ZAJ KAWM 49
Yuav Ua Li Cas Koj Tsev Neeg Thiaj Muaj Kev Zoo Siab?—Ntu 1
Hnub ua tshoob yog hnub uas zoo siab tshaj plaws rau ob tug niam txiv uas nyuam qhuav sib yuav tshiab tshiab thiab nkawd vam tias nkawd yuav zoo siab li ntawd tas mus li. Cov niam txiv Khixatias uas sib yuav ntev ntev lawm thiab ua lawv lub neej raws li phau Vajlugkub hais, paub hais tias lawv yeej muaj peev xwm ua tau li ntawd.
1. Phau Vajlugkub hais li cas rau cov txiv?
Yehauvas muab tus txiv ua tus coj ntawm nws tsev neeg. (Nyeem Efexus 5:23.) Yehauvas xav kom tus txiv ua tej uas zoo rau nws tsev neeg xwb. Phau Vajlugkub hais rau cov txiv tias: ‘Nej yuav tsum hlub nej tus poj niam.’ (Efexus 5:25) Qhov no qhia tias tus txiv uas hlub nws tus poj niam yuav ua zoo rau nws tus poj niam, tsis hais thaum nkawd nyob hauv tsev, thaum nkawd tawm rooj mus sab nraud, los sis thaum nkawd nrog lwm leej lwm tus. Nws yuav tiv thaiv nws tus poj niam, tsis pub kom txom nyem los sis muaj kev nyuaj siab. (1 Timautes 5:8) Qhov tseem ceeb tshaj plaws, nws yuav pab nws tus poj niam kom muaj kev sib raug zoo nrog Yehauvas. (Mathais 4:4) Xws li thov Vajtswv thiab nyeem phau Vajlugkub nrog nws tus poj niam. Thaum tus txiv hlub thiab ua zoo saib xyuas nws tus poj niam ces nws los kuj yuav muaj kev sib raug zoo nrog Yehauvas thiab.—Nyeem 1 Petus 3:7.
2. Phau Vajlugkub hais li cas rau cov poj niam?
Vajtswv Txoj Lus hais rau cov poj niam tias ‘txhua tus poj niam nyias yuav tsum hwm nyias tus txiv.’ (Efexus 5:33) Tus poj niam uas hwm nws tus txiv yuav xam pom tej uas zoo txog nws tus txiv thiab yuav nco nws tus txiv txiaj ntsig rau qhov uas nws khwv khwv los yug lawv cov niam txiv tub thiab saib xyuas lawv. Nws kuj txhawb nws tus txiv thaum nws tus txiv txiav txim siab ua ib yam dab tsi. Txawm hais tias nws tus txiv teev tiam thiab tsis teev tiam Yehauvas los nws yeej ua zoo hais lus rau nws tus txiv thiab hais qhov zoo txog nws tus txiv xwb.
3. Ob niam txiv yuav ua li cas nkawd txoj kev txij nkawm thiaj ruaj khov?
Phau Vajlugkub hais tias thaum ob niam txiv sib yuav lawm ces nkawd “koom ib lub cev” lawm xwb. (Mathais 19:5) Yog li ntawd, nkawd yuav tsum tsis txhob cia ib yam dab tsi los cais tau nkawd txoj kev txij nkawm. Nkawd yuav tsum sib qhia siab thiab siv sij hawm los nyob ua ke. Tsis tas li ntawd xwb, dua li Yehauvas lawm ces nkawd yuav tsum tsis txhob cia ib tug twg los sis ib yam dab tsi los ua qhov uas tseem ceeb tshaj nkawd tus txij nkawm. Tshwj xeeb tshaj plaws, nkawd yuav tsum ceev faj tsis txhob mus ntshaw lwm tus uas tsis yog nkawd tus txij nkawm.
KAWM NTXIV
Kawm kom koj paub cov ntsiab lus hauv phau Vajlugkub uas yuav txhawb tau koj txoj kev txij nkawm kom ruaj khov.
4. Cov txiv, hlub thiab saib xyuas nej tus poj niam
Phau Vajlugkub hais tias, “Cov txiv yuav tsum hlub lawv cov pojniam ib yam li lawv hlub lawv lub cev.” (Efexus 5:28, 29) Nqe no qhia li cas tiag rau cov txiv? Saib zaj YEEB YAJ KIAB thiab tham txog lo lus no:
-
Piav seb tus txiv yuav ua li cas nws tus poj niam thiaj li paub tias nws hlub tshua nws tus poj niam?
Nyeem Kaulauxais 3:12 thiab tham txog lo lus no:
-
Tus txiv yuav ua li cas nws thiaj ua tau li nqe Vajlugkub no hais rau nws tus poj niam?
