Jop 2:1-13

  • Sitan nanyaka tuju ati Jop baru (1-5)

  • Sitan dikemendar ngemediska tubuh Jop (6-8)

  • Ku bini Jop: ‘Sumpah Petara lalu mati!’ (9, 10)

  • Tiga iku kaban Jop datai (11-13)

2  Udah nya, maya bala melikat* datai ngadap Jehovah, Sitan mega bisi datai ngadap Jehovah. 2  Jehovah nanya Sitan: “Datai ari ni nuan?” Sitan lalu nyaut Jehovah: “Aku baru udah mindah kin kia, segau-segau ba dunya.” 3  Ku Jehovah bejaku ngagai Sitan: “Bisi nuan beratika nembiak Aku, Jop? Nadai orang ba dunya ke baka iya. Iya orang ti lurus ati sereta setia ba semua utai.* Iya nangika Aku sereta enggai ngereja penyai. Iya mengkang ngetanka penetap ati iya taja pan nuan nguji ngasut Aku ngemediska iya taja nadai kebuah.” 4  Tang ku Sitan nyaut Jehovah: “Semua orang semina ibuhka diri empu aja.* Mensia deka nyerahka semua utai ke dikemisi iya asal nyawa iya idup. 5  Tang, enti Nuan ngunjurka jari Nuan lalu ngemediska tubuh iya,* iya tentu deka nyumpah Nuan depan-depan.” 6  Udah nya, ku Jehovah bejaku ngagai Sitan: “Barang ku nuan meh ngereja nama-nama utai ke dikedekaka nuan ngagai iya.* Tang anang munuh iya.” 7  Udah nya, Sitan pan mupuk ari mua Jehovah lalu ngasuh Jop kena pisa ti balat pedis sereta benanah, ari tapa kaki nyentuk ngagai punjung pala. 8  Jop duduk ba atas amau lalu ngeraus kulit iya ngena kerimpak periuk tanah. 9  Ku bini iya madah ngagai iya: “Kati nuan agi keran deka ngetanka penetap ati* nuan ba semua utai? Manah agi nuan nyumpah Petara lalu mati!” 10  Tang ku Jop nyaut: “Nuan bejaku munyi indu ke beli. Kati kitai semina nerima utai ti manah aja ari Petara ti bendar, lalu enggai nerima utai ti jai?” Taja pan semua utai nya ninggang Jop, tang iya nadai nyebut utai ti bedosa. 11  Tiga iku kaban Jop, iya nya Elipas orang Teman, Bildat orang Shuah, enggau Sopar orang Naamah, mupuk ari endur diri pengudah sida ninga semua penusah ke ninggang Jop. Sida besetuju deka betemu enggau pangan diri, lalu nemuai ngagai Jop. Sida deka ngayanka pengibuh sida ngagai Jop, lalu ngelantangka ati iya. 12  Lebuh sida tepedaka Jop ari jauh, sida nyau enda ngelala iya agi. Tang lebuh sida nemu nya Jop, sida berengkah inggar nyabak lalu nyarikka gari diri. Sida naburka debu ke atas sereta ngagai pala sida. 13  Sida duduk ba tanah begulai enggau iya tujuh hari tujuh malam. Sida tiga nadai bejaku indah seleka pan, laban sida meda iya kelalu balat merinsa.

Nota Kaki

^ Jaku Asal, “bala anak Petara.”
^ Tauka “sereta nadai bepenyalah; sereta ngembuan integriti.”
^ Jaku Asal, “Kulit ganti kulit.”
^ Tauka “lalu negu tulang enggau isi iya.”
^ Jaku Asal, “Iya ba jari nuan.”
^ Tauka “ngetanka integriti.”

Hak cipta bup tu