Magdiretso sa kaundan

Magdiretso sa listahan sang kaundan

Gikan sa Amon mga Bumalasa

Gikan sa Amon mga Bumalasa

 Gikan sa Amon mga Bumalasa

Diabetes Salamat gid sa serye nga “Pagkabuhi nga May Diabetes.” (Mayo 8, 2003) Nagapakigbato na ako sa diabetes kutob sang nagapangidaron pa lang ako sing apat ka tuig. Nagadumdom ako pirme nga ang mga butang kaangay sang pag-asawahay kag bug-os tion nga ministeryo indi gid puede sa akon, apang ining mga artikulo naghatag sa akon sing paglaum. Karon, sa edad nga 17, ginahimo ko nga tulumuron ang bug-os tion nga ministeryo, kag himuon ko ang bug-os ko nga masarangan agod malab-ot ini.

T. A., Japan

Ginakabig ko nga mapuslanon gid ang panugda nga ginhatag sa pamilya kag mga abyan nga indi nila pagpalig-unon nga magkaon sang kontra nga mga pagkaon ang mga may diabetes. Mabudlay gid ang pagluto para sa akon pamilya kag nian indi ko makaon ang akon ginluto. Daw diutay lamang ini nga butang para kay bisan sin-o nga wala sing diabetes, apang ginasiling ko sa inyo nga daku gid ini nga butang!

V. N., Italya

Isa ako ka nars kag manunudlo. Sa umpisa sang masunod nga semester, pagatudluan ko ang akon mga estudyante tuhoy sa diabetes. Ang ilustrasyon sa pahina 8 kag 9 mahapos hangpon, kag gamiton ko ini sa akon pagtudlo. Salamat sa pagbalhag sing ginpasimple nga mga artikulo tuhoy sa medikal nga mga topiko.

C. B., Pransia

Salamat sa mga artikulo tuhoy sa diabetes. Wala ako nagabalatian sini, kundi ang akon 14-anyos nga manghod nga babayi. Nahangpan ko na karon kon ano ang ginaeksperiensiahan sang akon manghod. Matuod nga dapat ako maghimo sing mga sakripisyo para sa iya, apang indi ini pareho kabudlay sangsa pagbalatian sing diabetes!

E.D.M., Italya

Ang akon iloy lima ka tuig na nga may diabetes. Pirme ako nagakabalaka tuhoy sa iya kapagros, tungod malayo ang puluy-an ko sa iya. Nagaplano ako nga padalhan sia sing isa ka kopya sining magasin. Ayhan makabulig ini bisan  malayo ako sa iya.

R. W., Indonesia

Kasamaran Nalipay ako sa pagbasa sa “How An Injury Changed My Life.” (Abril 22, 2003, Awake!) Ini nga artikulo nagabulig sa akon nga mabatas ang sakit sa akon likod nga nasamaran mga 30 ka tuig na ang nakaligad. Naeksperiensiahan ko ang madamo nga mga butang nga kaanggid sa naagihan ni Utod Stanley Ombeva. Nalugpayan ako sa paghibalo nga ang Pulong sang Dios nagabulig sa isa nga magsalig kay Jehova.

G. G., Estados Unidos

Nakadayaw gid ako sa prangka nga paglaragway ni Utod Ombeva sa iya reaksion sa iya kasablagan. Nakamaradmad ako kon daw ano ka di-salapakon ang akon mga problema kon ipaanggid sa ginaatubang niya. Ini nga artikulo nagbulig sa akon nga isentro ang akon igtalupangod sa positibo nga mga aspekto sang akon kabuhi.

S. C., Canada

Talalupangdon gid! Amo ina ang tinaga nga nagakabagay nga gamiton ko sa paglaragway sini nga artikulo. Daw indi ko mauntatan ang pagbasa sini. Makapahunahuna gid makita kon paano nangin makahulugan pa gid ang Kasulatan para kay Utod Ombeva sa tion nga kinahanglan gid niya ini. Magabulig ini sa akon agod mangin kapin ka mapatugsilingon kon nagabulig sa iban.

R. G., Estados Unidos

Napalig-on ako sa paghibalo nga bisan ang isa ka Cristiano nga gulang sa kongregasyon nagbatyag sini nga kaakig kag nagakilala nga kinahanglan ang tion agod malandas ini nga kahimtangan. Ginsaysay ni Utod Ombeva nga bisan sang naglala sing tuman ang iya balatian, wala gid sia nangin di-regular sa ministeryo. Determinado ako nga himuon man ini.

M. K., Japan

Pirme ako nagakahulog sang bata pa ako amo nga nagaantos ako karon. Nagabatyag ako pirme sing kasakit, nabudlayan sa paglakat, kag maluya ang lawas. Ang mga limitasyon ko sa Cristianong ministeryo nagapabatyag sa akon nga daw makaluluoy. Apang nakabulig sa akon ang pagbasa kon paano gin-atubang ni Utod Ombeva ang iya problema. Madamo gid nga salamat!

E. E., Estados Unidos