Sugiri kami sang imo gindak-an.

Imol gid ang akon mga ginikanan, kag indi gani kahibalo magbasa ang akon iloy. Nagasagod kami sang mga baboy kag nagatanom sang mga utan sa pirme ginabahaan nga lugar malapit sa Taipei. Gintudluan nila ako nga importante ang pagpangabudlay kag ang pagbulig sa iban.

Relihioso man ang imo pamilya?

Taoismo ang amon relihion. Nagahalad kami sa “Dios sang Langit,” pero wala man kami sing nahibaluan parte sa iya. Natingala ako: ‘Ngaa nagaantos ang mga tawo? Ngaa kasakon sang mga tawo?’ Nagbasa ako sang mga libro parte sa Taoismo kag Budhismo kag parte sa kasaysayan sang Nasidlangan kag Nakatundan. Nakasimba pa gani ako sa pila ka relihion. Pero wala ko gihapon makita ang mga sabat.

Ngaa nagtuon ka sing siensia?

Nanamian gid ako sang matematika kag nagdayaw sa kon paano ang kasuguan sa pisikal kag kemikal nagapanghikot sa mga butang. Ang tanan, halin sa pinakadaku nga uniberso tubtob sa pinakagamay nga mikrobyo, may kasuguan gid nga nagakontrol. Kag luyag ko mahangpan ini nga mga kasuguan.

Ngaa nagpati ka nga matuod ang teoriya sang ebolusyon?

Kay wala man ako gintudluan nga sala ini. Halin sang hayskul tubtob kolehiyo ako, ebolusyon lang pirme ang akon nabatian. Kag bangod researcher ako sa siensia, ginapaabot nga dapat ko patihan ang ebolusyon.

Ngaa ginbasa mo ang Biblia?

Nag-istar ako sa Germany sang 1996 para magtuon pa gid. Sang masunod nga tuig nakilala ko ang babayi nga si Simone. Saksi ni Jehova sia kag gintanyagan  niya ako nga ipakita ang sabat sang Biblia sa akon mga pamangkot. Nangin interesado ako sang nagsiling sia nga ginapaathag sang Biblia ang kahulugan sang kabuhi. Halin sadto, nagabugtaw ako sing alas kuatro y media sang aga para magbasa sang Biblia sing isa ka oras. Dayon nagalakatlakat ako para magpamalandong. Naubos ko basa ang Biblia sing isa ka tuig. Nagdayaw gid ako sa pagkasibu sang mga tagna sini. Amat-amat nga nakumbinsi ako nga ang Biblia halin sa Dios.

Ano ang pagtamod mo sa ginhalinan sang kabuhi?

Sang ginhunahuna ko ini sing maayo sang hingapusan sang katuigan 1990, narealisar na sang mga molecular biologist nga ang chemistry sang buhi nga mga butang mas komplikado pa sangsa ginahunahuna sadto. Siempre, madugay na nga nahibaluan sang mga sientipiko nga ang protina sa buhi nga mga selula amo ang may pinakakomplikado nga mga molekula. Pero subong, nadiskobrehan nila nga ang mga protina gin-organisar para mangin daw nagaandar nga makina. Ang isa sini may kapin sa 50 ka protina. Kag bisan ang pinakasimple nga selula nagakinahanglan sang lainlain nga makina—halimbawa, para sa pagpanghikot, pagpatubas sing impormasyon, kag pagkontrol sang pagpakig-angot sang mga membrane.

Ano ang imo konklusion?

Ginpamangkot ko ang akon kaugalingon, ‘Ngaa organisado katama ining daw makina nga mga protina?’ Sadto, amo man sini ang ginapamangkot sang pila ka sientipiko. Ang isa ka propesor sang biochemistry sa Estados Unidos naghimo sang libro nga nagapaathag nga ang komplikado nga pagpanghikot sang buhi nga mga selula wala lang matabuan. Nagaugyon ako sa iya. Para sa akon gintuga gid ang kabuhi.

Ngaa nangin saksi ka ni Jehova?

Nagdayaw gid ako nga bisan pa may balatian si Simone, nagalakbay sia sing mga 56 kilometros kada semana para tudluan ako sa Biblia. Natun-an ko nga sang paggahom sang Nazi sa Germany, ang pila ka Saksi ginpriso sa mga kampo konsentrasyon bangod wala sila nagapakigbahin sa pulitika. Nagdayaw gid ako sang ila kaisog. Ang gugma sang mga Saksi sa Dios amo ang rason kon ngaa nangin isa ako sa ila.

Nakabenepisyo ka bala bangod nagpati ka sa Dios?

Siling sang akon mga kaupdanan mas malipayon na ako subong. Sang una, kanubo sang pagtan-aw ko sa akon kaugalingon bangod sang akon ginhalinan, gani wala ko ginasugid sa iban kon diin ako nagdaku kag wala ko gid ginasambit ang akon ginikanan. Pero natun-an ko sa Biblia nga wala nagatan-aw ang Dios sa aton tindog sa komunidad. Ang matuod, ginpadaku si Jesus sang isa ka pigado nga pamilya pareho sa akon. Subong, ginaatipan ko na ang akon mga ginikanan kag nalipay ako nga ipakilala sila sa akon mga abyan.