Kulonga 8:1-20
8 “Nge fwete sala yonso na kuzitisaka mbote-mbote bansiku yonso ya mono ke pesa nge bubu yai, sambu beno landa na kuzinga,+ beno kuma mingi, beno kota mpi beno baka insi yina Yehowa zengaka kieleka na ba-nkaka na beno.+
2 Yibuka nzila ya nda yina Yehowa Nzambi na nge tambusaka nge bamvula yai 40 na ntoto-makanga,+ sambu na kulonga nge kudikulumusa mpi kumeka+ nge sambu na kuzaba mambu yina vandaka na ntima na nge,+ kana nge ta zitisa bantuma na yandi to ve.
3 Ebuna, yandi longaka nge kudikulumusa mpi bikaka nde nge wa nzala+ mpi pesaka nge mana+ na kudia, yina nge ti ba-nkaka na nge zabaka ve, sambu na kusonga nge nde muntu ke zingaka na mampa mpamba ve, kansi muntu ke zingaka na mambu yonso ya ke basikaka na munoko ya Yehowa.+
4 Bilele yina nge lwataka bebaka ve, mpi makulu na nge vimbaka ve na bamvula yai 40.+
5 Nge me zaba mbote na ntima na nge nde Yehowa Nzambi na nge vandaka kusungika nge,+ kaka mutindu muntu ke sungikaka mwana na yandi.
6 Ntangu yai, nge fwete tambula na banzila ya Yehowa Nzambi na nge mpi kuwa yandi boma sambu na kuzitisa bantuma na yandi.
7 Sambu Yehowa Nzambi na nge ke nata nge na insi mosi ya mbote,+ insi ya bamasa* mpi ya banto ya masa* yina ke kulumuka na muwanda mpi na ntoto ya bangumba,
8 insi ya ble ti orze, ya banti ya vinu, banti ya bafige, mpi banti ya bagrenade,+ insi ya ba olive yina bo ke sadilaka mafuta mpi insi ya bwiki,+
9 insi yina madia ta konda ve mpi yina nge ta konda ve ata kima, insi yina matadi me fuluka ti bibende mpi yina nge ta timuna kwivre na bangumba na yo.
10 “Ntangu nge ta dia mpi ta fuluka, nge fwete kumisa Yehowa Nzambi na nge sambu na insi ya mbote yina yandi me pesa nge.+
11 Keba, kuvila ve Yehowa Nzambi na nge mpi kuyambula ve kuzitisa bantuma na yandi, bankanu na yandi, mpi bansiku na yandi yina mono ke pesa nge bubu yai.
12 Ntangu nge ta dia mpi ta fuluka, mpi nge ta tunga banzo ya kitoko mpi ta zinga muna,+
13 ntangu bangombe na nge mpi mameme na nge ta kuma mingi, ntangu arza ti wolo na nge ta kuma mingi, mpi ntangu nge ta vanda ti bima mingi,
14 kubika ve nde ntima na nge kukuma lulendo+ mpi kunata nge na kuvila Yehowa Nzambi na nge, yina basisaka nge na insi ya Ezipte, na nzo ya kimpika,+
15 yina salaka nde nge tambula na ntoto-makanga+ ya nene mpi ya ke pesa boma, ti banioka ya ndikila mpi bankutu* mpi ntoto ya kuyuma yina kele ve ti masa. Yandi salaka nde masa kubasika na ditadi ya sileksi+
16 mpi yandi pesaka nge mana+ na ntoto-makanga sambu na kudia, mana yina batata na nge zabaka ve, sambu na kulonga nge kudikulumusa+ mpi kumeka nge na mpila nde nge baka mambote na bilumbu ke kwisa.+
17 Kana nge tuba na ntima na nge nde, ‘Ngolo na mono mosi mpi ngolo ya diboko na mono mosi me sala nde mono kuma ti kimvwama yai,’+
18 yibuka nde Yehowa Nzambi na nge muntu ke pesa nge ngolo ya kukuma ti kimvwama,+ sambu na kulungisa kuwakana na yandi yina yandi zengaka kieleka na ba-nkaka na nge, mutindu yandi ke sala yo bubu yai.+
19 “Kana nge vila Yehowa Nzambi na nge, nge landa banzambi ya nkaka, nge sadila bo, mpi nge fukimina bo, mono ke tubila beno kieleka bubu yai nde beno ta fwa kibeni.+
20 Beno ta fwa bonso makanda yina Yehowa ke na kufwa na ntwala na beno, sambu beno me wa ve ndinga ya Yehowa Nzambi na beno.+
Banoti na nsi ya lutiti
^ To “miwanda ya masa.”
^ To “banto ya masa ya mudindu.”
^ To “binkala-nkala.”
