BAC a neɛqel Lmasiḥ, Yahwa yessexdem xilla n lanbeyya iwakken a d-​caren ɣef kra n ţfaṣil yeɛnan talalit, leqdic akk-​d lmut n Wemsellek-​agi i d-​iwɛed Ṛebbi. Licaṛat-​agi meṛṛa ḍrant di Ɛisa Lmasiḥ. D ayen yessewhamen m’ara nẓerr ţfaṣil-​nsent d wamek i ṣeḥḥant. A nwali kra seg-​sent yeɛnan talalit n Lmasiḥ akk-​d temẓi-​ines.

 Nnbi Icɛaya icar-​ed belli Lmasiḥ a d-​yekk si tarwa n ugellid Dawed. (Icɛaya 9:6) Ţ-​ţideţ, Ɛisa ilul-​ed si tarwa n ugellid-​agi.—Matta 1:1, 6-17.

Mixa, yellan d nnbi nniḍen n Ṛebbi, yenna-​d belli aqcic-​agi ad yuɣal d lḥakem yerna a d-​ilal di “Bit-​Liḥim Ifraṭa.” (Mixa 5:1) Di zzman ideg i d-​ilul Ɛisa, llant snat n temdinin  di Isṛayil i geţţusemman Bit-​Liḥim. Yiwet tella di lǧiha n ufella, ɣer tama n temdint n Naṣarit, ma ţ-​ţayeḍ tella teqreb ɣer Yarucalim, di Yahuda. Tamdint-​nni n Bit-​Liḥim iqerben Yarucalim qqaren-​as zik Ifraṭa. Ɛisa ilul-​ed di temdint-​agi, swaswa akken i t-​id-​tenna licaṛa!—Matta 2:1.

Ɛlaḥsab n licaṛa nniḍen, Mmi-​s n Ṛebbi a d-​yeffeɣ si “Maṣer”. Asmi yella Ɛisa d amecṭuḥ, wwin-​t ɣer Maṣer. Mbeɛd mi gemmut Hiṛudus, rran-​t-​id syenna. Annect-​a yesseḍra licaṛa-​nni.—Hucaɛ 11:1; Matta 2:15.

Deg weḥric yeţţusemman: “ Licaṛat yeɛnan Lmasiḥ”, aţ-​ţafeḍ seddaw “Licaṛa” ifyar ideg i llan kra n ţfaṣil yeɛnan Lmasiḥ. Ẓer ma kifkif-​iten akk-​d yefyar yellan seddaw “Amek i d-​teḍra.” Ayagi ad yesseǧhed liman i tesɛiḍ deg Wawal n Ṛebbi.

M’ara tessenqdeḍ ifyar-​agi, ur teţţu ara belli wid yellan d licaṛat ţwaketben d leqrun uqbel a d-​ilal Ɛisa. Ɛisa yenna-​d: “Ilaq a d-​iḍru wayen akw yuran fell-​i di ccariɛa n Musa, di Lanbeyya akw-​d Ihellilen.” (Luqa 24:44) Tzemreḍ aţ-​ţwaliḍ deg wedlis-​inek iqedsen belli licaṛat-​agi yakk ḍrant-​ed, yerna ula di leḥwayeǧ timecṭaḥ!