Ama kabiri oku Bakorinto 10:1-18
10 Lero nyono nyenyine Paulo, namabarhebereza oku bwirhonzi n’obwinja bwa Kristu, chiro akaba oku baguma mu mwabo banaderha oku amango ndi haguma nenyu masu oku masu nanderha n’obwirhonzi, aliko amango ntali haguma nenyu, ntayubaha kubakalihira.
2 Mbahemere mujire okuntu hanola mba haguma nenyu, ntabakalihiraga n’okurhola esimikiro zikomere mbwazize nakarhola oku bilolere bantu baguma bali barhubona nka rhuli rhwalambagira omu mubiri.
3 Bulala chiro akaba oku rhuli rhwalambagira omu mubiri, rhurhali rhwalwa evita omu kukulikiza oborhere bwerhu b’omubiri.
4 Bulala entwaro z’evita lyerhu zirhali z’omubiri, aliko Mungu anazikomeza omu kuntu zigale kukundula ebintu biserere bwenene.
5 Rhunakundula amawazo na buli chintu chilungerere chazamukire yi chipinga obumenyi bwa Mungu, rhunagwinyiza* na buli wazo yi rhulijira likenge Kristu;
6 rhunali tayari kuha buli muntu orhakenga obuhane, amango mwayerekana loshi-loshi oku munakenga.
7 Munalolera akachiro k’ebintu oku shusho lyabyo. Akaba hali omuntu owazize oku ali wa Kristu, ashube awaze k’obula bukweri: Nka kulala ali muntu wa Kristu ku nerhu rhunali bantu ba Kristu.
8 Omu kuntu chiro nachitapa* bwenene eju y’obuhashe Waliha arhuhere yi rhubayumbaka s’arhali yi rhubabomola, ntakozwaga eshoni.
9 Bulala ntalonzeze nkabonekana nk’oli walonza kubayubahisa kugerera amaruba mani.
10 Bulala banaderha: “Amaruba mage maba mw’ebinwa by’akamaro majira n’emisi, aliko amango ali haguma nerhu, aba muzamba n’ebinwa byage biba bisuzagurikire.”
11 Omuntu oli waderha ntyo, amenye oku ebi rhunaderha omu maruba amango rhurhali haguma nenyu, nji rhwabijira hanola nji rhuba haguma nenyu.
12 Bulala rhwabo rhurhapima chiro kuchiheba omu bigusho by’abantu changwa mpu rhuchihuzanye n’abantu banachihala mpu bakwanene kuba bakozi ba Mungu. Aliko amango bali bachipima bonyine oku bonyine n’okuchihuzanya bonyine oku bonyine, banaba eyi bali bayerekana oku nta bwenge bajira.
13 Aliko rhurhali rhwachitapira* embuga w’emipaka rhwagabirwe, si rhuli rhwachitapira omu mipaka y’eteritware Mungu arhupimiire, ayijira omu kuntu ehike chiro n’eyola mwenyu.
14 Kweri, ntacho rhuli rhwakola chili embuga w’emipaka rhwagabiirwe, bulala rhwe rhwaliri b’oburhanzi kuyinja emunda muli eyi rhugwerhe emyazi minja elolere Kristu.
15 Nanga, rhurhali rhwachitapira* akasi k’owindi muntu embuga w’emipaka y’eteritware rhwagabiirwe, aliko rhunihire oku obwemere bwenyu bwagenderere kuluga, n’ebi rhwakolere byagenderera kuyololoka omu mipaka y’eteritware yerhu. Nantyo rhwagwarha obuhashe b’okukola binene,
16 yi rhutangaza emyazi minja omu bihugo bili hale n’emwenyu. Omu kujira ntyo, rhurhachitapira* ebyabaga byakolerwe omu teritware y’owindi muntu.
17 “Aliko owachitapa,* achitapire Yehova.”
18 Bulala arhali omuntu onachihala mpu akwanene kuba mukozi wa Mungu yenayemerwa, aliko olala Yehova anayerekana oku akwanene yenayemerwa.