5. Cov poj niam, hlub thiab hwm nej tus txiv
Txawm hais tias tus txiv teev tiam thiab tsis teev tiam Yehauvas los, phau Vajlugkub hais tias tus poj niam yuav tsum hwm nws tus txiv. Nyeem 1 Petus 3:1, 2 thiab tham txog lo lus no:
-
Yog hais tias koj tus txiv tsis teev tiam Yehauvas ces koj yeej xav kom nws los teev tiam Yehauvas. Koj xav qhov twg yuav pab tau nws dua? Qhov uas koj pheej tas zaj tas zog tham txog Yehauvas rau nws los sis qhov uas koj coj zoo thiab hwm nws? Vim li cas koj thiaj xav li ko?
Yeej zoo dua yog hais tias ob niam txiv pom zoo ib yam nkaus. Tiam sis muaj tej thaud, tus poj niam yuav tsis pom zoo li nws tus txiv hais. Thaum zoo li ntawd, nws yuav tau ua siab ntev thiab ua zoo nrog nws tus txiv tham tias nws xav li cas. Tiam sis nws yuav tsum nco ntsoov tias Yehauvas muab lub luag hauj lwm rau tus txiv ua tus uas txiav txim siab seb qhov twg zoo dua rau nkawd lub cuab lub yig. Txawm nws tus txiv txiav txim siab li cas los nws yuav tau txhawb nws tus txiv. Yog nws ua li no, nws thiaj yuav pab tau nws tsev neeg muaj kev zoo siab. Nyeem 1 Petus 3:3-5 thiab tham txog lo lus no:
-
Yehauvas xav li cas thaum tus poj niam hwm nws tus txiv?
6. Neb ob niam txiv yeej kho tau neb tej teeb meem
Yeej tsis muaj ib nkawm niam txiv uas yuav tsis muaj teeb meem li. Yog li ntawd, thaum muaj teeb meem, nkawd yuav tsum sib pab nkawd thiaj yuav daws tau nkawd tej teeb meem. Saib zaj YEEB YAJ KIAB thiab tham txog ob lo lus no:
-
Hauv zaj yeeb yaj kiab no, ua li cas ob niam txiv no tsis sib hlub npaum li yav nram ntej ub lawm?
-
Nkawd ho ua li cas nkawd txoj kev txij nkawm thiaj ruaj khov?
Nyeem 1 Kauleethaus 10:24 thiab Kaulauxais 3:13. Thaum nyeem ib nqe tag ces tham txog lo lus no:
-
Thaum peb ua li nqe Vajlugkub no hais, yuav pab tau peb txoj kev txij nkawm kom ruaj khov li cas?
Phau Vajlugkub hais kom peb ib leeg hwm ib leeg. Thaum peb hwm lwm tus ces peb yuav ua zoo rau lawv thiab saib taus lawv. Nyeem Loos 12:10 thiab tham txog lo lus no:
-
Puas zoo rau tus txiv los sis tus niam tos seb nws tus txij nkawm puas yuav ua zoo rau nws ua ntej tso? Piav seb yog vim li cas koj thiaj hais li ko.
IB TXHIA HAIS TIAS: “Wb ob niam txiv tsis sib hlub li yav nram ntej ub lawm.”
-
Yog muaj neeg hais li no rau koj no, koj yuav ua li cas qhia rau lawv kom lawv thiaj paub tias phau Vajlugkub yuav pab tau lawv?
KOJ KAWM TAU DAB TSI
Ob niam txiv yuav muaj kev zoo siab yog hais tias nkawd txawj sib hlub, txawj sib hwm, thiab ua nkawd lub neej raws li phau Vajlugkub hais.
Rov Tham Dua
-
Tus txiv yuav ua li cas, nkawd ob niam txiv thiaj muaj kev zoo siab?
-
Tus niam yuav ua li cas, nkawd ob niam txiv thiaj muaj kev zoo siab?
-
Yog koj twb muaj txij nkawm lawm, tej ntsiab lus twg hauv phau Vajlugkub yuav pab tau koj txoj kev txij nkawm kom ruaj khov?
TSHAWB NTXIV
Kawm tej ntsiab lus uas yuav pab kom koj tsev neeg muaj kev zoo siab.
Saib zaj yeeb yaj kiab nrog suab nkauj uas qhia tias thaum peb ua peb lub neej raws li phau Vajlugkub hais ces Vajtswv yuav foom koob hmoov rau peb.
Kawm seb tus poj niam uas hwm nws tus txiv uas yog tus coj ntawm nws tsev neeg coj li cas.
Saib seb phau Vajlugkub tej lus cob qhia pab tau kev txij nkawm li cas.
Tej Yam No Yuav Pab Tau Koj Thiab
TEJ UAS COOB TUS NUG TXOG
Kev Kawm Vajlugkub Nrog Yehauvas Cov Tim Khawv Zoo Li Cas?
Yehauvas Cov Tim Khawv qhia Vajlugkub dawb xwb. Koj xav siv phau Vajlugkub twg los kawm los yeej tau. Koj yeej caw tau tag nrho koj tsev neeg thiab koj tej phooj ywg tuaj nrog koj kawm.
