Jop 21:1-34
21 Ku Jop nyaut:
2 “Pendingka enggau manah utai ke deka disebut aku;Nya aja utai ke dipinta aku kena aku merindang ati diri.
3 Sabar meh lebuh aku bejaku;Udah nya, ni ku kita meh ngeleseka aku.
4 Kati sebana aku ditujuka ngagai mensia?
Enti amat, nama kebuah aku agi sabar?
5 Perening aku lalu kita deka tekenyit;Kita enda tepansutka jaku.
6 Lebuh aku ngenang nya baru, aku kesal,Lalu semua tubuh aku gegetar.
7 Nama kebuah orang ke jai idup lama sampai tuai?Nama kebuah sida nyadi kaya?*
8 Sida selalu begulai enggau bala anak sida,Lalu sida sempat meda peturun sida.
9 Rumah sida likun, lalu sida enda kala takut.Petara enda ngukum sida ngena tungkat Iya.
10 Sapi lelaki sida bisi mayuh anak;Sapi indu sida beranak lalu nadai kala gugur anak.
11 Bala anak sida engkejuk belanda baka seraban bedus.Sida gaga ati bemain.
12 Sida belagu diiring bunyi tamborin enggau belikan.*Sida gaga ati ninga bunyi kesuling.
13 Sida idup nyamai sereta lantang,Lalu sida enda merinsa lebuh* sida nurun ngagai Kubur.*
14 Ku sida madah ngagai Petara ti bendar: ‘Anang ngachau kami!
Nadai kami tu ka nemu jalai Nuan!
15 Sapa Petara ti Pemadu Bekuasa nya nyentukka kami patut nyembah Iya?
Nama penguntung iya enti kami ngelala Iya?’
16 Tang aku nemu sida nadai kuasa atas penyamai pengidup sida.
Chara aku berunding enggau chara orang ke jai berunding* jauh enda sama.
17 Ni penyuah lampu orang ke jai dipadamka?
Ni penyuah sida ditinggang bencana?
Ni penyuah Petara deka ngemunaska sida dalam pengeringat?
18 Kala sida baka rumput rangkai ke disepu angin?Kala sida baka ampa ke dikebuka ribut?
19 Petara deka ngukum bala anak orang ke jai ketegal penyalah apai sida.
Taja pia, awakka Petara mega ngukum apai sida ngambika apai sida nemu diri udah ngereja penyalah.
20 Awakka mata sida empu meda pemesai penusah ke ninggang sida.Awakka sida ngirup ari cawan pengeringat Petara ti Pemadu Bekuasa.
21 Enti umur sida enda panjai,Kati sida ibuhka utai ke deka nyadi ngagai bala peturun sida?
22 Ulih orang ngajar* Petara?Endaka Petara ke ngakim semua orang, nyengkaum orang ke pemadu dipebasa?
23 Bisi orang idup lantang, lalu sekali pan enda irau.Tang sida mati taja pan sida agi kering,
24 Taja pan pah sida belapis enggau lemak,Lalu tulang sida agi kering.*
25 Tang bisi mega orang ke idup penuh laban pemerinsa,*Lalu nadai ngasaika utai ti manah sampai sida mati.
26 Sida sama-sama deka gali dalam debu.Semua sida deka diempa ulat.
27 Aku endang nemu utai ke diperundingka kitaSereta pelan jai kita kena nyalahka aku.*
28 Kita nanya: ‘Dini alai rumah orang ke tebilang nya?Dini endur langkau kain alai orang ke jai nya diau?’
29 Kati kita nadai kala nanya orang ke seruran bejalai jauh?
Kati kita enda belajarka utai ke diperatika sida?*
30 Orang ke jai selalu selamat lebuh bencana nyadi;Sida selalu lepas ari hari pengeringat Petara.
31 Sapa ke deka ngerara orang ke jai pasal jalai pengidup sida?Sapa ke deka malas utai ke udah dikereja sida?
32 Lebuh sida dianjung ngagai pendam,Bisi orang ke deka nyaga kubur sida.
33 Tanah ba lebak* ke alai sida gali manis ba sida.Semua mensia deka nitihka sida,*Baka pemayuh orang ke dulu mati sebedau sida.
34 Nya alai, nadai guna kita nguji ngelantangka ati aku,
Laban jaku kita bula magang.”
Nota Kaki
^ Tauka “nyadi bekuasa?”
^ Tauka “harp.” Sebengkah perengka musik ke betali baka gitar, tang gamal iya enda sebaka enggau gitar.
^ Tauka “Lalu sekejap aja.” Reti iya, jampat ngapuska seput lalu nadai ngasaika nama-nama pemedis.
^ Tauka “Sheol,” iya nya pendam ke mensia. Peda Penerang Leka Jaku.
^ Tauka “Pelan aku enggau pelan orang ke jai.”
^ Tauka “ngajar penemu ngagai.”
^ Jaku Asal, “Lalu sumsum tulang sida basah.”
^ Tauka “pemedis.”
^ Tauka engka, “kena ngereja utai ti kejam ngagai aku.”
^ Jaku Asal, “belajarka bukti-bukti ke diulih sida?”
^ Tauka “wadi.”
^ Jaku Asal, “Sida deka narit semua mensia nitihka sida.”
