Jop 39:1-30
39 “Kati nuan nemu ni maya kambin gunung ngadaka anak?
Kala nuan meda rusa ngadaka anak?
2 Kala nuan ngitung berapa bulan sida ngandung?
Kati nuan nemu ni maya sida ngadaka anak?
3 Kambin enggau rusa mungkukka tubuh diri lebuh sida ngadaka anak.Udah nya, sida nadai agi berasai pedis.
4 Bala anak sida mansang besai sereta kering ba padang;Sida mupuk lalu nadai pulai agi ngagai indai sida.
5 Sapa ke ngelepaska keledai liar?Sapa ke muka tanchang keledai liar?
6 Aku udah ngaga padang pasir nyadika rumah iya,Lalu Aku udah meri tanah ti masin nyadika endur alai iya diau.
7 Iya ngenyauhka diri ari kuta ti inggar;Iya nadai ninga orang ke rauh-rauh ngasuh iya gawa.
8 Keledai liar segau-segau ba sebelah bukit begigaka padang rumput,Begigaka bemacham bansa utai tumbuh.
9 Kati sapi lelaki ti liar deka bekereja ke nuan?
Kati sapi lelaki ti liar deka bemalam ba kandang jelu nuan?
10 Ulih nuan nanchang sapi lelaki ti liar ngambika iya ngeradu alur tanah ke nuan?Kati nuan ulih ngasuh iya ngeradu tanah ke nuan ba lebak?
11 Kati nuan deka ngarapka pengering iya ti besai,Lalu ngasuh iya ngereja pengawa ti berat ke nuan?
12 Kati nuan deka ngarapka iya mai pulai asil utai ke diketau nuan?Kati iya deka mai asil utai ke diketau nya ngagai endur alai ngindik utai ke diketau?
13 Burung unta gaga ati ngebapka sayap iya.Tang kati ujung sayap enggau bulu iya ulih telabanka ujung sayap enggau bulu bangau?
14 Burung unta ninggalka telu iya ba tanah,Lalu nejuka telu nya angat laban debu.
15 Iya enda ingat bisi kaki ke deka mechahka telu nyaTauka bisi jelu liar ke deka ngindik telu nya.
16 Iya kasar enggau bala anak iya; sida baka ke ukai anak iya empu.Iya enda peduli enti semua utai ke digaga iya lebu ngapa.
17 Aku nadai meri penemu-dalam ngagai burung unta,*Lalu Aku nadai ngaga iya ngambika ulih meretika utai.
18 Tang lebuh iya ngebapka sayap iya lalu belanda,Iya ketawaka kuda enggau orang ke nepan kuda.
19 Kati nuan ke meri pengering ngagai kuda?
Kati nuan ke ngias rekung iya ngena bulu ti lawa?
20 Ulih nuan ngasuh iya merejuk baka buntak?
Bunyi kesuh idung iya amat ngenakutka ati.
21 Iya ngentakka kaki iya ba lebak sereta gaga ati mantaika pengering iya,Lalu mansang ngagai endur alai beperang.*
22 Iya ketawaka asai ati ti takut laban nadai utai ke ulih ngasuh iya takut.
Pedang enda ulih ngasuh iya nikal pulai.
23 Sarang anak panah orang ke nepan iya begusak.Sangkuh ke ditikauka sida tampak bekilap.
24 Enggau naka pengagit, kuda nya mansang ke depan;*Iya enda ulih diau jenuh* lebuh ninga munyi terumpit.*
25 Lebuh terumpit disepu, iya mansutka munyi ti inggar!
Ari jauh iya udah nyium bau perangSereta ninga panjung bala ketuai soldadu enggau panjung soldadu ke beperang.
26 Kati burung falkon ulih terebai tinggiSereta ngerembaika sayap iya terebai ngagai selatan ketegal penalam penemu nuan?
27 Kati burung menaul terebai tinggi ke atasSereta begagaka tansang ba endur ti tinggi ketegal nitihka asuh nuan?
28 Burung menaul diau ba tebing bukit batu.Iya diau ba tansang iya ba bukit batu.
29 Ari endur nya, iya begigaka pemakai;Mata iya beratika utai ari jauh.
30 Bala anak iya nginsap darah;Dia alai bangkai, dia meh alai burung menaul.”
