THAUM xub sau phau Vajlugkub ua lus Henplais thiab lus Kili, phau Vajlugkub siv lo lus Henplais she’ohlʹ thiab lo lus Kili haiʹdes tshaj li 70 tawm zaus. Ob lo lus ntawd muaj tib lub ntsiab xwb thiab yog ntsig txog txojkev tuag. Ib txhia Vajlugkub muab 2 lo lus ntawd txhais ua “qhov ntxa,” “ntuj tawg,” lossis “lub qhov.” Feem ntau lwm yam lus txhais tsis tau lub ntsiab ntawm 2 lo lus ntawd. Phau Vajlugkub Hmoob muab 2 lo lus ntawd txhais yuam kev tias, “tub tuag teb.” Twb yog vim li ntawd, phau Vajlugkub New World Translation thiaj siv lo lus “Sheol” thiab “Hades” ntawm cov lus hauv qab taw qhia. Lo lus Henplais thiab lo lus Kili ntawd txhais li cas tiag? Cia peb kawm seb phau Vajlugkub siv 2 lo lus ntawd li cas.

 Laj Lim Tswvyim 9:10 hais tias: “Hauv tub tuag teb [Sheol] uas koj yuav mus ntawd tsis muaj haujlwm thiab tsis muaj kev xav, tsis muaj kev txawj ntse thiab tsis muaj tswvyim.” Raws li nqe no, Sheol puas yog ib lub qhov ntxa? Tsis yog. Thaum phau Vajlugkub hais txog lub qhov ntxa lossis toj ntxas, phau Vajlugkub siv lwm lo lus Henplais thiab lus Kili, tsis yog siv lo lus she’ohlʹ thiab haiʹdes. (Chiv Keeb 23:7-9; Mathai 28:1) Tsis tas li ntawd xwb, thaum hais txog tej toj ntxas uas log ib cuab neeg, lossis tej qhov ntxa uas log tibneeg coob coob ua ke, phau Vajlugkub tsis siv lo lus “Sheol.”​—Chiv Keeb 49:30, 31.

Yog tias Sheol tsis yog tej toj ntxas thiab tej qhov ntxa ntawd, ces Sheol yog dabtsi tiag? Vajtswv Txojlus pab peb pom tias lo lus “Sheol” lossis “Hades” piv txwv txog lwm yam. Yaxaya 5:14 hais tias: “Tub tuag teb [Sheol] tshaib nqhis zuj zus, rua ncauj loj tshaj plaws.” Txawm tias Sheol twb nqos coob leej ntau tus lawm los, Sheol tseem tshaib qees. (Paj Lug 30:15, 16) Tej qhov ntxa txawj puv, tiamsis phau Vajlugkub qhia li no txog Sheol: “Tub tuag teb [Sheol] thiab qhov puas tsuaj txhaws tsis paub puv li.” (Paj Lug 27:20) Yog li ntawd, Sheol txhaws tsis txawj puv ib zaug li. Sheol thiab Hades tsis yog ib thaj chaw tiag tiag, tiamsis yog piv txwv txog noob neej lub qhov tuag xwb. Thaum tibneeg feem coob tas sim neej ces zoo li lawv tuag mus rau hauv qhov chaw piv txwv no.

Txojkev sawv hauv qhov tuag rov los, yuav pab peb to taub ntxiv txog “Sheol” thiab “Hades.” Vajtswv Txojlus qhia tias cov uas mus rau hauv Sheol lossis Hades yuav sawv hauv qhov tuag rov qab los. * (Yauj 14:13; Tubtxib Tes Haujlwm 2:31; Qhia Tshwm 20:13) Vajtswv Txojlus kuj qhia tias cov uas mus rau hauv Sheol lossis Hades, tsis yog cov uas pe hawm Yehauvas xwb. Tiamsis coob leej uas tsis pe hawm Yehauvas kuj yuav mus rau hauv thiab. (Chiv Keeb 37:35; Ntawv Nkauj 55:15) Twb yog vim li ntawd, phau Vajlugkub thiaj qhia tias “cov ncaj ncees thiab cov tsis ncaj puavleej yuav sawv hauv qhov tuag rov los.”​—Tubtxib Tes Haujlwm 24:15.