Yexus tsis yog txawj kho mob thiab tsa tau cov tuag ciaj xwb, nws tswj tau tej cua daj cua dub thiab nag xob nag cua huvsi. Tom qab Yexus thov Vajtswv saum roob tag, nws ntsia mus nram Hiavtxwv Kalilais thiab pom ib nthw cua daj cua dub. Nws cov tubtxib nquam tsis taus lub nkoj li vim cua ntsawj hlob heev. Yexus thiaj nqes saum roob los thiab mus kotaw saum nplaim dej hiavtxwv mus rau ntawm lub nkoj. Thaum cov tubtxib pom ib tug mus kotaw saum nplaim dej mas ua rau lawv ntshai kawg li. Tiamsis Yexus hais rau lawv tias: ‘Yog kuv, tsis txhob ntshai.’

Petus hais tias: ‘Tus Tswv, yog koj tiag no, hais kom kuv tuaj cuag koj.’ Yexus teb Petus tias: ‘Cia li tuaj.’ Txawm tias muaj cua daj cua dub hlob heev los, Petus cia li tawm hauv lub nkoj mus kotaw saum nplaim dej mus cuag Yexus. Tiamsis thaum Petus mus ze rau ntawm Yexus, nws ntsia pom cua ntsawj hlob heev ces nws poob siab nthav. Nws txawm pib tog rau hauv dej. Petus qw tias: ‘Tus Tswv, thov cawm kuv lauj!’ Yexus nthos nkaus nws txhais tes thiab hais tias: ‘Vim li cas koj tsis ntseeg? Koj txojkev ntseeg dua twg lawd?’

Thaum Yexus thiab Petus nce rau hauv lub nkoj ces cua cia li tus tamsid. Koj xav cov tubtxib xav li cas xwb? Lawv hais tias: ‘Koj yog Vajtswv tus Tub tiag.’

Zaum no tsis yog tib zaug uas Yexus tswj tej huab cua xwb. Muaj ib zaug, Yexus thiab nws cov tubtxib caij nkoj hauv hiavtxwv mus rau sab tid. Yexus pw tsaug zog tom tw nkoj lawm. Thaum Yexus tseem tsaug zog, muaj cua daj cua dub ntsawj hlob heev. Dej ntas ib nthw tas ib nthw tuaj rau hauv lub nkoj. Cov tubtxib thiaj mus tsa Yexus sawv thiab qw tias: ‘Xibhwb, peb twb yuav tuag! Thov pab peb!’ Yexus txawm sawv los thiab hais rau dej hiavtxwv tias: ‘Nyob twjywm.’ Tamsim ntawd cua txawm tu kiag thiab hiavtxwv cia li tus yees. Yexus nug cov tubtxib tias: ‘Nej txojkev ntseeg dua twg lawm?’ Lawv ib leeg hais rau ib leeg tias: ‘Cua thiab dej kuj mloog nws lus thiab.’ Cov tubtxib kawm tau tias yog lawv tso siab rau Yexus kawg siab, lawv tsis tas ntshai ib yam dabtsi li.