Ama kabiri oku Bakorinto 6:1-18
6 Bulala rhuli rhwakola na Mungu, rhubahemere nenyu murhayemeraga olukogo lwage rhurhakwanene na buzinda mufunde kuhikira omuhigo g’olola lukogo.
2 Bulala aderhere ntya: “Omu chihe naliri nayerekana olukogo lwani, nalikuyunvirhe; n’omu lusiku l’obuchunguke nalikurhabere.” Tala! Chinola ch’echihe Mungu arhuyereka olukogo lwage. Tala! Lunola l’olusiku l’obuchunguke.
3 Omu njira yoshi-yoshi, rhurhajira echintu chakagayisa abandi, omu kuntu akasi kerhu karhaderhwaga kubi;
4 s’ahubwe mu buli hali rhunachiyerekana oku rhukwanene kuba bakozi ba Mungu kugerera bigeregezo binene rhunalembera, amalibuko, ebihe by’obukene, ebibazo,
5 okushurhwa, okuhirwa omu prizo, okurherwa n’ebigusho by’abantu bakalihire, akasi kakomere, okurhaj’ero, okubula ebilyo;
6 omu kulama akalamo kachere, omu kujira ebipatene n’obumenyi, omu kuyerekana engeso y’okulindira n’obwinja, omu kuleka eroho lichesibwa liyerekeze akalamo kerhu, omu kuyerekana obuzigire burhali mu bulyalya,
7 omu kuderha ebinwa by’obukweri, omu kulangalira emisi ya Mungu, omu kuba nka rhuhekere entwaro z’okukola ebinja omu kuboko kw’ekulyo* n’okw’ekulembe,*
8 omu kuhaabwa obukuuze n’omu kusuzagurwa, rhube rhuli rhwaderhwa kubi changwa bwinja. Rhunabonwa nka bantu bali babesha n’obola rhuli rhwaderha okuli,
9 nka bantu barhamenyikene, n’obola Mungu arhuyinji, nka bantu bafaga mira, n’obola rhulamire, nka bantu bahaabirwe obuhane, n’obola rhurhachirwaga echihano ch’olufu,
10 nka bantu bali omu maganya, n’obola rhujira obusime esiku zoshi; nka bakene, n’obola rhunachiza bantu banene; nka nta chintu rhuherhe chiro, n’obola rhuherhe ebintu byoshi.
11 Bakorinto wee, rhwabumbwire obunu bwerhu yi rhuderha* nenyu, rhwanabafungulire omurhima gwerhu rhwaguleka wazi.
12 Rhurhafunda kubayereka obuzigire rhubaherheko, aliko mwabo murhayerekana obuzigire murhuherheko.
13 Che chirhumire mbabwirire nka muntu oli wabwira abana bage, nenyu mufungule emirhima yenyu muyileke wazi.
14 Murhashwekerwaga ku murhambaliko muguma n’abarhali bemezi. Bulala, ngahe okunali kwakayunvikana n’okuvuna amarhegeko? Changwa bichi omwangaza gushangirire n’omwizimya?
15 Olekere nantyo, bunvikane buhe buli aha kagarhi ka Kristu na Beliyali?* Changwa bichi omuntu oherhe obwemere ashangirire n’orhaherhe bwemere?
16 N’ehekalu lya Mungu liherhe bunvikane buhe n’esanamu? Bulala rhwabo rhuli hekalu lya Mungu olamire; nka kulala Mungu anaderhaga: “Nji nalama ahakagarhi kabo n’okulambagira ahakagarhi kabo; nji naba Mungu wabo, nabo nji baba bantu bani.”
17 “‘Bobola, murhenge ahakagarhi kabo, muchikule mubo,’ intyo ku Yehova aderhere, ‘munaleke okuhuma oku chintu chizingire’”; “‘naho nabayemera mube bantu bani.’”
18 “‘Nji naba yisho, nenyu nji mwaba bagala bani na bali bani,’ intyo ku Yehova Ogala Byoshi aderhere.”
