Kwenda na mambu ke na kati

Kwenda na tansi ya malongi

 BIBLIA KE SOBAKA LUZINGU YA BANTU

Luzingu na Mono Vandaka Kukuma Mbi Kuluta

Luzingu na Mono Vandaka Kukuma Mbi Kuluta
  • MVULA YINA YANDI BUTUKAKA: 1952

  • INSI: ÉTATS-UNIS

  • LUZINGU NA YANDI YA NTAMA: MUNTU YA NKU

MUTINDU MONO VANDAKA:

Mono yelaka na mbanza Los Angeles, na Californie, na États-Unis. Bakartie na beto zabanaka mingi sambu bantu vandaka nku mpi bo vandaka kunwa bima ya ke lawusaka. Na dibuta na beto, beto butukaka bana sambanu mpi mono kele mwana ya zole.

Mama vandaka kunata beto na Église évangélique. Kansi, ntangu mono yelaka, mono kumaka ti luzingu mosi ya mbi. Konso Lumingu, mono vandaka kuyimba na kimvuka ya nzo-nzambi na beto. Kansi na bilumbu yina yankaka, mono vandaka muntu ya bafeti, ya ke nwaka bima ya ke lawusaka mpi mono vandaka kusala mansoni.

Mono vandaka kuwa makasi ya ngolo nswalu. Ntangu mono vandaka kunwana, mono vandaka kusadila konso kima yina sambu na kununga. Mambu ya mono longukaka na nzo-nzambi sadisaka mono ve. Mono vandaka kutuba nde “Mfumu muntu ke vutulaka mbela mpi mono kele muntu ya yandi ke sadila!” Na nsuka ya bamvu 1960 ntangu mono vandaka na nzo-nkanda, mono kotaka na kimvuka mosi ya politiki (Black Panthers), kimvuka yina vandaka kunwanina banswa ya bantu-ndombe. Mono vukanaka ti bana ya nzo-nkanda yina vandaka kunwanina banswa ya bantu. Mbala mingi, beto vandaka kubongisa bimvuka ya bantu sambu na kutambula na babala-bala mpi kutelamina mambu ya politiki. Beto vandaka kusala yo bantangu ya nkaka sambu na kukanga banzo-nkanda.

Ziku, kutelamina mambu ya politiki lungisaka ve mpusa na mono ya kusala mubulu. Yo yina, mono kumaka kusala bantu nku. Mu mbandu, kilumbu mosi, mono ti banduku na mono talaka bafilme yina monisaka mutindu bo vandaka kuniokula bantu ya Afrika yina vandaka bampika na États-Unis. Beto waka makasi na mutindu bo vandaka kuniokula bantu-ndombe mpi beto nwanisaka batoko ya mindele yina vandaka na kisika yango. Na nima, beto kwendaka na bisika yina mindele vandaka kuzinga sambu na kubula bo.

Ntangu mono lungisaka bamvula kiteso ya 19, mono ti bampangi na mono ya babakala vandaka kusala bantu nku. Beto vandaka kuwakana diaka ve ti bamfumu. Nkutu, leke na mono mosi ya bakala vandaka na kimvuka ya babandi yina zabanaka mingi mpi mono kotaka na kimvuka na bo. Luzingu na mono vandaka kukuma mbi kuluta.

MUTINDU BIBLIA SOBAKA LUZINGU NA MONO:

Bibuti ya nduku na mono mosi vandaka Bambangi ya Yehowa. Bo bingaka mono na balukutakanu ya dibundu na bo mpi mono ndimaka. Kaka na kilumbu ya ntete, mono monaka nde Bambangi ya Yehowa me swaswana ti bantu ya nkaka. Konso muntu vandaka ti Biblia mpi vandaka kusadila yo na lukutakanu. Nkutu, batoko vandaka kusala masolo na lukutakanu! Mono yitukaka ntangu mono zabaka nde zina ya Nzambi kele Yehowa  mpi mono yitukaka na kuwa bantu ke sadila yo. (Nkunga 83:18, NW) Dibundu yango vandaka ti bantu ya bansi ya kuswaswana kansi bo vandaka ve ti kikalulu ya kukabula-kabula.

Na luyantiku, mono vandaka kuzola ve kulonguka Biblia ti Bambangi, kansi mono vandaka kusepela na kukwenda na balukutakanu na bo. Kilumbu mosi na mpimpa ntangu mono vandaka na lukutakanu ya Bambangi ya Yehowa, banduku na mono kwendaka na konsere. Kuna, bo bulaka toko mosi mpi bo fwaka yandi sambu yandi buyaka kupesa bo jaket na yandi ya kwire. Na kilumbu yina landaka, bo kumaka kudisikisa na mutindu bo fwaka toko yina. Ntangu bo vandaka kusambisa bo na tribinale, bo vandaka kumona nkutu ve nde bo salaka dikambu ya nene. Bankaka, bo zengilaka bo nkanu ya kulutisa luzingu ya mvimba na boloko. Mono sepelaka mingi sambu mono vandaka ve ti bo na mpimpa yina. Mono bakaka lukanu ya kusoba luzingu na mono mpi mono yantikaka kulonguka Biblia.

