Kwenda na mambu ke na kati

Kwenda na tansi ya malongi

 DISOLO YINA KELE NA LUTITI YA ZULU | INKI MUTINDU BETO LENDA NWANA TI BASUSI YA LUZINGU?

Basusi ya Mbongo

Basusi ya Mbongo

Paul, tata ya bana zole ke tuba nde: “Ntangu bima mataka ntalu mingi na insi na beto, madia vandaka diaka mingi ve. Beto vandaka kutelama na ndonga bantangu mingi, kansi mbala mingi madia vandaka kumana na ntwala nde beto sumba. Bantu kondaka mingi mpi bankaka vandaka kubwa na bala-bala sambu na nzala. Bima ya beto ke vandaka ti yo mfunu konso kilumbu mataka ntalu mingi, disongidila yo kumaka bamilio mpi na nima bamiliare. Nsuka-nsuka, mbongo ya nsi na beto manaka valere. Mbongo na mono ya asiranse, ya pension mpi na banki vandaka diaka ve na mbalu.”

Paul

Paul zabaka nde sambu dibuta na yandi kulanda na kuzinga, yandi fwete sadila “mayele.” (Bingana 3:21) Yandi ke tuba nde: “Mono kele électricien. Kansi, mono kumaka kusala konso kisalu yina vandaka kumonana, ata bo vandaka kufuta mono mbongo fioti. Bantu ya nkaka vandaka kupesa mono madia to bima ya nzo na kisika ya kupesa mono mbongo. Mu mbandu, kana bo pesa mono basavo iya, mono vandaka kusadila zole mpi kuteka yina ya nkaka. Nsuka-nsuka, mono kumaka ti bana ya bansusu 40. Ntangu yo yelaka, mono tekaka yo mpi mono sumbaka diaka bana ya bansusu 300. Na nima, mono pesaka bantu bana ya bansusu 50 mpi bo pesaka mono basaki zole ya fufu ya masangu ya bakilo 50. Fufu yai sadisaka dibuta na mono mpi mabuta ya nkaka na nsungi ya nda.”

Diaka, Paul bakisaka nde kima ya kuluta mfunu ya muntu lenda sala kele kutula ntima na Nzambi. Kana beto ke sala mambu ya Nzambi ke lomba beto, yandi ta sadisa beto. Sambu na kuzwa bima ya kuzingila, Yezu pesaka ndongisila yai: “Beno bika kudiyangisa mingi, sambu . . . Tata na beno me zaba nde beno kele na mfunu ya bima yai.”Luka 12:29-31.

Diambu ya mawa kele nde Satana, mbeni ya nene ya Nzambi me kusaka bantu mingi na ntoto ya mvimba na kutula ntima nde luzingu na bo me simbama kaka na bima ya kinsuni. Bantu ke kudiyangisa mingi sambu na kuzwa bima ya bo kele na yo mfunu. Kansi, bo ke sala ngolo sambu na kusumba diaka bima ya bo kele na yo mpenza mfunu ve. Nkutu, bantu mingi ya nkaka ke kota bamfuka mpi ke zaba nde bo ta kutana  ti bampasi. Biblia ke tuba nde: “Kana nge defa mbongo na muntu, nge ta kuma mpika na yandi.”Bingana 22:7.

Bantu ya nkaka ke baka badesizio ya mbi. Paul ke tuba nde: “Bantu mingi ke bika mabuta mpi banduku na bo sambu na kukwenda kusosa ‘luzingu ya mbote’ na bansi ya nzenza. Bankaka nkutu ke kotaka na bansi yango na mafia mpi bo ke kukaka ve kuzwa kisalu. Mbala mingi, bantu ya mutindu yai ke bumbanaka kana bo mona bapolisi mpi bo ke lalaka na bala-bala. Bo ke pesaka ve Nzambi dibaku ya kusadisa bo. Kansi, Nzambi me sadisaka dibuta na beto na kununga bampasi ya mbongo.”

