Dibundu ya Mbote Kesyamisaka Bantu na Kuzitisa Ndinga ya Nzambi

YEZU kusyamisaka bantu na kuzitisa Ndinga ya Nzambi, Biblia. Dyambu yai kemonana pwelele na bamvutu yina yandi pesaka Dyabulu ntangu yandi pukumunaka yandi. (Matayo 4:24-11) Mu mbandu, nki Yezu kusalaka ntangu Satana kuzabisaka yandi na ntembe yonso na kubalula matadi yo kuma mampa? Yezu kubwaka ve na mpukumuna yina, kansi yandi vutukilaka bangogo ya kupemama ya Moize, yina nge lenda tanga na Kulonga 8:3. Ebuna ntangu Dyabulu kusongaka Yezu nde yandi tapesa yandi kiyeka na zulu ya bimfumu yonso ya nsi-ntoto kana yandi fukama sambu na kusamba Dyabulu, Yezu salaka inki? Yandi buyaka mambu yina mpi kusadilaka munsiku mosi ya Biblia yina nge lenda kuta na Kulonga 6:13.

Yindula fyoti! Ata yandi vandaka Mwana ya Nzambi, malongi ya Yezu vandaka kukatuka na Biblia ntangu yandi vandaka kulonga. Mpi ntembe kele ve nde yandi yambulaka ve Ndinga ya Nzambi ata mbala mosi sambu na kulanda binkulu ya bantu. (Yoane 7:16-18) Kansi, bantwadisi mingi ya mabundu ya ntangu ya Yezu vandaka kuzitisa ve Ndinga ya Nzambi bonso yandi. Sambu na nki ve? Bo vandaka kumona nde binkulu ya bantu vandaka mfunu mingi kuluta Masonuku ya Santu. Yezu kuzabisaka bamfumu ya mabundu yina na masonga yonso nde: “Beno ke fwaka mambu yina ya Nzambi ke tubaka; yo yina beno ke landaka bansiku na beno mosi. Beno bantu ya luvunu, Yezaya tubaka mambu ya kieleka ntangu yandi tubaka na ntwala sambu na beno nde: ‘Nzambi ke tubaka nde: Bantu yai ke zitisaka mono kaka na munoko, kansi na ntima ve. Bisambu yina ya bo ke sambaka mono kele ya mpamba, sambu bo ke longaka bansiku ya bantu bonso nde yo kele malongi ya Nzambi!’”​—Matayo 15:6-9.

 Mabundu mingi ya nsi-ntoto, ya Bukristu mpi yina kele ve ya Bukristu, ketubaka nde bo kezitisaka Biblia. Ata mpidina, nge mezaba mabundu ikwa ya kebuyaka kuzitisa bansiku ya bantu ntangu bansiku yango kewakanaka ve ti malongi ya pwelele ya kele na Ndinga ya Nzambi? Beto tadila bambandu zole.

NTU-DYAMBU: Batitre ya bo kepesaka bantwadisi ya mabundu.

MAMBU YINA BIBLIA KELONGAKA: Yezu kubedisaka bantwadisi ya mabundu ya ntangu na yandi sambu bo vandaka kuzola batitre mpi lukumu. Yandi tubaka nde bantu yina vandaka kuzola “kuvanda na bisika ya luzitu na bafete ti na bakiti ya ntete na banzo ya bisambu. Bo ke zolaka nde bantu kupesa bo mbote na bazandu, bo binga bo nde ‘Longi.’” Na nima Yezu kuzabisaka balongoki na yandi nde: “Muntu lenda binga beno ve nde ‘Longi’, sambu beno kele bampangi, beno ke kaka na Longi mosi mpamba. Ebuna awa na nsi-ntoto beno lenda binga ata muntu mosi ve nde ‘Tata’, sambu beno ke kaka na Tata mosi mpamba yina kele na zulu.”​—Matayo 23:1-10.

NGYUFULA: Keti bantwadisi ya dibundu yai kezolaka nde bantu kubinga bo na batitre ya lukumu mpi kesosaka lukumu na bisika ya bo kezingaka, to keti bo kezitisaka ntuma ya Yezu ya kubuya kusala mutindu yina?

NTU-DYAMBU: Kusadila bifwanisu na lusambu.

MAMBU YINA BIBLIA KELONGAKA: “Kusala ve biteki to bifwanisu ya bima yina kele kuna na zulu to awa na nsi-ntoto to na masa yina kele kuna na nsi ya ntoto. Kufukama ve na ntwala ya biteki sambu na kusambila yo.”​—Kubasika 20:4, 5.

Ntumwa Yoane kusonikilaka Bakristu nde: “Beno tina banzambi ya biteki.”​—1 Yoane 5:21.

NGYUFULA: Keti dibundu yai kelemfukaka na bansiku ya pwelele ya Biblia ya kubuya kusadila bifwanisu ti biteki sambu na kusambila Nzambi?

Nge Lenda Mona Nzila ya Mbote

Ata bubu yai mabundu kele mingi kibeni, nge lenda mona dibundu yina kenataka na luzingu. Kele ti mambu mingi ya kesadisaka na kuzaba “dibundu ya bunkete mpi ya kukonda mvindu na meso ya Nzambi.” (Yakobo 1:27, New Revised Standard Version) Baverse ya bo mesadila na masolo yai kele bonso bidimbu ya kesongaka nzila mpi yo lenda sadisa na kunata nge na dibundu yina.

Sambu na nki ve kulomba Bambangi ya Yehowa na kutendudila nge bamvutu ya bo mepesa na bangyufula ya kele na masolo yai? Ntangu nge ketadila mambu yina bo ketuba, landa mbandu ya mbote ya bantu yina kuzingaka na mbanza Berea na mvu-nkama ya ntete. Na nima ya kuwa mambu yina Polo kusamunaka, “bo vandaka kuzikisa mbote-mbote na Mukanda ya Nzambi sambu na kutala kana mambu yina ya Paulo vandaka kutuba vandaka kwenda kiteso mosi.” (Bisalu 17:11) Kana, bonso bantu ya Berea, nge kezitisa Ndinga ya Nzambi mpi kelonguka yo na kikesa yonso, nge tamona nzila yina kenataka na luzingu. Kana na nima nge tapona na kutambula na nzila yina, yo kele nsola yina nge mosi tasala.

[Bangogo sambu na kubenda dikebi ya kele na lutiti 9]

Inki dibundu kesyamisaka bantu na kulonguka Masonuku sambu na kumona kana mambu ya bo kelonguka kele mpenza ya kyeleka?