Sambu mono yelaka na kisika yina bantu vandaka kuzola ve bantu ya mpusu ya nkaka, mambu yina mono monaka na Bambangi ya Yehowa yitukisaka mono mingi. Mu mbandu, ntangu Mbangi mosi ya Yehowa ya mundele vandaka kusala nzietelo, yandi vandaka kubika bana na yandi na dibuta ya Bambangi ya Yehowa ya bantu-ndombe. Diaka, dibuta ya mindele ndimaka kubaka toko mosi ya muntu-ndombe yina vandaka ve ti kisika ya kuvanda. Mono ndimaka nde Bambangi ya Yehowa ke sadilaka mambu yai ya Yezu tubaka na Yoane 13:35 nde: “Na diambu yai, bantu yonso ta zaba nde beno kele balongoki na mono, kana beno kele ti zola na kati na beno.” Mono bakisaka nde mono me zwa bampangi ya kieleka.

Ntangu mono vandaka kulonguka Biblia, mono bakisaka nde mono fwete soba mabanza na mono. Yo lombaka ve nde mono kumisa mabanza na mono ya mpa kaka sambu na kuzinga na ngemba, kansi mono bakisaka mpi nde yo kele luzingu mosi ya kuluta mbote. (Baroma 12:2) Malembe-malembe, mono yelaka na kimpeve. Na Yanuari 1974, mono bakaka mbotika mpi kumaka Mbangi ya Yehowa.

Yo lombaka ve nde mono kumisa mabanza na mono ya mpa kaka sambu na kuzinga na ngemba, kansi mono bakisaka mpi nde yo kele luzingu mosi ya kuluta mbote

Kansi, ata na nima ya kubaka mbotika, yo lombaka nde mono sala ngolo sambu na kuyala makasi na mono. Mu mbandu, kilumbu mosi, ntangu mono vandaka kusamuna nzo na nzo, mono kudikisaka muyibi mosi ya yibaka radio na mono na kamio. Ntangu mono zolaka kukanga yandi, yandi losaka radio mpi tinaka. Ntangu mono telaka bampangi ya nkaka mutindu mono bakaka radio yango, nkuluntu mosi yulaka mono nde: “Stephen, nki nge zolaka kusala muyibi yina kana nge kangaka yandi?” Ngiufula yai pusaka mono na kuyindula mpi na kusala ngolo sambu na kuvanda muntu ya ngemba.

Na Oktobri 1974, mono yantikaka kusala bangunga 100 konso ngonda na kisalu ya kusamuna sambu na kulonga bantu Biblia. Na nima, mono zwaka dibaku ya kusala na babiro ya ke twadisaka kisalu ya Bambangi ya Yehowa na ntoto ya mvimba na Brooklyn, na New York. Na 1978, mono vutukaka na Los Angeles sambu na kusadisa mama na mono ya vandaka kubela. Bamvula zole na nima, mono kwelaka nkento na mono Aarhonda. Yandi sadisaka mama na mono mingi tii kuna mama fwaka. Na nima, bo bingaka mono ti Aarhonda na Gileadi, Nzo-Nkanda ya Biblia ya La Société Watchtower. Na nima ya nzo-nkanda, bo tindaka beto na Panama na kusala kisalu ya kimisionere.

Tuka mono bakaka mbotika, mono ke kutanaka ti mambu mingi ya lenda pusa mono na kusala mambu na nku. Ata mpidina, mono me kumaka kubuya makambu to kusala bonso nde kima kele ve. Nkento na mono ti bantu ya nkaka ke sikisaka mono mingi na mutindu mono me kumaka kuyala makasi na mono. Nkutu, mono mosi mpi ke yitukaka! Mono ke sosa ve kudipesa lukumu sambu na bansoba ya mono me salaka. Kansi, bansoba yai ke ndimisaka mono nde Ndinga ya Nzambi ke vandaka ti ngolo ya kusoba luzingu ya bantu.Baebreo 4:12.

MAMBOTE YA MONO ME BAKAKA:

Biblia me sadisaka mono na kuzaba lukanu ya luzingu mpi yo me longaka mono na kuzinga na ngemba. Mono ke bulaka diaka ve bantu, kansi mono me kumaka kusadisa bo na kimpeve. Nkutu, mono me longukaka Biblia ti muntu mosi ya vandaka ntete mbeni na mono na nzo-nkanda! Ntangu yandi bakaka mbotika, beto zingaka ti yandi ntangu fioti na nzo mosi. Bubu yai, beto kele banduku ya ngolo. Mono ti nkento na mono me longukaka Biblia ti bantu kuluta 80 mpi bo me kumaka Bambangi ya Yehowa.

Mono ke tonda Yehowa mingi sambu yandi me sadisaka mono na kuzwa luzingu ya kele ti lukanu mpi na kuzinga na kiese na kati ya bampangi ya kieleka.