Ama kabiri oku Bakorinto 4:1-18
4 Che chirhumire, bulala rhugwerhe akala kasi ka Mungu kugerera olukogo arhuyerekere, rhurhali rhwachika entege.
2 Aliko rhwalekene n’ebintu bikozeze eshoni binakolwa omu bwibisho, rhurhachili rhwachigendesa omu bulyalya rhurhanali rhwashubanganya echinwa cha Mungu; s’ahubwe omu kujira okuntu okuli kumenyikane rhunayerekana embere za Mungu oku rhuli rhwakola ebinja omu kuntu buli zamiri y’omuntu ebirhegere.
3 Akaba kweri emyazi minja rhuli rhwatangaza yashukulirwe* kw’echitambara, yashukulirwe kw’echitambara oku baharabiswa,
4 k’okuderha balala barhali bemezi mungu w’elila gulu ahumize obwenge, omu kuntu omwangaza gw’emyazi minja y’obukuuze oku bilolere Kristu oli shusho lya Mungu gurhabakolezezaga.
5 Bulala rhurhali rhwahubiri oku birhulolere, si rhuli rhwahubiri oku bilolere Yesu Kristu oku ye Waliha n’oku nerhu rhuli baja benyu eju ya Kristu.
6 Bulala Mungu yenyine yi waderhaga ntya: “Omwangaza gukoleze omu mwizimya,” anakolezeeze emirhima yerhu omu kuntu ebe omu mwangaza eju y’obumenyi b’obukuuze bwa Mungu kugerera amalanga ma Kristu.
7 Aliko rhugwerhe obula buhirhi omu bintu by’obudaka, omu kuntu emisi erhalukire ey’olugero ebe ey’erhengere emwa Mungu s’arhali emwerhu.
8 Rhuli rhwananizwa enyunda zoshi n’ebibazo binene, aliko arhali kuhika aharhurhakagala kuchihinya. Rhuli rhwachiyunva rhwahwererwe, aliko rhurhali rhwava rhwabula loshi-loshi gurhe rhujirage.
9 Bali barhulibuza, aliko rhurhalekererwe; bali barhubanda ahashi, aliko rhurhali rhwahomboka.
10 Buli mango rhuli rhwalembera omu mibiri yerhu ebijiro byakayirha bili nk’ebi Yesu ahuranaga, omu kuntu akalamo ka Yesu kabonekane n’omu mubiri gwerhu.
11 Bulala rhwabo rhwe rhulamire, buli mango rhuli rhwahurana olufu masu oku masu eju ya Yesu, omu kuntu akalamo ka Yesu kabonekane n’omu mubiri gwerhu gwakafa.
12 Bobola olufu luli lwakola akasi mu rhwabo, aliko mwabo kalamo kakali kabakolamo.
13 Bulala rhugwerhe eroho ly’obwemere lili nka lilala biyandikirwe ntya oku bililolere: “Naliyerekene obwemere, nantyo naderha.” Nerhu rhuli rhwayerekana obwemere, nantyo rhuli rhwaderha,
14 eyi rhumenyere oku olala wafulaga Yesu, nerhu nj’arhufula nk’oku amufulaga, anarhuyerekana rhwabo nenyu embere za Yesu.
15 Ebyola byoshi biliho oku nyungu yenyu, y’olukogo lunene lwa Mungu rhurhakwanene lugenderera kuluga kandi bwenene, bulala lunaluga amango bantu banene bali basingiza Mungu omu kumubwira koko.
16 Che chirhumire, rhurhali rhwachika entege, bulala chiro rhwabonekana oku borhere bwerhu b’omubiri nka rhwashengukire, oborhere bwerhu b’omu ndani buli bwaba buhyahya lusiku oku lwindi.
17 Bulala chiro akaba oku amalibuko mali ma kasanzi kageke manayanguhire, mali marhulerhera obukuuze bunene bwenene buzidohere, bunali bw’esiku n’amango;
18 eyi rhunali rhwaseza amasu merhu oku bintu birhabonekana s’arhali oku bintu binabonekana. Bulala ebintu binabonekana bili bya kasanzi kageke, aliko ebintu birhabonekana bili by’esiku n’amango.
Mahugulo m'efo
^ Ao “yafunikirwe.”
