Kwenda na mambu ke na kati

Kwenda na tansi ya malongi

 DISOLO YINA KELE NA LUTITI YA ZULU | INKI MUTINDU BETO LENDA NWANA TI BASUSI YA LUZINGU?

Basusi Kele Bisika Yonso!

Basusi Kele Bisika Yonso!

“Mono kwendaka kusumba madia kansi mono kutaka kaka bagato mpi ntalu na yo mataka mbala 10 000! Na kilumbu yina landaka, bima ya kudia vandaka diaka ve na bamagazini.”—Paul, na Zimbabwe.

“Bakala na mono vandisaka mono mpi zabisaka mono nde yandi ke yambula beto. Inki mutindu mono kangaka ntima na diambu yai ya mpasi? Luzingu ya bana na mono vandaka nki mutindu?”—Janet, na États-Unis.

“Ntangu mono waka makelele ya kamio yina ke kebisaka bantu sambu na kigonsa mosi buna, mono kwendaka kubumbana mpi mono lalaka na ntoto ntangu minduki ya ngolo (roquettes) vandaka kubula. Maboko na mono landaka kutekita tii na nima ya mwa bangunga.”—Alona, na Israël.

Beto ke zinga na “bantangu ya mpasi mpi ya nku.” (2 Timoteo 3:1) Bantu mingi ke kutana ti bampasi, mu mbandu, bampasi ya mbongo, mabuta ke kabwana, bitumba, maladi ya ke fwa bantu mingi na mbala mosi, bisumbula ya lugangu to bisumbula yina bantu kele na kisina na yo. Katula mambu yai, bantu ke kudiyangisa mpi sambu na bampasi na bo mosi. Bo lenda kudiyula nde: ‘Keti dimbuma yai ya mono ke mona na nitu na mono ta vanda ve kansere?’ ‘Keti bantekolo na mono ta yela na bupusi ya mbi ya nsi-ntoto yai?’

Basusi yonso ve kele mbi. Beto ke kudiyangisaka mwa fioti na ntwala ya kusala ekzame mosi buna, na ntwala nde bo yula beto bangiufula sambu na kuzwa kisalu to na ntwala nde beto lungisa mukumba mosi na ntwala ya bantu mingi. Kuwa boma ya bigonsa ke sadisaka beto na kutina bampasi. Kansi, kana muntu ke kudiyangisa mingi, yandi lenda kudikota nsoki. Bansosa ya bo me sala ntama mingi ve na bambuta kuluta 68 000 monisaka nde ata basusi ya fioti-fioti lenda nata muntu na kufwa nswalu. Yezu yulaka bawi na yandi nde: “Nani na kati na beno, kana yandi ke kudiyangisa, lenda yika nda ya luzingu na yandi ata fioti?” Ya kieleka, basusi ke kumisaka luzingu ya muntu nkufi. Yo yina, Yezu longisilaka bawi na yandi nde: “Beno bika kudiyangisa.” (Matayo 6:25, 27) Inki mutindu?

Sambu na kubika kudiyangisa, yo ke lombaka kusadila mayele ya me fwana, kukumisa ngolo lukwikilu na Nzambi mpi kuvanda ti kivuvu sambu na bilumbu ya ke kwisa. Ata beto ke kutana ve ti bampasi bubu yai, beto lenda kutana ti yo na bilumbu ke kwisa. Yo yina, beto tadila mutindu Paul, Janet mpi Alona sadilaka bandongisila yai sambu na kunwana ti basusi.