Ama kabiri oku Bakorinto 9:1-15
9 Oku bilolere akala kasi rhuli rhwakolera abachesibwa, birhahemere oku nshibe nabayandikira,
2 bulala menyere obulonza bwenyu bwinja buli bwarhuma nachitapa* oku bantu be Makedoniya, oku hamagera omwaka eyi abantu be Akaya bowe bali tayari kuhaana enshololo zabo, n’omwete gwenyu gwashunikire banene omu bantu be Makedoniya basholole.
3 Aliko namarhuma bene-berhu, omu kuntu rhurhabaga eyi rhuli rhwachitapira* busha, munabe tayari bwinja-bwinja nk’oku nabere naderha.
4 Oku bwindi, nka nyinjire n’abantu be Makedoniya rhukabugana murhali tayari, eyi rhwabo, eyi mwabo, rhweshi rhwayunva eshoni bulala rhubanihire.
5 Bobola mbwene oku kuli kwinja mbwire bene-berhu babe bayinja emunda muli, babe barheganya entulo yenyu erhengere oku murhima mwalaganyaga, omu kuntu ebe y’erheganyizwe banayibone nka ntulo ehaanirwe n’omurhima goshi s’arhali nka chintu banyegwaga.
6 Aliko oku bilolere echola, omuntu wabyala* bigeke nj’ashalula bigeke, n’omuntu wabyala binene nj’ashalula binene.
7 Buli muguma wenyu ahaane nk’oku analihigirire omu murhima gwage, buzira mageni changwa buzira kusezwa, bulala Mungu anasima omuntu onahaana n’obushagaluke.
8 Echindi, Mungu akagala kujira olukogo lwage rhurhakwanene lube lunene bwenene ku mwabo, omu kuntu esiku zoshi mube eyi mugwerhe buli chintu mukenere munabe eyi mugwerhe byoshi bihemerwe yi muyeneza buli kasi kenja.
9 (Nk’oku Amandiko maderhere: “Agabiire abantu bintu binene; anahere abakene. Ebijiro byage by’okunali byagenderera esiku n’amango.”
10 Bobuno, olala onaha omuhinzi emburho nene n’omugati g’okulya, nenyu abaha n’okubayongerera emburho omu kuntu mubyale,* anabarhabala mushalule bintu binene eju y’okunali kwenyu.)
11 Omu bintu byoshi mukala muchirire omu kuntu muyerekane omurhima g’okuhaana omu njira zoshi, n’abantu babwira Mungu koko eju y’enshololo mwarhuha rhubahekere;
12 bulala akala kasi mwahaabirwe k’okurhabala abandi karhali k’okurhabala abachesibwa bapate ebibakenere konyine, si kandi kali k’okulonza bantu banene babwire Mungu koko.
13 Kugerera echemezo akala kasi k’okuhaana oburhabale kali kahaana, bali bakuuza Mungu bulala mwachichire bufi oku myazi minja ya Kristu, nk’oku munali mwayitangaza embere z’abantu. Na bulala muli mwabashololera n’omurhima goshi n’okushololera abandi.
14 Na kugerera amasala m’okulakirira Mungu bali babajirira, bali bayerekana oku babazigiire eju y’olukogo lunene bwenene rhurhakwanene Mungu abayerekere.
15 Rhubwirire Mungu koko oku luhembo lwage rhurhakagala kufasiriya arhuhere oku busha.
