee, bantu ya mbi kulosaka Daniele na dibulu ya bantambu. Kuna, Daniele kuvandaka kaka yandi mosi ti bantambu yina kuvandaka na nzala. Keti  nge mezaba nki kusalamaka na nima?— Daniele kutubaka nde, “Nzambi tindaka wanzio na yandi, yandi kangaka minoko ya bantambu.” Bantambu kusalaka yandi kima ve! Bawanzyo le sala mambu ya kuyituka kibeni sambu na bayina kesadilaka Yehowa.—Daniele 6:19-23.

Mbandu ya zole ke ya Piere, na ntangu yandi vandaka na boloko. Yibuka nde Piere kuvandaka nduku ya Longi ya Nene, Yezu Kristu. Bantu mingi kusepelaka ve ntangu Piere kutubilaka bo nde Yezu kuvandaka Mwana ya Nzambi. Yo yina, bo tulaka Piere na boloko. Basoda vandaka kutala Piere sambu yandi kutina ve. Keti kuvandaka ti muntu ya lendaka kusadisa yandi?—

Piere vandaka ya kulala na kati-kati ya basoda zole, mpi maboko na yandi ya kukangisa na minyololo. Kansi Biblia ketuba nde: ‘Wanzyo ya  Mfumu Nzambi kwisaka, ebuna nsemo yantikaka kupela na boloko. Wanzyo kusimbaka Piere fyoti na mpanzi sambu na kutedimisa yandi na mpongi. Yandi tubilaka Piere nde: “Telama nswalu.”’

Ebuna, minyololo yina vandaka na maboko ya Piere kubwaka! Mpi wanzyo kutubaka na yandi nde: ‘Lwata bilele ti basandale na nge, ebuna nge landa mono.’ Basoda lendaka ve kukanga bo sambu wanzyo vandaka kusadisa Piere. Ntangu yai bo kumaka na kyelo mosi ya kibende, ebuna dyambu mosi ya kuyituka kusalamaka. Kyelo kukangukaka yo mosi! Wanzyo yina kubasisaka Piere na boloko sambu yandi landa na kusala kisalu ya kusamuna.—Bisalu 12:3-11.

Keti bawanzyo ya Nzambi le sadisa beto mpi?— Ee, bo le sadisa beto. Keti yo kezola kutuba nde bo tabikisa ve ata fyoti nde mpasi kubwila beto?— Ve, bawanzyo kekangaka ve mpasi sambu yo bwila beto ve kana beto mesala mambu ya kukonda mayele. Kansi, ata beto mesala ve mambu ya buzoba, beto le mona kaka mpasi. Kisalu ya bawanzyo kevandaka ve ya kukangisa mpasi sambu yo bwila beto ve. Kansi, Nzambi kupesaka bo kisalu ya nene mpenza ya bo fwe sala.

Biblia ketubila wanzyo mosi yina ketubila bantu ya bisika yonso nde bo sambila Nzambi. (Kusonga 14:6, 7) Inki mutindu wanzyo ketubila bo yo? Keti yandi ketuba na ndinga ya ngolo katuka kuna na zulu sambu konso muntu kuwa yandi?— Ve, kansi, balongoki ya Yezu yina ke na ntoto kezabisa bankaka mambu ya Nzambi, mpi bawanzyo ketwadisa bo na kisalu na bo. Bawanzyo kesalaka yonso na mpila nde bayina kezola mpenza kuzaba mambu ya Nzambi kuzwa dibaku ya kuwa yo. Beto le sala kisalu yai ya kusamuna, mpi bawanzyo tasadisa beto.

Kansi nki beto tatuba kana bantu yina kezolaka ve Nzambi kemonisa beto mpasi? Inki beto tasala kana bo tula beto na boloko? Keti bawanzyo takwisa kubasisa beto?— Bo le sala yo. Kansi, bo kesalaka yo ve ntangu yonso.

Kilumbu mosi Polo, longoki ya Yezu, kuvandaka na boloko. Yandi vandaka kusala nzyetolo na maswa ntangu mupepe mosi ya ngolo kubulaka. Kansi bawanzyo kukatulaka yandi ve mbala mosi na mpasi yai. Bo salaka yo ve sambu kuvandaka ti bantu yankaka yina kuvandaka ti mfunu ya  kuwa mambu ya Nzambi. Wanzyo mosi kutubaka nde: “Paulo, kuvanda na boma ve! Nge fweti kwenda kutuba mambu na nge na meso ya ntotila ya nene ya kimfumu ya Roma.” Ee, yo lombaka nde bo nata Polo na Kaisali yina kuvandaka mfumu ya inza na mpila nde Polo kulonga yandi. Bawanzyo vandaka kuzaba ntangu yonso kisika Polo vandaka, mpi bo sadisaka yandi. Bo tasadisa beto mpi kana beto sadila Nzambi na masonga yonso.—Bisalu 27:23-25.

Bawanzyo ke ti kisalu yankaka ya mfunu ya bo tasala, mpi kubika fyoti bo tasala yo. Ntangu ya Nzambi tafwa bantu ya mbi mekuma penepene mpenza. Bayina yonso kesambilaka ve Nzambi ya kyeleka tafwa. Bayina ketubaka nde bo kekwikilaka ve na bawanzyo sambu bo kemonaka bo ve tabakisa nde bo kekudikusaka mpenza.—2 Tesalonika 1:6-8.

Dyambu yai tatendula nki sambu na beto?— Kana beto ke simu mosi ti bawanzyo ya Nzambi, bo tasadisa beto. Kansi, keti beto ke na simu na bo?— Beto tavanda na simu na bo kana beto kesadila Yehowa. Ebuna kana beto kesadila Yehowa, beto tazabisaka mpi bantu yankaka na kusadila yandi.

Sambu na kuzaba mambu mingi ya kemonisa mutindu bawanzyo kesadisaka bantu na luzingu na bo, tanga Nkunga 34:8; Matayo 4:11; 18:10; Luka 22:43; mpi Bisalu 8:26-31.

[Kifwanisu ya kele na lutiti 63]

Inki Nzambi kusalaka sambu na kugulusa Daniele?

[Kifwanisu ya kele na lutiti 64]

Inki mutindu wanzyo mosi kusadisaka Piere na kubasika na boloko?

[Kifwanisu ya kele na lutiti 66]

Inki mambu wanzyo ke na kusonga Polo?