LANDA NDONGISILA YA YEZU

Paul ke landa na kutuba nde: “Yezu tubaka nde: ‘Beno kudiyangisa ve ata fioti sambu na kilumbu yina ke landa, sambu kilumbu yina ke landa ta vanda ti basusi na yo. Konso kilumbu kele ti bampasi na yo.’ Mono vandaka kusamba konso kilumbu nde Nzambi ‘pesa beto bubu yai madia na beto ya kilumbu yai’ sambu beto landa na kuzinga. Mpi yandi vandaka kusadisa beto kaka mutindu Yezu tubaka. Beto vandaka ve kuzwa ntangu yonso bima ya beto vandaka na yo mfunu sambu na kusumba. Kilumbu mosi, mono telamaka na ndonga sambu na kusumba madia kansi mono zabaka ve bima ya bo vandaka kuteka. Ntangu mono kumaka na kisika yango, mono monaka bo ke teka madia mosi buna (yaourt). Mono ke zolaka yo ve, kansi mono vandaka ve ti kima ya nkaka ya kusala. Yo yina, beto diaka yo na mpimpa yina. Mono ke tonda Nzambi mingi sambu na nsungi yina ya mpasi, dibuta na mono lalaka ve nzala ata kilumbu mosi.” *

Nzambi me silaka nde: “Mono ta bikisa nge ve ata fioti mpi mono ta yambula nge ve ata fioti.”Baebreo 13:5

Paul ke tuba diaka nde: “Bubu yai, beto kele diaka ve ti mpasi ya mbongo. Kansi, mambu ya beto kutanaka ti yo me longaka beto nde beto fwete tula ntima na Nzambi ntangu beto ke nwana ti bampasi. Yehowa * ta sadisa beto ntangu yonso kana beto ke landa na kusala luzolo na yandi. Beto me monaka nde Nkunga 34:9 ke tubaka mambu ya kieleka: ‘Beno meka, beno tala beno mosi mutindu Mfumu Nzambi kele mbote! Kiese na muntu yina ke tina na yandi!’ Yo yina, kana beto me kutana diaka ti bampasi ya mbongo, beto ke vandaka diaka ve na boma.”

Nzambi ke sadisaka bantu ya kwikama na kuzwa ‘madia na bo sambu na kilumbu yai’

Yandi ke yika nde: “Ntangu yai, beto me bakisa pwelele nde bima ya bantu ke vandaka na yo mfunu sambu na kuzinga kele ve kisalu to mbongo, kansi madia. Beto ke vingila ti mpusa ya ngolo ntangu yina lusilu yai ya Nzambi ta lungana: ‘Ntoto ta fuluka na ble mingi.’ Na ntwala nde mambu yai kusalama, Biblia ke tuba nde: ‘Kana beto kele ti madia, mpi bilele, beto ta sepela ti bima yai.’ Beto ke baka kikesa na bangogo yai ya Biblia: ‘Bika nde zola ya mbongo kuyala ve mutindu na beno ya kuzinga, na ntangu beno ke sepela ti bima yina beno kele na yo. Sambu yandi me tubaka nde: “Mono ta bikisa nge ve ata fioti mpi mono ta yambula nge ve ata fioti.” Yo yina, beto lenda vanda ti kikesa mpi kutuba nde: “Yehowa kele nsadisi na mono; mono ta wa boma ve.”’” *

Yo ke lomba kuvanda ti lukwikilu ya kieleka sambu na kutambula ti Nzambi bonso Paul ti dibuta na yandi. (Kuyantika 6:9) Kana beto ke kutana ti bampasi ya mbongo bubu yai to kana beto kutana ti yo na bilumbu ke kwisa, lukwikilu mpi mayele ya Paul me longa beto malongi mingi ya mfunu.

Inki beto ta sala kana mambu ya dibuta ke natila beto basusi?

^ par. 10 Yehowa kele zina ya Nzambi mutindu Biblia ke monisa yo.