Jop 13:1-28
13 “Au, mata aku udah meda semua utai nya.Pending aku udah ninga lalu meretika utai nya.
2 Aku mega nemu nama utai ke ditemu kita;Aku enda kurang ari kita.
3 Tang aku ka agi bejaku enggau Petara ti Pemadu Bekuasa;Aku deka mai kes aku ngagai Iya.
4 Kita ngena pemula ngenyaika nama aku;Semua kita baka lutur ke nadai guna.
5 Uji enti sema kita diau diri,Nya baru kita tampak bepenemu-dalam.
6 Pendingka meh utai ke diterangka aku.Peratika meh lebuh aku mantaika kes aku.
7 Kati kita deka nyebut utai ti enda lurus ngarika Petara?Kati kita deka bejaku bula ngarika Iya?
8 Kati kita deka bepiak ngagai Iya?Kati kita nguji deka bejaku ngarika kes Petara ti bendar?
9 Lebuh Petara meresa kita, kati Iya deka tetemuka utai ti manah ba kita?
Ulih kita nipu Iya baka kita ke nipu mensia?
10 Iya tentu deka nganu kita,Indah lebuh kita belalai bepilih mata.
11 Kati kita enda takutka pemesai mulia Iya?Kati kita enda takutka Iya?
12 Jaku-dalam ke disebut kita nadai guna baka amau;Jaku ke dikena kita ngetanka diri lemi baka terabai ke digaga ari tanah liat.
13 Anang bemunyi ngambika aku ulih bejaku.
Nama-nama utai ke deka nyadi ba aku, aku enda peduli!
14 Aku sedia napi utai ke tau nganu nyawaSereta sedia berambunka nyawa diri.
15 Taja pan Petara engka deka munuh aku, tang aku deka mengkang nganti Iya;Au, aku deka mantaika kes aku* ba depan Iya.
16 Enggau nya, Iya deka nyadi penyelamat aku,Laban orang ke jai* enda tau ngadap Iya.
17 Pendingka manah-manah jaku aku,Lalu peratika utai ke ditusui aku.
18 Diatu aku sedia deka mantaika kes aku;Aku nemu diri endang betul.
19 Sapa deka bekelikuh ngelaban aku?
Aku tentu mati enti aku enda bemunyi!*
20 O Petara, aku mina minta dua iti utai ari Nuan,Ngambika aku enda belalai ari Nuan.
21 Jauhka meh jari Nuan ari aku,Lalu anang ngasuh aku balat takutka Nuan.
22 Kangauka aku, lalu aku deka nyaut,Tauka awakka aku bejaku, lalu Nuan nyaut aku.
23 Nama penyalah aku? Nama dosa aku?
Padahka meh penyalah enggau dosa aku.
24 Nama kebuah Nuan nguingka mua Nuan ari aku?Nama kebuah Nuan ngaga aku baka munsuh?
25 Aku tu baka daun ke dipuput angin sereta baka rumput rangkai.Nya alai, nama kebuah Nuan ngenakutka aku sereta begagaika aku?
26 Nuan majak nuliska jaku tuduh ngelaban aku,Lalu ngasuh aku merinsa ketegal dosa ke dikereja aku lebuh aku agi biak.
27 Nuan nganchin kaki aku ngena kanchin kayu.Nuan beratika tiap iti singkang aku,Lalu nitihka tiap iti bekau kaki aku.
28 Lelaki tu* nyadi baka utai ke udah reput*Sereta baka gari ke diempa indu gegat.
